BAHAN PA MAMRE 5-11 APRIL 2015 RG. GBKP CENGKARENG (SIDANG SINODE GBKP)

BAHAN PA MAMRE 5-11 APRIL  2015 RG. GBKP CENGKARENG

(SIDANG SINODE GBKP)

Ogen : PERB. 15: 1-11                              Tema: “ARIH-ARIH (RUNGGU) GUNA SI MEHULI”

Tujun : Gelah Mamre mpelebe budaya runggu ibas muat keputusen si mehuli.

Penjelasen Teks Ogen :  

Kitab Perbahanen Rasul enda nuriken uga semangat ajar-ajar Yesus si pemena siigelari rasul-rasul meritaken Berita si Meriah alu gegeh Kesah Si Badia, lanai terjeng i Jerusalem tapi seh ku Judea ras Samaria, bagepe sue ras kai siiperentahken Yesus, seh ku belang-belang doni (Perb 1:8). Pergeraken kekristenan memang ibenaken I tengah-tengah kalak Jahudi jenari reh belangna seh maka kalak si labo Jahudi pe melala dungna si tek dingen bengket jadi kalak Kristen. I daerah Antiokhia me sipemenana kal pengikut Kristus igelari Kristen (bdk. Perb. 11:26). Paulus ras Barnabas pe termasuk rasul si luar biasa meritaken BSM alu kuasa Kesah Si Badia, kenca mbelang isiarina daerah-daerah si debanna ibas meritaken BSM mulihken ka ia duana ku Antiokhia. Perikop si jadi ogen PA Mamre enda nuriken kerna pergumulan si ihadapi Paulus ras Barnabas kerna perjengilen si terjadi ibas perpulungen Antiokia.

1.    Ay. 1-2 :  Ibas perpulungen Antiokia lit turah persoalen eme kerna aturen sunat, sebab piga-piga kalak si reh ngajari i Judea nari ngataken maka  kalak si la Jahudi si atena bengket jadi Kristen arus isunat sue ras UU Musa, adi lang labo banci terkelin. Tapi Paulus ras Barnabas menentang pengajarenna e seh maka terjadi perjengilen si mesangat kerna si e. Emaka guna ndungi perjengilen e ersada arih perpulungen gelah Paulus, Barnabas ras piga-piga perpulungen berkat ku Jerusalem guna ncakapken persoalen enda man rasul dingen pertua2. Siidah ijenda uga perpulungen Anthiokia ijenda cukup bijaksana, la nggit ate-atena saja ndungi persoalen si lit e sisada-sisada, sebab itehna maka ia pe lit ibas kiniersadan ras merupakan bagin ibas perpulungen si pemena i Jerusalem. Enda sebabna persoalen si terjadi e iusulken perpulungen e ibaba ku sidang Gerejawi i Jerusalem.

2.    Ay. 3-11 : Berkat me Paulus, Barnabas ras piga2 perpulungen e ku Jerusalem, emaka ersidang me rasul-rasul ras pertua-pertua guna ncakapken persoalen e tapi ije pe melala denga perdebaten seh maka percakapen e lalap la erkedungen, emaka tedis me Petrus, nina : maka ia nggo ipilih Dibata nai nari guna meritaken BSM termasuk man kalak si la Jahudi pe gelah kalak e tek, janah menurut Perus maka Dibata nge si mereken Kesah Si Badia man kalak e janah labo erndobahen iidah Dibata kalak Jahudi ras si la Jahudi, emaka tek Petrus maka kalak Jahudi bagepe si la Jahudi banci terkelin erkiteken Lias Ate Tuhan. Penjelasen Petrus menegaskan dua hal eme : 

1. Maka i lebe-lebe kerina manusia bali dingen la erndobahen, subuk Jahudi bagepe la Jahudi.
2. Keselamaten/keterkelinen eme erkiteken Lias ate Tuhan Jesus.

Litna sidang i Jerusalem enda ncidahken maka perlu lit  diskusi ras percakapen, arih-arih ras runggu  guna muat si mehuli ibas ndungi persoalen-persoalen si terjadi ibas perpulungen, sue ras tema PA Mamrenta enda. Ibas menghadapi isu teologi si peturah perdebaten ras pertentangen, perlu irungguken ibas sidang gerejawi  guna muat jalan keluar, janah persoalen e pe jadi jelas man kerina perpulungen gelah ngasup mbedaken apai pengajaren si benar ras si salah erpalasken sura-sura Tuhan. Arah bahan PA Mamre enda siidah maka perpulungen Antiokia nggejapken maka ia pe bagin ibas perpulungen i Jerusalem, emaka kai si jadi I Antiokia labo iakapna persoalenna si sada ngenca, emaka patut iakapna icakapken radu ras . Arah enda siidah uga belinna manfaat Sidang Gerejawi guna ndungi persoalan-persoalan si turah ibas perpulungen. GBKP eme gereja si berlatar belakang suku karo janah secara konteks budaya pe siidah kalak Karo ibas ndungi persoalen-persoalen si lit ibas kegeluhen si tep-tep wari pe  makeken prinsip budaya runggu, ertina :  persoalen si terjadi irunggu-ken guna ndatken jalan keluar si mehuli guna kiniulin kerinana. Emaka GBKP pe ibas ndungi kai pe mengutamaken budaya runggu/arih-arih, la banci ate-ate ibas mutusken kai pe, tapi ibas ndungi persoalen silit  ibas perpulungen, arus irungguken ibas persidangan Gerejawi. Bulan April enda ilakoken me Sidang Sinode XXXV, guna  mengevaluasi pelayanen GBKP 5 tahun terakhir enda, bagepe ibas Sidang Sinode 2015 enda me kesempaten mpelimbarui Tata Gerejanta GBKP, menetapken GBP GBKP periode 2015-2020 ras pemilihen  Moderamen GBKP periode 2015-2020. Tentuna iarapken Peserta si ikut ibas Sidang Sinode enda iingetnalah maka ia me alat tan Dibata, janah jadi Petrus, Paulus, Barnabas, Jakup masa kini  si ngerunggui dahin gereja enda rikutken sura-sura Dibata ras nggit ngukuri alu mbages kai si banci ilakoken guna pengembangen ras kiniulin gerejanta GBKP enda ke depan erpalasken Kata Dibata ras pertoton, gelah kerina keputusen si ihasilken pagi bagi keputusen Sidang Jerusalem, si mabai kiniersadan bagepe mereken keriahen ras malem ate man kerina ngawan ni perpulungen GBKP. Emaka sitotokenlah perdalanen sidang sinodenta ras kerina peserta si berkat kubas persidangen e gelah tetap mengutamakan ras sura-sura Tuhan ras ndarami si ngena ate Tuhan gelah kerina keputusen si ihasilken pagi maba kiniulin man gerejanta GBKP enda.

SELAMAT MELAYANI & TUHAN MEMBERKATI

                                                (Pdt. Jenny Eva Karosekali STh. M.Min)