BAHAN PA MORIA TGL 04 - 10 MEI 2014 RG. GBKP CENGKARENG

BAHAN PA MORIA TGL 04 - 10 MEI 2014

 RG. GBKP CENGKARENG

Ogen : Perb. 3: 1-10                                                             Tema : TANDAI TALENTANDU

Latar Belakang :

Kenca nusurna Kesah Si Badia reh teremna kalak si tek man Tuhan Yesus janah ajar-ajar pe lanai biar-biaren ersaksi ras meritaken kerna Kristus, tapi reh pang-na ngajar  ras meritaken berita kerna Kristus.

Penjelasen teks Ogen: Perb 3:1-10

Bagin teks enda nuriken kerna uga Rasul Petrus ras Johanes berkat ku Rumah Pertoton, janah ibas pintun gerbang Rumah Pertoton jumpa ia ras sekalak si pangpangen si dahinna jadi “pemindo-mindo”ngarapken perkuah ate kalak sir eh ku Rumah Pertoton e. Piga-piga point penting si idah ijenda, eme :

1.     Mekuah ate Petrus tupung kalak si pangpangen e mindo perkuah atena, tapi iteh Petrus kai si la lit ras kai si lit ibas ia, itandaina dirina ras itandaina karunia (talenta) si lit ibas ia,  emaka nina Petrus : “….la lit duit ibas aku, tapi kai si lit ibas aku kubereken man bandu, Ibas gelar Jesus Kristus … kukataken man bandu, dalankenlah ! Petrus meteh kuasa ras talenta si lit ibas ia si banci ipakekenna guna nampati ras mulahi kalak si pangpangen e ibas kiniseran ras perbebenna nari. Petrus la ngenca ermekuah ate, tapi tanda mekuah atena ilakokenna “aksi” (do something) alu talenta si lit ibas ia.

2.     Kai siipindo kalak pangpangen e lalit ibas Petrus, tapi justru kai si ibereken ras ilakoken Petrus man bana lebih asa siipindona. Kai siibereken Petrus la ngenca mereken solusi/ jalan keluar si sementara tapi justru tuhu-tuhu mereken pembebasan man kalak si pangpangen enda, sebab nggo malem dingen sehat ia, lanai ia tergantung ras menggantungkan hidup man kalak si deban. Petrus meteh kai situhuna si lebih iperlukenna.

3.     Kai siipindo kalak si pampangen enda memang la sue ras kai siialokenna. Ibas gelar Tuhan Yesus malem ia ibas penakitna, pulah ia ibas kiniseranna. Mekatep kita pe ibas kegeluhen enda la sialoken kai siipindoken ras siisuraken kita, tapi tek lah kita maka Tuhan lebih meteh kai siiperluken kita, bagi Petrus ijenda ndai.

4.     Erkiteken penampat Petrus malem penakit kalak si pampangen enda ndai emaka respon kalak enda ndai lompat-lompat ia, erdalan ia ku Rumah Pertoton, ersaksi ia dingen ipujina Tuhan seh maka kalak si nterem si ngidah kejadin e pe ipujina ka Tuhan. Petrus ras Johanes meteh ras nandai talenta si lit ibas ia, ipakekenna alu mehuli janah alu tepat sasaran seh maka arah talentana e tersampat dingen pulah kalak, bagepe terpuji dingen ipermuliaken kalak Tuhan.

5.     Arah PA Moria enda ibabai Moria gelah megermet guna ngasup meteh ras nandai talenta si lit ibas dirina sekalak-sekalak sebab Dibata nngo mereken pemerena si pelain-lain man banta sekalak-sekalak, kerina manusia nggo ibereken Dibata karunia, kelebihan ras talenta si banci sipakeken, sikembangken la ngenca guna dirinta, tapi pe guna nampati kalak si deban bagepe arah si e terpuji ka Tuhan. Sue ras tema program tahun enda peningkaten kuantitas SDM yang berkualitas, Moria iajuk guna menyadari kengasupen si lit ibas dirina, nggit nggargari tole talenta-talenta kai deba si lit ibas ia janah pang ncidahkenca ras makekenca guna mbangun perpulungen ras gereja Tuhan. Reh belinna rasa percaya diri turah ibas Moria arah meteh ras nandai talentana, janah lanai lit si minder (kurang percaya diri) ras muniken talentana.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)