BAHAN PA MAMRE TGL 11 – 17 MEI 2014 RG. GBKP CENGKARENG

BAHAN PA MAMRE TGL 11 – 17 MEI 2014

 RG. GBKP CENGKARENG

Ogen :  Kuan2 2:2-5                      Tema: “Mamre si produktif (berkarya, kreatif ras inisiatif)”                                     

Tujun : Gelah Mamre ibas geluhna produktif sue ras sura-sura Dibata.

Gambaren Umum Kerna Kitab Kuan-Kuanen

Penulis: Salomo ras piga-piga si la tersinget gelarna

Latar Belakang: Kitab enda isina kerna ajaren agama dingen kerna cara nggeluh si payo ibas kegeluhen si tep-tep wari alu makeken perukuren sip inter dingen nggeluh mehamat. Tema sentral Kitab enda eme mehamat ras erkemalangen man Tuhan guna ndatken pemeteh dingen kepentaren.

Tujun Kitab  Kuan-Kuanen: nampati kalak gelah pentar dingen ngaloken pengajaren si mehuli, bujur, adil dingen benar. Kitab endape ngajari kalak si lenga erpengalamen gelah cerdik, kalak si nguda gelah pantas dingen pentar, kalak si nggo erpemeteh ertambahna pemetehna, kalak si enggo meganjang sekolahna pe tetap banci erlajar ijenari (Kuan2 1:2-6). Ertina Kitab enda erguna man kerina kalak guna mereken pemeteh maka ngasup ngantusi pengajaren si terbuni ras ndatken pengertin si mbages kerna kai pe.

Point-Point Penting & Garis Besar  Kuan2 2:2-5

1.   Ogenta enda mereken penekanen kerna uga pentingna kepentaren ras pemeteh emaka iajukna ijenda man si ngoge pengajaren enda guna megermet nandangi kepentaren janah berupaya dingen meseksek guna ndatkenca ras ngantusisa (Ay. 2-3). Kepentaren maksudna ijenda eme hikmat/ kebijaksanaan (wisdom). Kalak si bijaksana pasti ngasup erbahan keputusen si tepat, benar, mehuli dingen adil bagepe metenget. Pemeteh maksudna ijenda eme akal budi (ratio, intelegensia), kalak si erpemeteh biasana tindakan ras perbahanenna pasti alu pertimbangan logis (masuk akal), rasional janah memperhitungkan konsekuensi ras akibat ibas kai pe si ilakokenna.

2.   Pemeteh dingen kepentaren e bage pentingna ras mehergana iakap penulis Kitab Amsal, bagi emas si seh kal ergana bagekalah upayanta pe guna ndarami pemeteh ras kepentaren e. Bage pentingna, seh maka upayanta ibas ndaramisa pe arus gigih, la gampang menyerah, desken ndarami erta si terbuni, ertina: “pantang berhenti sebelum mendapatkannya”, 

3.     Kalak si tutus atena ndarami kepentaren, meseksek ndatken pengertin ras ngantusisa pasti geluhna erkemalangen man Tuhan sebab ulu kerina pemeteh eme erkemalangen man Tuhan (Kuan2 en 1:7), emaka teridah arah ia ndalani kegeluhenna, iandalkenna Tuhan ibas mentasi kegeluhenna si tep-tep wari, ertanggung jawab ia makeken waktuna ras tutus atena ibas ndahiken dahinna.

Tema : Mamre si produktif (berkarya, kreatif ras inisiatif)

Kerina manusia situhuna potensial jadi kalak pentar/bijak bagepe erpemeteh. Kesempaten jadi kalak pentar ras erpemeteh terbuka nandangi kerina kita, tergantung sikap geluhta ras uga upayanta ras ketutusen ateta ndarami ras ndatken pemeteh ras kepentaren e. Tanda-tanda kalak si erkemalangen man Tuhan ertanggung jawab ibas makeken kesempaten ras waktu siibereken Dibata guna menghasilken kai si bermanfaat la ngenca man dirina tapi pe man jabuna (produktif). Labo ia nggit nia-niaken waktu alu kegiaten-kegiaten si la erguna, meneken dirina ras jabuna (mis: erjudi, mabuk2an), sebab e pendahin kalak motu/bodoh, labo kalak pentar. Arah PA Mamre enda, Mamre ibabai gelah ibas kai pe siibahanna, siidahikenna kerina idahiken ras ibahan Mamre alu tutus bagi erdahin guna Tuhan labo guna manusia, emaka optimal ras maksimal ibas berkarya sebab selaku kalak si tek, Mamre pe arus sadar maka ia “teman sekerja Tuhan” (1 Kor. 3:9). Emaka sue ras kai siikataken Jesus, Mamre arus ngisi geluhna gelah produktif, menghasilkan kerina si mehuli ibas kai pe siibahanna, “selama tenaga masih ada, selama masih ada waktu tersedia, selama masih siang, kita harus bekerja, mengerjakan pekerjaan Dia, yang mengutus Aku…”, artina selama lit denga kesempatan geluh, la si sia-siaken geluhta tapi silakoken dahinta, berkarya ras erdahin ngelakoken si ngena ate Tuhan, dingen guna kemuliaan Tuhan alu makeken kepentaren si erpalasken malang man Tuhan gelah kai pe siidahiken Mamre jadi pasu-pasu man bana, jabuna bagepe jadi kemuliaan man gelar Tuhan.

SELAMAT BERKARYA,  TUHAN MEMBERKATI

 (Pdt. Jenny Eva Karosekali STh. M.Min)