BAHAN PA MORIA TGL 18-24 MEI 2014 RG GBKP CENGKARENG

BAHAN PA MORIA TGL 18-24 MEI 2014 RG GBKP CENGKARENG

Ogen : ROMA 16:1-16                                Tema: “SADA ARON MAKEKEN TALENTA ”

Penjelasen teks Ogen: Roma 16:1-16

Ibas teks ogenta enda ituriken ras ipetandaken Paulus man perpulungen Roma piga-piga kalak temanna sada aron si nggo nampati Paulus ibas ndahiken dahinna  meritaken Berita si Meriah, antara lain eme :

1.     Pebe, sekalak diaken I perpulungen Kenkerea, si nggo nampati Paulus bagepe nterem kalak pe nggo isampatina. Emaka iajuk Paulus gelah perpulungen Roma pe nggidu ras t ngaloken ras nampati Pebe ibas kai pe si iperlukenna.

2.     Persila ras Akuila, teman si seri pendahinna (seprofesi)  ras  Paulus,  eme erbahan tenda, si nggit ngasamken kesahna guna Paulus, nggo nampati perpulungen kalak si labo Jahudi janah nggit makeken rumahna jadi ingan kebaktin.

3.     Epenetus, kalak si pemenana tek man Kristus I Propinsi Asia.

4.     Maria, sekalak diberu ibas pelayanan Paulus si nggo latih erdahin guna perpulungen Roma.

5.     Andronikus ras Junias, teman Paulus sebangsa, radu ras kalak Jahudi siipenjaraken ras Paulus. Duana terberita selaku perintis ibas Meritaken Berita Si Meriah janah leben jadi kalak Kristen asangken Paulus.

6.     Ampliatus, Urbanus ras Stahis, teman sepelayanan Paulus si ikelengina.

7.     Apeles, si nggo ncidahken kesetiaannya man Kristus.

8.     Aristobulus, Herodian ras keluarga Narkisus teman ibas persadaanna ras Tuhan.

9.     Tripena, Triposa ras Persis si nggo latih erdahin guna dahin Tuhan.

10.  Rupus, kalak pilihen ibas dahin Tuhan si jadi teman sepelayanan Paulus ras nandena si erkeleng ate man Paulus.

11.  Asinkristus, Pelegon, Hermes, Petrobas, Hermas, Pilologus, Julia, Nerus, Olimpus ras kerina kalak si tek ras kalak enda.  Paulus nehken salam mejuah-juah ras pengataken bujur man kerina teman-temanna si nggo ras nehken pelayanan ras ndahiken dahin Kristus janah nampati Paulus.

Arah pengogenta enda siidah uga Paulus ngergaken kerina teman-temanna sada aron ibas dahin Tuhan, ngasup ia bekerjasama alu mehuli ras nterem kalak, nggit ngakui kelebihen ras talenta si lit ibas kalak si deban, ngakui ras ngergaken kalak si leben jadi Kristen asangken ia, ras ngakui kalak si deban selaku perintis ibas Meritaken Berita Si Meriah, ertina aminna gia Paulus nggo jadi Rasul si besar tapi labo ia ter-aku-aku, labo ia menonjolken diri tapi ngergaken kerina penampat siialokenna ibas kerina teman-temanna sepelayanen, labo iakapna lebihen ia ras pendahinna asang kalak si deban. Emaka arah bahan PA nta enda ibabai Moria guna ngasup ngusih sikap positif si lit ibas Paulus eme:

1.     Meteruk ukur, ngasup ngakui ras ngergaken talenta ras penampat kalak si deban ibas pendahin ras pelayanenna.

2.     Menjalin kerjasama si mehuli ras kerina kalak guna ndahiken dahin Kristus.

3.     La merasa tersaingi ( la cian atena)  ibas kelebihen kalak si deban, tapi ngasup makeken ras ngaloken potensi kalak si lit isekelewetna jadi teman sekerja.

4.     Ngasup mabai kalak si deban guna makeken ras mengembangken talenta / potensina  ikut muat bagin ibas dahin pelayanen Tuhan.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)