BAHAN PJJ RUNGGUN GBKP CENGKARENG TANGGAL 16- 23 MARET 2014

BAHAN PJJ RUNGGUN GBKP CENGKARENG

TANGGAL 16- 23 MARET 2014

Bahan   : Nehemia 4:14-15,21

Thema  : “Tutuslah Erdahin”

Tujun    :

• Gelah ngawan perpulungen meteh palas Nehemia ndahiken dahinna.
• Gelah ngawan ni perpulungen ngasup ngusih Nehemia ibas geluhna ndahiken dahinna amin pe jumpa rungga (hambaten)

PENGANTAR :

Nehemia, nggeluh sada zaman ras Imam Esra, dahinna eme jadi juru minum Raja Artahsasta I (raja Persia). Tupung paksa si e nterem kalak Israel si lit ibas pembuangen i Babel ras Persia nggo ibere ijin mulih ku Yerusalem si nggo runtuh. Kenca Nehemia ertoto kerna keadaan Yerusalem (lih. 1: 4-11; 2:4-6), iangkat Raja Artahsasta ia jadi Gubernur Yehuda, janah ije me imulai pembangunan mulihi tembok Yerusalem. Ia jadi Gubernur Yehuda dekahna 12 tahun, kenca piga-piga waktu ia mulihken i Persia nari, iangkat ka jadi Gubernur Juda (Yehuda) guna masa bakti ke 2 (bdk. Neh. 2:1; 13:6-7a). Ituriken ibas Kitab enda maka ia sekalak si erdahin alu “mengandalkan doa” (bdk. 2:4). Imam Esra nampati Nehemia ibas pembangunan fisik Yerusalem ras pemulihan rohani kalak Juda si nggo mulih ibas pembuangen nari. 

PENJELASAN TEKS :

Bagin ogen enda nuriken kerna uga Nehemia ngelakoken pendahinna selaku Gubernur Juda, guna mbangun tembok Yerusalem mulihi. Melala tantangen ras hambaten (rungga) si ihadapina, ibas Sanballat ras teman-temanna, Tobia ras tentera Samaria, iuru-uruna, igombang-gombangina guna ngolangi Nehemia ras bangsana mbangun Yerusalem mulihi (4:1-3). Tapi ihadapi Nehemia kerina alu ertoto (ay.4-5). Tantangan e la ngasup mpengadi ia ibas ndahiken dahinna, tapi tetap iteruskenna dahinna. Tupung ibegi Nehemia maka kerina musuh-musuhna eme: Sanballat, Tobia, kalak Arab, Amon ras Asdot nggo sepakat guna nerang Yerusalem, tetap ia ertoto man Dibata janah ngajuk bangsana guna erjaga-jaga suari ras berngi (ay.9). Uga buena pe tantangan ras musuh si ngambati Nehemia ibas ndahiken dahinna la erbahanca ia “patah semangat” ntah menyerah tapi maju terus alu gegeh ras semangat doa (pertoton), sebab isadari Nehemia maka ia jadi Gubernur Juda janah ibere kesempaten guna mbangun Yerusalem mulihi pe erkiteken ulih pertotonna man Dibata. Palasna ibas ndahiken dahinna eme ertoto. Pesan moralna ijenda: Pendahin siidahiken alu palas pertoton erbahanca kita megegeh ndahiken dahin e, ngasup ngalaken kerina erbage hambaten (rungga), maju terus pantang “mundur” sebab tek kita Dibata nampati dingen mereken jalan keluar ibas hambaten sir eh man banta. Mekatep ibas kegeluhennta semangatta la bagi Nehemia ibas ndahiken dahinta, lit kenca si “nggurgari”, si megombang ntah si ngambat-ngambati kita mis “panas pusuhta”, nembeh, ngilas, ntah merawa kita, she maka nggit kita rubat, piah lanai ateta tutus ndahiken dahin e, mawen-mawen nggit ka mundur dingen si ngadiken ndahikenca. Nehemia melawan musuh yang menghambat dia dengan kekuatan doa janah tek ia maka Dibata sendiri si erperkara / erperang guna ia (ay.20).

Ay. 14-15,21: Ibas bagin enda ituriken uga Nehemia ngidah maka bangasana e mbiar, emaka ipetetapna ukur bangsana bagepe pemimpin-pemimpin terpuk ibas bangsa Juda, gelah ula mbiar man musuh-musuhna. Ipersingeti Nehemia bangsana maka Tuhan siisembah bangsa Juda eme Dibata si mbelin dingen megegeh. Teridah ijenda Nehemia selaku pemimpin si mediate, pemimpin yang memotivasi (motivator), si mpetetap ukur ras si mereken semangat. Iajukna bangsana gelah tetap nerusken pendahin mbangun tembok Jerusalem, alu semangat erjuang tetap erdahin janah setengahna erjaga-jaga alu iperlengkapi senjata ras ampang-ampang.

Arah ogen PJJnta enda ibabai kita guna ngasup ngusih Nehemia. Si man usihen ibas Nehemia antara lain eme:

1. Njadiken pertoton jadi palas ibas kai pe, subuk ibas ndahiken dahinna, subuk ibas erbelas man Raja, subuk ibas ngalaken musuh-musuh dingen hambaten (rungga) sireh man bana.
2. Ketutusenna ertoto njadiken ia la gampang menyerah, patah semangat tapi punya semangat juang yang tinggi, la nggit talu/mundur ibas tantangan/hambaten sireh tapi “maju terus”. Nehemia “pantang berhenti sebelum jadi” sebab tek ia maka kai siidahikenna eme ulih pertotonna man Tuhan janah Dibata sipeturahsa ibas ukurna.
3. La nggit subuk, mbalas bagepe ersoal ras musuh-musuhna si megombang ras singuru-nguru ia tapi ngendesken musuh-musuhna man Tuhan sebab tek ia Tuhan jadi pembelana ras si erperang guna ia (bdk Neh 4: 20b).
4. Kinitekenna naluken kerina kebiarenna, emaka la ia gentar/mbiar nandangi ise pe, aminna gia nterem musuh-musuhna si erpakat guna ngelawan ia  sebab tek ia Tuhan si isembahna belinen asangken kerina musuh2na.

Tema: “Tutuslah Erdahin”

Nehemia tutus ndahiken dahinna sebab tek ia kai siidahikenna bekas persuruhen Tuhan dingen erkiteken tetap pertoton ijadikenna ibas kai pe siidahikenna tek ia Dibata masu-masu dingen nampati. Subuk tupung jadi juru minum raja pe pasti teridah ketutusenna erdahin, emaka ngena dingen erkeleng ate Raja Persia man bana seh maka ipercayakenna jadi Gubernur Juda. Ertina ibas pendahin kitik ntah mbelin tetap teridah maka Nehemia sekalak si tutus erdahin. Pesan moralna ijenda: “tutuslah ibas sikitik tentu ipercayaken Dibata man banta si terbelinen. Kalak si tutus erdahin la nggit nadingken dahin e lolo, ertanggung jawab ras gigih ndahiken dahin e seh dung aminna gia melala hambaten sireh man bana.

Erdahin eme salah sada bentuk pendilo ras persuruhen Dibata man banta kalak si tek, sada bentuk si ncidahken maka kita eme tempas Dibata (imago Dei)  si ncidahken gambaren Dibata ibas kai pe silakoken kita, emaka lalit alasen man banta la tutus ndahiken dahinnta sebab la ngenca man dirinta bagepe man kalak si deban kita ertanggung jawab, tapi terlebih man Tuhan. Johanes Calvin ngataken : “Di dalam setiap pekerjaan termuat panggilan Tuhan di dalamnya karena itu harus dikerjakan dengan penuh tanggung jawab kepada Tuhan”. Ertina kai pe pendahinta ije lit pendilo Tuhan man banta sekalak-sekalak. Janah pendahin siidahiken alu tutus, dem tanggung jawab, dingen idasari alu pertoton mahan bana kai pe siidahiken kita e berhasil ras ipasu-pasu Dibata, erguna man banta, man kalak si deban terlebih ermulia Dibata arah pendahinta e.

                                                                         

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)