BAHAN PA MORIA TGL 5-11 APRIL 2015 RG. GBKP CENGKARENG

BAHAN PA MORIA TGL 5-11 APRIL 2015 RG. GBKP CENGKARENG

Ogen : 1 TIM. 6:6-10                                                                Tema: “TULAK PERJUDIN”

Penjelasen Teks, Point ras Garis besar :

1. Surat enda isuratken Paulus man Timotius, si nampati Paulus ibas dahin Meritaken BSM. Aminna gia Timotius nguda denga tapi nggo ipercayaken Paulus guna ngepkep perpulungen kalak Kristen sebab iteh Paulus maka Timotus sekalak si tutus ibas kiniteken (bdk. 1 Tim 1:2) mulai kin kitik-kitikna nari erkiteken didiken ninina Lois ras nandena Eunike (2 Tim. 1:5). Ibas bagin ogen PA Moria enda Paulus nuruh Timotius guna meritaken dingen ngajarken perpulungen kalak si tek gelah nggeluhken kegeluhenna alu biak kegeluhen kalak Kristen dingen ngelawan pengajaren si la tuhu ras biak geluh si la payo.

2. Ay. 6-10 : Piga-piga point penting kerna biak kegeluhen Kristen siiajarken Paulus ijenda antara lain eme :

v  Maka agama labo dalan ncari kebayaken, bagi ilakoken kalak si deban si la nandai Dibata, si ndarami keuntungan ras kebayaken arah kai pe. Tapi kebayaken kalak Kristen eme ibas ngasup ngataken bujur ras erpuas ate dingen  ncukupken geluh  erpalasken kai si lit ibas kita. Kalak si ngasup ngataken bujur ibas uga litna geluhna janah erpuas ate ibas keberadaanna, ia me si bayakna, janah ndauh ibas biak merangap.

v  Kalak si ersura-sura bayak janah njadiken kebayaken doni jadi perayaken geluhna banci ndabuh kubas percuban janah bene ibahan sura-sura si bodoh dingen jahat sierbahanca ia gedap dingen kernep, sebab merangap nandangi duit eme sumbul kerina kejahaten. Kerangapan erbahanca mekatep manusia kehilangan akal sehat janah menghalalkan segala cara guna ndatken sura-surana ras nehi kerangapenna e. 

3. Judi eme permainan talu ntah menang, permainan untung-untungan, janah perukuren kalak si erjudi tentu sura-surana uga ia gelah menang ras si lit ibas ukurna eme ndatken duit imbangna erjudi e gelah jadi sikerajangenna. Erkiteken si e me maka ibas judi lit situhuna gambaren : menghalalkan segala cara guna banci menang ntah pe guna banci ndatken duit imbang. Kalak si erjudi adi menang sekali labo ia puas emaka pasti iusur-usurna ka terus sebab judi mabai kalak kubas biak kerangapen janah adi talu pe tetap nge nagih sebab penasaren ia ntah pagi banci menang nina ukurna. Emaka bagi nina Paulus ndai biak sibage justru mabai manusia kempak kebenen dingen kernepken nge ngenca.

4. Dibata nuruh kita erdahin alu curcur panasta guna ncariken kai siperluken kita bas geluhta, labo arah kundul-kundul ras ngukurken uga maka duit kalak jadi sikerajangenta ibas meja judi. Jadi bas dampar si e p situhuna kita nggo ngelanggar Pedah Dibata. Bagin si deban pe ibas Pustaka Si Badia ikataken maka kai si lit ibas kita eme pemere Tuhan dingen sikerajangen Tuhan emaka arusna ipakeken pe guna si ngena ate Tuhan, labo guna kepuasan diri ras guna ncari keuntungan man banta pribadi saja ngenca. Judi eme penakit masyarakat emaka arus iberantas sebab judi erbahanca kalak jadi malas, jadi motu/bodoh, jadi merangap, dingen lupa pendahinna, lupa ras la diatena jabuna ras sidebanna. Moria arus ikut serta ibas nulak ras memberantas perjudin sebab judi maba kehancuren geluh man ise pe, adi menang kita, kita nggo merampas kai si lit ibas kalak si deban alu la mereken imbalan kai pe, adi talu, kita nggo nia-niaken kai si lit ibas kita si aturna banci sipakeken guna hal si deban si terulin min ndai. Teklah kita kebayaken si idatken arah judi ras cara si la benar maba kita kempak kebenen ras kiniseran, uang setan pasti lenyap ditelan siluman (bdk. Kuan2 15:6; Kuan2 16:8). Alu kesabaren ras pertoton siarapken Tuhan nampati kita ibas mereken kesadaren man keluarga, perbulangen, perpulungenta si kecanduan judi gelah jera ras nadingken biak sib age guna keselamatenna ras keselamaten jabuna.

SELAMAT MELAYANI & TUHAN MEMBERKATI

Pdt. Jenny Eva Karosekali STh. M.Min