PA MAMRE TGL 04 – 10 MEI 2014 RG. GBKP CENGKARENG

PA MAMRE TGL 4 – 10 MEI 2014

 RG. GBKP CENGKARENG

Ogen :  2 Tes. 3:1-12                      Tema: “Totoken si idahikendu, dahiken si itotokenndu”                                     

Tujun : Gelah Mamre notoken dahin si idahikenna ras ndahiken si itotokenna.

Latar Belakang : Surat Paulus sipeduaken man perpulungen Tesalonika enda isuratken Paulus guna njawab persoalen si turah ibas perpulungen  eme kerna konsep kerehen Kristus si peduakaliken, lit deba ngataken maka  paksa kerehen Kristus si pedua kaliken e nggo seh, erkiteken si e maka lit deba  iakapna lanai perlu erdahin sebab lanai lit gunana, cukup ertoto saja, focus nandangi kerehen Kristus peduakaliken . Paulus mereken penjelasan alu ngataken maka ope denga Kristus reh mulihken kejahaten ras kekejaman la banci lang seh ibas puncakna, emaka iajuk Paulus perpulungen si ngoge suratna e gelah tetap paguh ibas kiniteken aminna gia reh kiniseran, janah tetap erdahin ncariken keperlun geluh sekalak-sekalak ras tetap tutus erbahan si mehuli bagi kai si ilakoken Paulus ras teman-temanna sada dahin.

Point-Point Penting & Garis Besar  2 Tes. 3: 1-12:

1.   Ay. 1-5 : Paulus mindo dukungen doa ibas perpulungen Tesalonika gelah ngasup ndahiken dahin pelayanenna sebab melala tantangan siialaken Paulus ibas Meritaken kerna Berita Si Meriah. Mbelin pengarapen Paulus pe Tuhan tetap ngkawali dingen negu-negu perpulungen e gelah tetap megenggeng, ngkelengi Dibata ras ndalanken kai si nggo iajarken Paullus. Teridah ijenda uga Paulus ngajuk perpulungenna gelah tutus ertoto kerna ia ras pelayanenna bagepe ia tetap ka ertoto guna perpulungen e gelah tetap ikawali Tuhan. Ertina ijenda siidah uga kalak si tek ibas persadaanna tetap arus sitoto-totonken maka radu megegeh. La ngenca tanggung jawab serayan Tuhan notoken perpulungen tapi pe perpulungen pe wajib tetap notoken serayan Tuhan gelah megegeh ras ngasup ndahiken dahinna alu mehuli aminna gia lit tantangen.

2.   Ay. 6-10 : Paulus ngajuk perpulungen gelah nirangken kerina kalak si perkisat si lit I tengah-tengah perpulungen e, si la nggit ngikutken pengajaren si ibereken Paulus. Paulus mpersingeti perpulungen gelah nggit ngusih kai si nggo ibahanna, uga ia erdahin alu latih, suari ras berngi, la iberatina perpulungen e tapi mejingkat ia ndahiken dahinna gelah jadi usihen si mehuli man perpulungen e. Paulus melurusken pemahamen si salah si turah bas perpulungen Tesalonika kerna piga-piga kalak si mekisat janah lanai nggit erdahin erkiteken pemahamenna si keliru kerna kerehen Kristus peduakaliken. Kalak si tek arus tetap nehken tanggung jawab geluhna ibas doni enda, labo cukup ertoto saja ngenca tapi pe tetap ituntut tutus erdahin sebagai salah sada tanggung jawab kiniteken man Tuhan sedekah nggeluh I doni enda. Labo berarti adi tutus ateta erdahin, kita mengutamaken hal-hal doni enda ngenca. Emaka menurut Paulus kegeluhen kalak si tek i doni enda la banci setengah-setengah ngenca si dalani, tapi arus tutus ibas kerina dampar kegeluhen, tutus ertoto tapi pe tutus erdahin sebab bage me arusna kegeluhen kalak si erkiniteken man Tuhan, emaka secara tegas Paulus ngataken maka kalak si la nggit erdahin ola bere man (ay. 10), kai siikataken Paulus enda eme konsekuensi etis man kalak si perkisat sebab kalak si malas (perkisat) labo dat pasu-pasu tapi lumben dingen musil me ia (bdk. Kuan2  13:4; 14: 23; 18:9)

Tema : Totoken si idahikendu, dahiken si itotokenndu

Paulus  tek maka pertoton  erbahanca pendahinna banci berhasil, emaka iajukna perpulungen guna notoken pelayanenna gelah Kata Tuhan siiberitakenna pedas reh mbarna dingen ialoken jelma si nterem. Pertoton pe jadi gegeh Paulus ibas ndahiken dahinna emaka lit gia tantangen siialakenna ibas ndahiken dahinna la perna ia surut dingen mundur  sebab tek ia maka Tuhan pasti mulahi ia ibas kalak si jahat  janah pertoton erbahanca ia megegeh ras ngasup ngalaken kerina tantangan e.

Kalak si tek  labo banci terpisah kegeluhenna ibas pertoton nari. Johanes Calvin ngataken maka : Doa adalah nafas hidup orang percaya, ertina ibas kai pe siilakokenna kalak si tek tetap nge njadiken pertoton jadi palasna termasuk ibas pendahin ras kai pe siidahikenna. Tanda- tanda kegeluhen kalak si tek la cukup tutus ertoto tapi pe tutus ibas kerina dampar geluhna, tutus ibas erdahin ras kai pe siidahikenna. Janah sue ras tema PA Mamre enda kerina Mamre pe ituntut gelah katawari pe tutus ertoto dingen tutus erdahin, ertoto kerna kai siidahikenna ras ndahiken kai siidahikenna sebab adi salah sada ngenca ilakoken labo banci erdalan alu mehuli dingen labo sempurna dingen kuh.

SELAMAT BEKERJA  & BERDOA,  TUHAN MEMBERKATI

 (Pdt. Jenny Eva Karosekali STh. M.Min)