BAHAN PA MAMRE RUNGGUN GBKP CENGKARENG TANGGAL 23 FEB – 01 MARET 2014

BAHAN PA MAMRE RUNGGUN GBKP CENGKARENG

TANGGAL 23 FEB – 01 MARET 2014

Bahan   : KUAN-KUANEN 3:5-8 

Thema  : “OLA AKAPNDU PENTAR KAM LEBIH ASA PATUTNA”

Tujun    : Gelah Mamre ngasup makeken pemetehna alu benar ras patut

KATA PERLEBE :

Kitab Kuan-kuanen isina eme pedah, perumpamaan dingen ajar kerna pengajaren agama ras kerna uga arusna nggeluh alu payo. Inti ibas kerina Kitab Kuan-kuanen enda eme nggeluh alu pentar janah palasna eme mehamat dingen erkemalangen man Tuhan (Kuan2 1:7). Emaka si jadi penekanen ibas Kitab enda eme uga kita banci nggeluh pentar (berhikmat) ertina la ngenca secara intelektual (erpemeteh/ berilmu) tapi pe bijak ibas kerina hal, bagepe ibas perukuren (kecerdasan spiritual dan emosional).

PENJELASEN TEKS OGEN :

 Ay. 5-7 : Ijenda ipersingeti man si ngogesa guna ernalem man Dibata alu bulat ukur, ertina erpenalemen man Dibata tuhu-tuhu, mengandalken Dibata ibas kegeluhenna sepenuhna, la alu setengah-setengah ( la erpaksa-paksa, ntah ersung-sung) ntah pe mawen-mawen ernalem man Tuhan, mawen-mawen ernalem man manusia, man gegeh ntah pemetehna jine rsd. Ayat enda mpersingeti kita maka lalit ingan penalemen si deban si tuhu-tuhu lain Dibata ngenca sebab adi kita ernalem man pemetehta ntah gegehta, terbatas kal tapi pemeteh ras gegeh Dibata la terbatas. Erkiteken si e me maka iajuk Penulis Kuan2en maka la banci lang ibas kerina dahin sinidahiken kita arus siinget Dibata (ay.6) sebab arah pemeteh ras kepentaren Dibata nge ngenca si banci mabai kita kubas dalan si payo. Justru adi pentar siakap banta, megati maka erbahanca kita lanai ernalem man kepentaren Dibata, emaka ula kel sempat siakap pentar man banta lebih asa patutna ( ay.7). Kinatana maka enterem manusia adi pentar iakapna man bana ndabuh kubas perbahanen_perbahanen si la payo. Kepentaren siibereken Dibata man banta la terjeng erbahan kita ngasup mbedaken apai si payo ntah si la payo tapi desken tambar si ngasup mpepalem pinakit ras si mesui ibas kita. Ertina adi Dibata ngajari kita ibas pusuh ras perukurenta mabai kita sehat secara jasmani ras rohani. Sehat rohani (pusuh &perukuren) mabai jasmani-nta (daging kulanta) pe mehuli, bagepe adi secara rohani sehat, erbahanca ngasup kita ndahiken dahin-dahinnta. Bahkan adi nggo lit sempat pinakit secara rohani e, eme biak-biak kepentaren doni, kenca nggo megegeh kepentaren Dibata ibas kita banci ngangkatken (empepalem) kai si la payo ndai.

PENGKENAINA

Thema ta ngataken : Ola akapndu pentar kam asa patutna…. Ate ta ngataken maka kepentaren manusia lit batasna. Kalak si pentar akapna bana lebih asa si ibereken Dibata, nggo pasti ia “mengkonsumsi” kepentaren doni enda. Si perlu man jagan, adi si pan pangan si la kin jadi panganta, maka banci terganggu kesehatenta. Bageme adi si konsumsi kepentaren doni, si kin arusna si man konsumsin e ibas Dibata nari, pasti terganggu kesehaten rohanita. Emaka labanci lang arus kita berbalik arah, gelah pinter denga arah pedalinta. Nterem kal Mamrenta berkualitas secara intelektual (erpemeteh) genduari, emaka arah bahan PA Mamre enda ibabai Mamre gelah ula salah makeken  pemetehna janah ngasup makeken pemetehna alu benar ras patut emaka palasna erkemalangen man Tuhan alu bulat ukur.