BAHAN PJJ RUNGGUN GBKP CENGKARENG

TANGGAL 23 FEB – 01 MARET 2014

Bahan   : Ulangan 14: 22-29

Thema  : “Sehkenlah Persepuluhenndu Man Dibata”

Tujun    :

• Gelah ngawan perpulungen meteh UU Persepuluhen rikutken Kata Dibata
• Gelah ngawan ni perpulungen notoken ras alu setia mereken persepuluhen man Tuhan alu payo.
• Bas nehken persepuluhen pe guna nginget kalak Lewi, kalak pertandang, anak melumang ras diberu balu-balu.

PENJELASAN TEKS :

Bagin si jadi ogen PJJnta enda eme perentah Dibata si ipeseh Musa man bangsaNa eme kerna UU Persepuluhen.

Ay. 22-23 : Umat Israel isuruh Dibata guna mpeserap sepersepuluh ibas ulih juma nari tep-tep tahun, janah mbabasa ku ingan ersembah man Tuhan. Jelas ikataken Dibata tujun perentah enda eme gelah bangsa enda erlajar disiplin ibas mehamat man Tuhan.

Janji Dibata guna masu-masu bangsaNa igenapi ibas karya penyelamatan Dibata si mencakup keturunan, taneh si nggo ipasu-pasu Dibata seh maka nggo rulih  janah jadi berkat/ pasu-pasu man bangsa-bangsa si deban. Jadi ulih bekas pemasu-masun Dibata eme si harus ipeserap sepersepuluh, janah ibaba ku ingan ersembah man Dibata sebage tanda kehamaten man Tuhan bagepe inikmati alu ipan radu ras iadep-adepen Tuhan alu dem keriahen ukur(ayat22,23).

Ay. 24-26 : Janah ipersingeti ka tole maka adi ulih pemasu-masun Tuhan e ndauhsa ibaba ku ingan ersembah e maka banci idayaken, tapi tetap sen tukurna ibaba ku ingan ersembah man Tuhan emaka sen tukur e banci itukurken jadi pangan guna inikmati  iadep-adepen Tuhan radu ras keluarga, ermeriah dingen ersenang-senang ibas nggejapken pemere ras pasu-pasu Tuhan. Janah enda jadi sada pelajaren man isi jabu (anak-anak) guna mehamat man Dibata arah maba persembahen persepuluhen enda.

Ay. 27-29: Tapi pemere Dibata e la ngenca igejapken sisada ras keluarga tapi pe harus ka nge ernanam man kalak si deban, man kalak Lewi, kalak pertandang, anak melumang, ras diberu balu-balu. Siidah ijenda pengajaren siisehken Tuhan man bangsaNa si ngajari bangsa e guna la nggeluh alu biak “egois” ngukurken diri sendiri sebab bas pemere si isehken Dibata e la banci inikmati sendiri tapi arus jadi pasu-pasu ka man kalak si deban. Ibas kerina pemasu-masun Tuhan e, lit bagin Tuhan ras bagin kalak si deban emaka perentah Tuhan ijenda: “ibas tiap ujung tahun peteluken, babalah persepuluhen kerina ulih jumandu man pangan kalak Lewi, erkiteken la lit ertana (sebab kalak Lewi ikhususken ibas dahin imam ras nehken persembahen man Tuhan emaka lalit taneh ibereken guna iusahakenna), bagepe kalak pertandang, anak melumang ras diberu balu-balu.” Kerina iajuk guna mperdiateken kalak si deban dan saling menghidupi ertina Dibata la erngena ate adi lit si erkelebihen/besur tapi lit si kekurangen/kelihen. Emaka peraturen persepuluhen enda ijenda erat kaitenna ras keadilen sosial i tengah-tengah kegeluhen umat Tuhan.

Peraturan Persepuluhan eme sarana guna mabai umat ngakui maka Dibata me sumber Pasu-pasu, janah ulu kerina pemere si mehuli si nggo ialoken bangsa e. Alu maba persepuluhen dingen man radu ras iadepen Tuhan, nikapken kai siiperluken kalak Lewi, kalak pertandang, anak melumang ras diberu balu-balu, umat nehken pengataken bujurna ras pengakun kinitekenna iadepen Dibata. Bagepe arah si e kita ngidah uga Dibata erpihak ras mperdiateken kalak lemah ras si man sampaten. Jadi, kalak si tek isuruh taat ras mediate man kalak si deban labo gelah ipasu-pasu tapi nggejap maka:  kita nggo leben ipasu-pasu Dibata emaka e justru jadi pendorong untuk bersyukur dan bertindak dalam solidaritas.

Ibas tiap tek kerna persepuluhen lit nge pengertin si berkembang sue ras konteks ras kecibal teks e isuratken, tapi intina eme uga kita iajari guna enghamati Dibata arah ulih pencarinta janah iajuk arah si e pe mediate dingen jadi “saluran berkat” man kalak Lewi bagepe man kalak si mesera. Intina kita ersembah e labo erkiteken aturen tapi marilah erkiteken si gejap pemere ras pasu-pasu Dibata emaka la siakap mberat ersembah tapi jadi keriahen sebab persembahen eme buah kiniteken ras bentk pengataken bujur ibas nggejapken pasu-pasu Tuhan. Palasta ibas nehken persepuluhen eme tanda kehamatenta ras pengataken bujurta man Tuhan, emaka lanai perlu berdebat soal aturen-aturen ibas kita ndalanken perpuluhen e. Adi Dibata pe la pernah ertaktak ras hitung-hitungen ibas nehken kekelengenNa man banta, keleng kal ateNa kita she maka anakNa si tonggal pe iendeskenNa guna ngkelengi ras nebusi kita, ngkai maka kita dekahen ertaktak ras hitung-hitungen rusur ibas mere man Tuhan ? Persembahan persepuluhen eme pengajaren si ngajari kalak si tek guna “disiplin”  ibas mere ras ngataken bujur man Tuhan sebage tanda kehamaten ras pengataken bujur man Dibata ibas nggejapken pasu-pasuNa. Marilah si latih dirinta (disiplin & berkomitmen) alu mereken persembahen persepuluhenta.

SELAMAT BELAJAR MENDISPLINKAN DIRI DGN MEMBERI PERPULUHEN

DIBATA SI MASU-MASU (Pdt. Jenny Eva Karosekali, STH., M.Min)