Bahan PA Mamre GBKP Cengkareng 16-22 Maret 2014

BAHAN PA MAMRE RUNGGUN GBKP CENGKARENG

TANGGAL 16-22 MARET 2014

Bahan   : I YOHANES 4:1-6

Thema  : “UJI LEBE KEBENARENNA”

Tujun    : Gelah Mamre nguji lebe kebenaren aliren (isme) sireh, benar ntah lang

KATA PERLEBE :

Kitab I Yohanes enda isuratken Rasul Yohanes alu 2 tujun, eme:

1. Ngajuk si ngogesa gelah nggeluh ersada ras Dibata bagepe AnakNa Yesus Kristus.
2. Mereken pertenget man si ngogesa gelah ola ngikutken pengajaren si papak, si ngataken maka Jesus, Anak Dibata e labo tuhu-tuhu manusia, janah keselamaten labo lit hubungenna ras lagu langkah si mehuli ras kekelengen man teman manusia.

PENJELASEN TEKS OGEN :

Ay. 1-3 :  Yohanes mpersingeti perpulungen gelah ula tek man kerina kalak si ngaku maka ibas ia lit Kesah Si Badia. Erkiteken nggo nterem nabi perguak emaka perpulungen iajuk guna nguji lebe apai kin Kesah Dibata apai si lang. Kalak si ngakui maka Jesus Kristus reh ku doni enda selaku manusia, e ertina lit ibas ia Kesah Dibata sebab ibas paksa si e berkembang pengajaren si ngataken maka Jesus reh ku doni enda labo tuhu-tuhu jadi manusia, janah nina Yohanes kalak sibage labo lit ibas ia Kesah Dibata, janah ia me musuh Kristus. 

Ay. 4-6 : Yohanes mpersingeti perpulungen kerna ise ia, maka ia me sikerajangen Dibata, emaka arusna ngasup naluken kerina nabi-nabi perguak sebab Kesah Dibata si lit ibas perpulungen e gegehen asangken kesah si lit ibas nabi-nabi palsu, si asalna ibas doni nari dingen cakapna pe kerna perkara-perkara doni si lalap. Emaka ipersingeti Yohanes kalak si tek gelah ula megiken cakapna sebab kalak sikerajangen Dibata, sura-suranta, biak geluhta lanai sue ras sura-sura doni, lanai biak doni, bagepe perayaken geluhta lanai terjeng doni enda ngenca.

Tema : Uji lebe kebenarenna.

Konteksta jaman endape melala ajaren-ajaren ras aliren-aliren si berkembang i sekelewetta, termasuk aliran-aliran seputar kekristenan. Melala gereja-gereja berkembang genduari enda alu gelar si bermacam-macam janah lit ka deba si labo jelas ijinna. Janah sue ras perkembangen jaman teologi pe ikut ka berkembang, terlebih simarak kal genduari si ianut piga-piga gereja di Indonesia, eme teologi sukses/ teologi kemakmuran, si ngataken maka adi kalak si tek geluhna pasti ipasu-pasu nari, janah bukti pasu-pasu Dibata e eme keberhasikan, kesuksesan, Sementara kesusahen dingen kemusilen eme kutukan. Adi musil denga kin geluhndu berarti kam harus ndalani “pelepasan” lebe gelah kutuk miskin e ipedauh ibas kam nari janah pasu-pasu Dibata e banci ialokenndu. Adi anak-anak Dibata labo banci susah, musil dingen bangkrut. Adi bage denga geluhta lenga nge kita jadi anak-anak Dibata dingen melala denga nge dosanta, bagenda me pengajarenna. Lit ka ajaren tentang akhir zaman, iprediksina ka ndigan kin wari Tuhan e seh, lit ka deba ngaku maka ia nggo pernah ibaba Tuhan ku Surga janah iutus Tuhan mulihken guna mpersingeti dingen mabai kerina manusia gelah bertobat. Si sangat berkembang genduari enda janah bergerak secara militant eme gerakan “saksi Jehova” si la ngakui kerna ketubuhen Kristus si reh ku doni enda, emaka ia la mperingeti Natal.  Ogen PA Mamre enda mabai Mamre gelah metenget ras ngasup mpegegehi diri alu Kesah Si Badia si nggo sialoken guna “nguji” kerina aliren-aliren ras pengajaren-pengajaren si lit i sekelewetta e gelah ula kita melukah ibabai angin pengajaren si papak seh maka pagi kita ibabaina bene. Kalak si tek arus yakin maka Kesah si lit ibas ia e gegehen asangken kesah si lit ibas nabi-nabi perguak e gelah ula kita talu ibahanna alu pemahamen-pemahamen si la payo e emaka tutus ka ateta erlajar, nambahi pemetehta rikutken kerna Kata Dibata gelah tangkas si the apai si benar ras si payo sue ras kata ras kebenaren Dibata.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)