BAHAN PJJ 5 – 11 APRIL 2015 RG GBKP CENGKARENG

BAHAN PJJ 5 – 11 APRIL  2015 RG GBKP CENGKARENG

OGEN : Perb. 15:1-21      Tema: “Ngerunggui dahin Gereja Rikutken Sura-sura Dibata”

Penjelasen Teks :

Ay. 1-2 :  Ibas perpulungen Antiokia lit turah persoalen eme kerna aturen sunat, sebab piga-piga kalak si reh ngajari i Judea nari ngataken maka  kalak si la Jahudi si atena bengket jadi Kristen arus isunat sue ras UU Musa, adi lang labo banci terkelin. Tapi Paulus ras Barnabas menentang pengajarenna e seh maka terjadi perjengilen si mesangat kerna si e. Emaka guna ndungi perjengilen e ersada arih perpulungen gelah Paulus, Barnabas ras piga-piga perpulungen berkat ku Jerusalem guna ncakapken persoalen enda man rasul dingen pertua2. Siidah ijenda uga perpulungen Anthiokia ijenda cukup bijaksana, la nggit ate-atena saja ndungi persoalen si lit e sisada-sisada, sebab itehna maka ia pe lit ibas kiniersadan ras merupakan bagin ibas perpulungen si pemena i Jerusalem. Enda sebabna persoalen si terjadi e iusulken perpulungen e ibaba ku sidang Gerejawi i Jerusalem.

Ay. 3-11 : Berkat me Paulus, Barnabas ras piga2 perpulungen e ku Jerusalem, emaka ersidang me rasul-rasul ras pertua-pertua guna ncakapken persoalen e tapi percakapen e lalap la erkedungen, emaka tedis me Petrus, nina : maka ia nggo ipilih Dibata nai nari guna meritaken BSM termasuk man kalak si la Jahudi pe gelah kalak e tek, janah menurut Perus maka Dibata nge si mereken Kesah Si Badia man kalak e janah labo erndobahen iidah Dibata kalak Jahudi ras si la Jahudi, emaka tek Petrus maka kalak Jahudi bagepe si la Jahudi banci terkelin erkiteken Lias Ate Tuhan. Penjelasen Petrus menegaskan dua hal eme : 

1. Maka i lebe-lebe kerina manusia bali dingen la erndobahen, subuk Jahudi bagepe la Jahudi.
2. Keselamaten/keterkelinen eme erkiteken Lias ate Tuhan Jesus. Pernyataan Petrus ipegegehi ka pe arah Jakup si berinisiatif la nusahken kalak si atena mulihken kempak Dibata.

 Ay.12-21 : Kenca bage Paulus ras Barnabas ngerana nuriken kerna tanda2 sengget si nggo ibahan Dibata arah ia I tengah2 kalak si la Jahudi. Emaka ngerana Jakub, janah ia pe menegasken kai si nggo isehken Petrus emaka iusulkenna gelah kalak si la Jahudi si nggo erpengendes man Dibata la perlu isusahi alu aturen-aturen sunat tapi usulna perlu ibahan surat kerna aturen pangan si la bersih si nggo ipersembahken man dibata-dibata palsu.

Litna sidang i Jerusalem enda ncidahken maka perlu diskusi ras percakapen guna menetapken dasar-dasar pemahamen & ajaren (teologi) si benar kerna hal-hal si penting gelah kerina banci iantusi perpulungen alu payo dingen benar. Emaka ibas menghadapi isu teologi si peturah perdebaten ras pertentangen, perlu icakapken ibas sidang gerejawi  gelah jumpa solusi/ jalan keluarna janah isu e jadi jelas man kerina perpulungen dingen ngasup mbedaken apai pengajaren si benar ras si salah erpalasken sura-sura Tuhan.

Arah bahan PJJ enda siidah maka perpulungen Antiokia igejapna nge ia bagin ibas perpulungen i Jerusalem, emaka kai si jadi I Antiokia labo persoalenna si sada emaka patut iakapna icakapken radu ras . Arah enda siidah uga belinna manfaat Sidang Gerejawi guna ncakapken perdalanen ntah pe perkembangen perpulungenta.

GBKP eme gereja si berlatar belakang suku karo janah secara konteks budaya pe siidah kalak Karo ibas ndungi persoalen-persoalen si lit ibas kegeluhen si tep-tep wari pe  makeken prinsip budaya runggu, ertina :  persoalen si terjadi irunggu-ken guna ndatken jalan keluar si mehuli guna kiniulin kerinana. Emaka GBKP pe ibas ndungi kai pe mengutamaken budaya runggu/arih-arih, la banci ate-ate ibas mutusken kai pe, tapi ibas ndungi persoalen silit  ibas perpulungen, arus irungguken ibas persidangan Gerejawi.

Bulan April enda ilakoken me Sidang Sinode XXXV. Ibas Sidang Sinode enda ievaluasi me pelayanen GBKP 5 tahun terakhir enda, kai saja masalah sihadapi GBKP, uga perkembangen  pelayanen si enggo idahiken ras si nggo icapai bagepe kai arapen ras rencana ibas paksa  si reh. Ibas Sidang Sinode 2015 enda me kesempaten mpelimbarui Tata Gerejanta GBKP bagepe menetapken GBP GBKP periode 2015-2020. Ibas Sidang Sinode enda ka nge ilakoken pemilihen  Moderamen GBKP periode 2015-2020. Peserta si ikut ibas Sidang Sinode enda eme wakil-wakil ibas Runggun-Runggun se GBKP janah enda me siarapken jadi Petrus, Paulus, Barnabas, Jakup masa kini (Pandita, Pertua, Diaken), si ngerunggui dahin gereja enda rikutken sura-sura Dibata ras nggit ngukuri alu mbages kai si banci ilakoken guna pengembangen ras kiniulin gerejanta GBKP enda ke depan erpalasken Kata Dibata ras pertoton, gelah kerina keputusen si ihasilken pagi ibas Sidang Sinode GBKP XXXV bagi keputusen Sidang Jerusalem, si mabai kiniersadan bagepe mereken keriahen ras malem ate man kerina ngawan ni perpulungen GBKP. Rikutken Themanta enda “Ngerunggui Dahin Gereja Rikutken Sura-Sura Dibata” erkiteken si e maka piga-piga hal siperlu iperdiateken ibas persidangan gerejawi khususna Sidang Sinode enda pagi

eme :

1.    Kerina peserta si si reh kubas persidangen e arus sadar maka ia alat ibas tan Tuhan, si ipake Tuhan guna nehken sura-suraNa. Emaka kerinana si iputusken ibas persidangen gerejawi arusna erpalasken sura-sura Tuhan ras arusna mehuli ibas pengakap Tuhan labo manusia. Guna si e ibas kerina peserta sidang, iperluken sikap, cara rukur ras tindaken si rusur ndarami sura-sura Tuhan guna perkembangen perpulungen. Adi kerina peserta sidang sadar diri sebage alat Tuhan guna perkembangen perpulungen maka situhuna lanai bo lit alasen guna pemaksaan kehendak, si gegeh-gegehen ntah pe pendapat/cakapna siakapna si paling benar dingen arus ibegiken.

2.    Gereja eme Kula Kristus janah Kristus me kepalana. Erkiteken si e ersidang (ngerunggui dahin-dahin gereja) eme bagin ibas pelayanennta guna Kula ni Kristus. Emaka  iperluken kesiapen pusuh bagepe kesiapan materi sidang/rapat. Sebagai alat Tuhan, kerina peserta sidang arus ertanggung jawab man Tuhan ibas kehadirenna sedekah ngikuti persidangen sebab enggo ipercayaken Tuhan dahin e man banta.

3.    Kepemimpinen ibas gereja labo kepemimpinan one man show, tapi kepemimpinan koletif kolegial : ertina kepemimpinan secaa bersama, kerina keputusen siihasilken eme keputusen bersama labo keputusen otoriter satu orang. Bagepe pe jalanna persidangen, labo banci idominasi oleh orang-orang tertentu saja tapi kerinana ndatken kesempaten guna mereken pendapatna, ras pe wajib guna mbegiken pendapat kalak sideban, saling menghormati ras menghargai teman ibas persidangen, ngataken si benar alu teng-teng, mereken pandangan/usulan alu pusuh si bersih ras ukur si meteruk, seh maka la gia pendapat/ saran ras usulta e si jadi keputusen ngasup kita ngalokenca. Emaka sitotokenlah perdalanen sidang sinodenta ras kerina peserta si berkat kubas persidangen e gelah tetap mengutamakan ras sura-sura Tuhan ras ndarami si ngena ate Tuhan gelah kerina keputusen si ihasilken pagi maba kiniulin man gerejanta GBKP enda.

                                       (Pdt. Jenny Eva Karosekali STh. M.Min)