BAHAN PJJ 18-24 MEI 2014 RG GBKP CENGKARENG

BAHAN PJJ 18-24 MEI 2014 RG GBKP CENGKARENG 

OGEN : UL. 18:9-13                  Tema: “METENGETLAH NANDANGI SEKELEWETNDU  ”

Tujun: Gelah Ngawan ni perpulungen:

1.      Meteh perentah Dibata man bangsa Israel ngiani taneh Kanaan.

2.      Metenget ras ngelawan pinakit social, obat terlarang ras HIV-AIDS.

Latar Belakang :

Kitab Ulangen isina eme pidato perpisahen Musa ras bangsa Israel ras mpelimbarui perpadanen Tuhan ras bangsaNa guna mpersiapken bangsa Israel ope denga bengket ku taneh Kanaan. Tujun utama perdalanan bangsa Israel kenca ndarat i tanah Mesir nari eme ku tanah Kanaan.  Kalak Kanaan si nggo lebe tading i je berbeda kal agama ras kebiasaan ras bangsa Israel. Erkiteken sie me ope denga bangsa Israel bengket ku tanah Kanaan, tepatna tupung nggo seh  i dataran Moab, nggo ndeher ku tanah Kanaan, ngerana Musa man bangsa Israel. Bangsa Israel si seh ras tading i dataran Moab e,  eme angkatan simbaru, emaka perentah nggeluh badia ras mbiar man Tuhan harus ipeseh mulihi man bangsa e, gelah adi nggo bengket ras tading i tanah Kanaan ula min terkontaminasi nandangi perbahanan-perbahanan simbau, si lit i tanah Kanaan.

Penjelasen Teks Ogen: Ulangan 18:9-13

Ibas pidatona enda ipersingeti Musa bangsa Israel gelah metenget nandangi cara geluh ras kebiasaan geluh kalak Kanaan si perbegu (lenga nandai Dibata) gelah ola bangsa Israel ngikutken perbahanen-perbahanen si mbau ibas bangsa-bangsa si lit si tading i taneh Kanaan, temasuk carana  ersembah.  Piga-piga bentuk perbahanen si mbau siikataken Musa eme:

·        Mpersembahken anak ku bas api, guna  itutung ras ipersembahken man dewa. Tujun persembahen e me mindo man dewa alu maksa ntah pe mpengaruhi dewa gelah ikabulken dewa pemindonna.

·        Bagepe ibas rangka meteh sada-sada hal alu cara ertendung (nungkun man dukun/petenung/orang pintar), ngoge tanda-tanda (meramal nasib/ngoge retak tan), make  mangmang (mantra2), make guna-guna (ilmu hitam, jimat/benda2  gaib/mistis), nungkun man begu kalak singgo mate.

Kerina bentuk ras cara-cara geluh sibage rupana  la banci ipraktekken ras ilakoken bangsa Israel, sebab erlawanan ras cara ersembah man Tuhan. Adi bangsa Israel mprakteken kegeluhen sibage nembeh ate Tuhan janah eme alasen Dibata pe mpelawes bangsa-bangsa si lit ibas negeri e tupung bangsa Israel bengket ku je.

Musa ngerana ras mpersingeti bangsa Israel tujunna eme :

1). Gelah bangsa Israel tetap nggeluh ibas perpadananna ras Tuhan. I ja bangsa Israel tetap njadiken Tuhan jadi Tuhanna gelah pasu-pasu Tuhan pe tetap ras bangsa Israel. 2). Bangsa Israel harus nggeluh setia alu bulat ukur. Ola icampurkenna kiniteken man Tuhan ras kiniteken man dibata-dibata si deban (sinkritisme) sebab Dibata la nggit lit dibata-dibata si deban lain IA ngenca siisembah bangsaNa. Adi enda idalanken bangsa Israel sedekah i tanah Kanaan, maka bangsa Israel nggeluh mejuah-juah, enda me perpadanen Dibata ras bangsaNa si arus tetap iinget bangsa Israel.

Tema PJJnta : “Metengetlah nandangi sekelewetndu”. Adi arah ogenta enda bangsa Israel ipersingeti gelah metenget nandangi praktek kegeluhen ras cara ersembah bangsa-bangsa Kanaan si lit i sekelewetna adi nggo kari bengket ras tading i Kanaan. Kita pe arah bahan PJJnta enda ipersingeti selaku bangsa Tuhan ibas jaman enda gelah tetap nggeluh setia alu bulat ukur man Tuhan dingen metenget nandangi praktek2 geluh si la payo ras pinakit social si lit isekelewetta, mis: judi, prostitusi, narkoba ras tumbuh suburna pinakit HIV-AIDS i sekelewetta. Apaika tahun 2012 si lewat menurut data si lit, Tanah Karo termasuk kabupaten tertinggi ke dua ibas jumlah penderita HIV-AIDS. Pinakit sosial enda tumbuh subur ibas masyarakat, mekatep alu la sisadari lit ibas sekelewetta, janah penyebab rehna pinakit HIV/AIDS enda antara lain eme arah pemaken obat-obat terlarang,  make jarum suntik berganti-gantian bagepe erkiteken bage buena turah praktek prostitusi, rumah kitik2 rsd.

           Emaka selain metenget nandangi sekelewetta kita perlu njaga anggota keluarganta alu mpegegehi pendidikan anak ibas kiniteken, mbiar man Tuhan, bagepe nggeluh harmonis ibas jabu. Sebab  kai gia si lit isekelewetta, uga marakna gia adi  ngasup kita ras jabunta njaga geluh si setia man Tuhan maka la kita ikut ras terkontaminasi. Janah selaku anggota masyarakat pe kita harus tuhu-tuhu ikut berpartisipasi ngelawan pinakit sosial e gelah la  menyebar ras la ertambahna jumlah korban.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)