BAHAN PA MORIA TGL 6-12 APRIL 2014 RG. GBKP CENGKARENG

BAHAN PA MORIA TGL 6-12 APRIL 2014

 RG. GBKP CENGKARENG

Ogen : Rut 1:6-18                                                          Tema: “Pentar Ibas Kiniseran”

Tujun : Gelah Moria 

1. Meteh kepentaren Naomi selaku orang tua ibas ngalaken perbeben.

2. Erlajar arah pengalamen Naomi ibas ngalaken erbage-bage perbeben jenari makeken kepentaren.

Latar Belakang :

Kitab enda nuriken kerna kegeluhen sada keluarga Israel, eme keluarga Elimelekh ras Naomi. Erkiteken kelihen si mesangat terjadi I Israel maka keluarga enda ras dua anakna dilaki berkat ku negri Moab janah tading i je selaku kalak pertandang. Kenca Elimelekh mate, janah kenca 10 tahun tading i Moab mate ka duna anakna, Mahlon & Kilyon, tading me Naomi ras dua permainna Rut ras Orpa, si duana eme asalna ibas bangsa Moab nari. Tapi teridah ijenda uga ketegaran Naomi, aminna gia itadingken perbulangen ras anak-anakna, tapi la bene ukurna, labo ia putus asa janah numpahi padan tapi ialakenna kerina babanna si mberat e dingen iteruskenna kegeluhenna. 

Penjelasen teks Ogen: Rut 1: 6-18

Ay. 6-10 : Kenca ibegi Naomi berita makaTuhan nggo masu2 bangsaNa  alu peranin si mbuah emaka ersikap2 ia ras permainna duana guna mulih ku Israel, nadingken negri Moab. Tapi I tengah dalin isuruhna permenna duana guna mulih ku jabu orang tuana masing-masing sebab la ate Naomi duana permainna nggeluh mesera ras ia. Emaka itotoken ras ipasu2 Naomi permainna enda duana gelah isehken Tuhan kiniulinNa ras ibere Tuhan dalan gelah banci erjabu mulihi.

Point penting ras pesan moralna ijenda eme:

1. Naomi sekalak pernanden si tangguh, tegar, la cengeng ibas ngalaken perbebenna si ertindih2.

2. Naomi sekalak simetua (mertua) si la manja ras egois, si la ngukurken dirina saja tapi iukurina kerna masa depan permainna. La memaksaken kehendak tapi mereken kebebasan, la ngarapken ras “ngidoi” gelah iurus permenna ia ibas masa tuana, tapi justru ipasu2 janah itotokenna permainna gelah ngaloken simehuli ibas Dibata nari.

Ay. 10-14 : Duana permainna la nggit sirang ras Naomi sebab keleng kal ate permainna man bana. Emaka ibereken Naomi pandangan2 guna jadi pertimabngan permainna sebab ia nggo metua, emaka lanai lit kai pe si banci iarapken ibas dirina nari. Enda ilakoken Naomi erkiteken keleng atena permainna janah la atena geluh permainna si nguda denga e sia2 ras dem kiniseran adi ikut ras ia. Emaka dungna erpalasken pertimbangan2 siisehken Naomi, Orpa  mulih ku  orang tuana.

Point Penting ras pesan moralnya : 

1. Naomi sekalak simetua (ibu mertua) si erkeleng ate man permainna emaka keleng kal ate permainna ndai duana man bana seh maka la ia nggit sirang ras nadingken simetuana. 

2. Mekatep terjadi hubungen si metua ras permain la dekat janah la meriah tapi arah teks enda icidahken uga Rut ras Orpa aminna gia berlatarbelakang bangsa Moab (bgs si la nandai Tuhan=kafir), tapi justru mbelin ras tulus  keleng ate si icidahkenna man Naomi aminna gia lanai lit perbulangenna, janah lanai kai pe si banci iarapkenna ibas Naomi nari. Mekatep keleng ate siisehken manusia e erkiteken “ada udang di balik batu” , keleng ate si menuntut ras mengharap balasan, tapi ijenda la bage.

Ay. 15-18 : Nuriken kerna kebulaten ukur Rut ngikutken Naomi. Aminna gia cimbangna, Orpa dungna nadingken Naomi, tapi Rut tetap ngikutken bibina kuja pe ia lawes, nadingken bangsana, nadingken keluargana, janah erpadan ia maka Dibata kalak Israel jadi Dibatana janah kematen ngenca si ngasup nirangkenca. Erkiteken keleng atena si mbelin man bibina ras ketutusenna nembah man Dibata Israel, ipercayaken Dibata man bana hal si luar biasa, arah kesusurenna me tubuh Daud (Raja Israel) bagepe Yesus.

Tema : Pentar Ibas Kiniseran. Arah bahan PA enda ibabai Moria gelah pentar ibas ngalaken perbeben ras kiniseran, la putus asa tapi ngasup erlajar arah kai si nggo icidahken Naomi, tetap ngalaken kerina keadaann dingen nerusken perdalanen geluhna alu ngandalken gegeh Tuhan  (bdk. Filp. 4:13). Teks enda mabai Moria gelah jadi pentar alu ernalem man Tuhan dingen tetap ngandalken Tuhan ibas geluh enda sebab labo kepeken banci perbulangen, anak ntah permain jadi andalennta, adi manuisa si ban jadi penalemennta pasti kita, Naomi diberu si pentar ibas ngalaken kiniseran sebab penalemenna eme Tuhan, emaka ia tangguh, la nggit talu ban kiniseranna ras la nggit menyerah, meratapi keadaan ras situasi geluhna tapi tetap erlayas ukurna seh maka kerina kiniseranna ibas waktuna pe isalihken Dibata. 

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)