BAHAN PJJ 4 - 10 MEI 2014 RG. GBKP CENGKARENG

BAHAN PJJ 4 - 10 MEI 2014  RG. GBKP CENGKARENG

OGEN : Bilangen 28: 26-31       

Tema :”Kerja Rani Naksiken Ulih Kesangapen Man  Kalak si tek”

Penjelasen Teks Ogen : Bilangen 28 :26-31

Bagin teks ogen enda  nuriken kerna perintah Tuhan man bangsaNa, eme  gelah bangsa Israel ngerayaken wari raya Kerja Rani, janah ibas ngerayaken wari raya lit ketentunna, khususna ibas  mpersembahken persembahen.  Janah enda harus tetap irayaken bangsa Israel kenca ia bengket i taneh Kanaan, bagepe segedang-gedang geluhna.

Ibas  wari raya Kerja rani enda, isuruh Tuhan gelah bangsa Israel mbaba gandum simbaru iperani ku bas rumah persembahen/pertoton, janah i je ibahan kebaktin. Tujun erbahan kebaktin ras mpersembahken gandum enda eme ngataken bujur, sebab  bangsa Israel tek maka Tuhan tetap ncukupi kerina kebutuhen-kebutuhen bangsa Israel alu  masu-masu jumana.  Ibas kebaktin kerja rani enda bangsa Israel la banci erdahin, erkiteken wari raya e badia, emaka harus tuhu-tuhu ipebadiaken  alu ngerayakenca.  Ibas wari  raya enda, bangsa Israel la saja terjeng mereken persembahan pengataken bujur, tapi mpersembahken persembahen tutungen ras pengalemi dosa.  

Bentuk persembahenna eme: adi perpulungen harus ibabana lembu jantan muda, tapi adi sekalak pemimpin  eme kambing jantan. Selain persembahen enda lit ka persembahen sideban siitetapken Tuhan siharus ipersembahken bangsa Israel paksa pesta kerja Rani e eme buah gandum  ibas tepung nari icampur ras minak Zaitun, bagepe telu kilo ras tep-tep jenggi lembu, dua kilo ras bajar biri-biri. Janah sada kilo ras tep-tep anak biri-biri. Sifat persembahen enda eme sebage tambahan ibas persembahen tutungen, janah harus ilakoken tep-tep wari.  Bagem tanggung jawab kalak singaloken pemere Dibata isehken arah kitab Bilangen 28:26-31 si arus nehken persembahen kerja rani. Enda bagin ibas persembahen pengataken bujur sideban siarus ibahan bangsa Israel ibas kegeluhenna, ibas bangsa e nggejapken keleng ate, penemani ras pasu-pasu Tuhan. (Sebab : lit persembahen tep-tep wari (Bil. 28:1-8; persembahen wari sabat Bil. 28:9-10; Persembahen bulanen 28:11-15, persembahen tupung wari raya roti la eragi 28:16-25; Persembahen kerja rani 28:26-31; Persembahen tupung wari raya tahun simbaru 29:1-6; Persembahen tupung wari pengalemi dosa 29:7-11; persembahen tupung wari raya sapo-sapo 29:12-40). Aturen sinibahan enda jadi kearusen guna ncidahken ketutusen, kesetiaan (kwalitas) selaku anak Dibata.

Enda ibahan Tuhan gelah bangsa Israel patuh man Tuhan saja ras nggeluh ibas kebadiaan. Ibas kegeluhen sibage maka bangsa israel ndatken kejuah-juahen sedekah ia tading I tanah Kanaan, sebab lalap kegeluhenna ipasu-pasu Tuhan.

Arah bahan enda tole kita iajuk guna jadi anak-anak Tuhan ibas nehken tanggung jawab ibas nehken persembahen, salah sada bentukna eme Kerja Rani janah dasar nehkenca eme tetap ibas bentuk pengataken bujur man Dibata. Kerja Rani ipake gerejanta (GBKP) guna ngajuk warga GBKP ngataken bujur man Tuhan alu nehken ulih peranin (hasil usaha/pendahin) sienggo sialoken.  Pengakunta eme maka rejeki/penghasilen eme pemere Dibata, jadi  nggo sepatutna  sisehken ka tanggung jawabta nehken persembahen pengataken bujurta man Dibata si nggo masu-masu pendahinta ras mereken ulih peranin man banta.

Perlu sigejapken maka ibas ndalanken kerja rani :

1. Arus alu pusuh simeciho sebab perukuren simeciho turah ibas penggejapen  uga Dibata enggo masu-masu pendahinnta  emaka patut sisehken persembahenta labo alu palas untung rugi (hitung2an).
2. Ula siendesken persembahenta ibas bentuk kiniganjangen ukur, sebab kai si lit ibas kita e kerina pemereNa.
3. Lakoken alu meriah ukur labo alu jungut-jungut gelah persembahenta e la sia-sia tapi tole jadi pasu-pasu ras peturah dame bagepe keriahen.
4. Endesken siterbaik , erkiteken Dibata pe enggo ngendesken siterbaik man banta eme keselamatenta.
5. Persiapken alu mehuli. Ibas ngendesken siterbaik man Tuhan tentu perlu ipersiapken i rumah nari. Sitotoken man Dibata jenari sisehken persembahenta.
6. Tek maka persembahen e siendesken man Dibata. Ertina lanai man ukuren kuja persembahen e ipakeken.  Gereja makeken persembahen enda tentu siimani ras si amenken guna ndalanken tugas panggilen gereja.

Kerja Rani ibas gerejanta nggo  silakoken tep-tep tahun. Kerja Rani enda labo terjeng memenuhi kalender kerja GBKP, tapi arah gereja kita ipersingeti kerna pemere ras pasu-pasu Tuhan singgo seh man banta. Kebaktin ras persembahen kerja rani eme salah sada respon kinitekenta ibas nggejapken pemere Dibata. Kita banci erbahan kerja Rani erkiteken simpar pasu-pasu Tuhan man banta, subuk kita siperjuma, bagepe kita sierdahin I kantor ras ibas profesi sideban. Emaka situhuna ibas kita ngelakoken Kerja Rani, I je lit sada kesaksin kerna kesangapen, sebab sibaba alu ukur meriah. Mari sicidahken kwalitas kinitekenta alu nehken ulih peraninta man DIbata alu payo ras pusuh simeciho si dem pengataken bujur.

SELAMAT NEHKEN  PERSEMBAHEN Kerja Rani 2014, Mehamatlah man Tuhan, berekenlah si mehulina ras asa patutna man Tuhan si nggo masu-masu kita.

 (Pdt. Jenny Eva Karosekali STh. M.Min)