BAHAN PA MORIA TGL 11 - 17 MEI 2014 RG. GBKP CENGKARENG

BAHAN PA MORIA TGL 11 - 17 MEI 2014

 RG. GBKP CENGKARENG

Ogen : KEJ. 49: 1-28                                      Tema :” NANDAI TALENTA IBAS ANGGOTA JABU”

Latar Belakang :

Penjelasen teks Ogen: Kejadin 49:1-28

Bagin teks enda nuriken kerna pedah Jakup si perpudina man anak-anakna, ipepulungna kerina anak-anakna jenari iturikenna kerna uga gaambaren kegeluhen anak-anakna ibas wari si reh pagi rikutken penandaina kerna biak ras karakter anakna sekalak-sekalak. Mulai ibas Ruben anakna si ntua she Benyamin anakna si nguda. Sada persada ituriken Jakub kerna kecibal geluh anak-anakna e, kai kelebihenna ipujikenna janah kai kekurangen/kelemahen  ras kesalahen anak-anakna  e pe ibukakenna alu jelas ras tangkas. Uga ukumen si isehken Jakub man Ruben, aminna gia ia anak sintua tapi labo ia jadi anak si pentingna man Jakup, erkiteken lagu-langkahna si la payo maka hak pasu-pasu si mbelinna si arusna isehken man bana selaku anak si ntua justru ibereken man Juda. Juda me ndatken pasu-pasu si mbelinna si jadi pemimpin nandangi senina-seninana, si ncikep tungkat kinirajaan ras kesusurenna erkuasa she ras lalap (Daud ras Jesus, Messias siijanjiken reh ibas  kesusuren Juda nari, bdk. ay. 8-10). Ijenda siidah Jakub selaku bapa si ngasup nandai biak/sifat bagepe karakter anak-anakna sada persada aminna gia nterem anakna, antara lain :

1.     Ruben, anakna si karakterna bagi lau si ergalun merawa, ertina melukah emosi.

2.     Simeon ras Lewi, karakterna mehantu, pernembeh dingen kejam, isumpahi Jakup biak mehantu ras pernembeh si lit ibas Simeon ras Lewi.

3.     Juda, igambarken Jakup karakterna desken singa, emaka ise pe labo pang ngalaken ia, kerina senina2na pe mungkuk man bana emaka ipasu-pasu Jakup Juda, aminna labo ia anak si ntua tapi kesusurenna me si ncikep tungkat kinirajaan dingen si erkuasa.

4.     Sebulon, ringan I tepi lawit ingan kapal ngadi-ngadi, jadi saudagar si daerahna mbelang she ku Sidon.

5.     Isakar, megegeh desken kelede, talentana ngasup ngidah taneh si mejile guna iusahaina janah mejingkat erdahin.

6.     Dan, biakna desken nipe i tepi pasar, ras nipe si erbisa i duru dalan, ngasup ngatur strategi guna nerang ras naluken musuh alu tanpa isadari lawanna, emaka jadi pemimpin bangsana.

7.     Gat, pang dingen pantang  menyerah, iserbu gerombolan perampok pe ayakina nge pengerampok e.

8.     Aser, perjuma ulung dingen sikap ibas ndahiken dahinna, ulih tanehna jadi pangan si ntabeh janah metunggung jadi pangan raja.

9.     Naptali, biakna desken belkih beru-beru si pulah-pulah, lincah ras mejingkat kujah-kujenda ras uga pagi ia ngaloken kesusuren si mejile.

10.  Jusup, desken batang kayu si turah duru ulu lau, dem ras simpar alu pasu-pasu, jadi pasu2 la ngenca man bangsana tapi pe bangsa si deban, si tetap isampati dingen ikawali Dibata.

11.   Benyamin, biakna desken serigala si merawa

Arah PA Moria enda ibabai Moria gelah megermet guna ngasup meteh ras nandai talenta si lit ibas diri anak-anakna sekalak-sekalak sebab melala nge kita orang tua enda labo sitandai ras siteh biak, karakter ras talenta si lit ibas anakta. Enda erkiteken kesibukenta selaku orang tua, kurang mediate kita nandangi perkembangen anak-anakta, bagepe kurang kedekatenta ras Tuhan bagepe ras anak2ta e sendiri.

Adi Jakup pe bage teremna anakna banci itandaina alu payo biak, karakter ras talenta si lit ibas anak-anakna sada persada, emaka itehna uga kegeluhen anak-anakna e pagi rikutken karakterna masing-masing, uga kelebihen ras kelemahen si lit ibas anak-anakna e pe berdampak kubas masa depan  geluhna masing-masing.  Jakub ngasup nandai anak-anakna alu payo ras meteh keberadaan masa depan kegeluhen anak-anakna erkiteken kerembakenna ras Dibata bagepe mediate ras megermet ia nandangi perkembangen geluh anak2anakna.

Ogen PA Moria enda mpersingeti Moria gelah nggit ertanggung jawab dingen mediate nandangi perkembangen anak-anakta, maka si tandai biakna, karakterna ras si teh talentana aminna gia sibuk ibas pendahinta masing-masing, sebab adi sitandai anakta la kita salah ibas mengarahken ras ngembangkenca. Banci radu ras kita merancang masa depanna sue ras minat, bakat/talenta ras sura-surana sue ka ras karakter ntah sifat/biak anakta e, jadi kita la jadi orang tua si otoriter, latih siakap memaksaken anakta e ras membentuk ia bagi sura-suranta sementara ia pe mesui atena erkiteken merasa terpaksa ras ipaksa orang tuana ndalani si la sue ras talentana piah la ia nggit nutusisa janah hasilna pe pasti labo maksimal ras sesuai ras arapenta.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)