BAHAN PA MAMRE TGL 15 -21 JUNI 2014 RG GBKP CENGKARENG

BAHAN PA MAMRE TGL 15 -21 JUNI  2014 RG GBKP CENGKARENG

Ogen : Kel. 20: 8-10                                                         Tema : Pebadiakenlah Wari Sabat

Point-point penting & Garis Besar : Kel. 20:8-10

1.      Ibas tradisi kalak Jahudi, wari Sabat merupakan salah sada tanda perjanjin ras Dibata sebab enda perentah : “Pebadiakenlah wari Sabat” eme bagin ibas 10perentah/pedah Dibata man bangsaNa.  Wari Sabat itetapken jadi waktu si khusus guna ngelakoken penembahen man Dibata.  Janah enda me si  membedakan bangsa Israel selaku umat/bangsa Tuhan ras bangsa-bangsa  si debanna. Seh  ibas paksa enda,  kalak Jahudi tetap denga mpebadiaken dingen mengkhususken wari Sabat ersembah i  Synagoge (ingan ersembah kalak Jahudi) bagi kai siilakoken Jesus (bdk. Luk. 4:16) bagpe Rasul-rasul ibas padan si mbaru. Sue ras UU kalak Jahudi maka ibas wari Sabat  la banci erdahin ras  ngelakoken kai pe, termasuk pegara api (erdakan) ntah pe ngelakoken perdalanen si ndauh bagi si semal ilakokenna ibas wari-wari si debanna.  Tapi Wari Sabat imaksudken gelah bangsa e banci pulung ras isi jabu reh ku Rumah Pertoton  ersembah man Tuhan dem alu keriahen ras radu ras ngataken bujur (bersukacita) janah ibas paksa pulung e ipakeken guna  ngogeken bagin ibas Kitab Taurat ras mendiskusikenca bagepe mengevaluasi kerina kegeluhenna ras perbahenna sedekah 6 wari erpalasken UU/ Taurat Tuhan.     

2.      Ibas wari Sabat,  kalak si tek iajuk guna makeken  lebih  mbue waktuna guna ersembah ras ersukuten ras Dibata, mengkhususken wari e jadi wari Tuhan alu memusatkan perhatian ras penembahennta man Tuhan subuk ibas pusuh bagepe ibas perukuren.  Ibas wari Sabat ije me kesempaten kita mbangun persadaan ras Tuhan i tengah-tengah persadanta ras kerina kalak si tek alu radu ras ersembah  bas Rumah Pertoton Tuhan, radu ras ngoge Pustaka Si Badia, ndengkehken Kata Dibata, ras muat bagin ibas pertoton ras ende-nden pujin  si mereken gegeh man kiniteken ras  mereken ketenangen man pertendinta i tengah-tengah kesibuken ras kelatihennta  ndahiken tugas, pendahinta  sedekah sada  minggu si nggo sibentasi.

3.      Menguduskan/mpebadiaken wari Sabat ertina kita nembah man Dibata si njadiken langit ras doni ras kerina  isina.  Dibata nepa doni enda ras kerina isina ibas 6 wari  janah ibas wari sipepituken, ngadi Ia dingen ipebadiakenNa kerina kai si nggo itepaNa.  Dibata pe ngadi ibas waktuna, labo erkiteken latihNa sebab Dibata labo pernah latih, tapi erkiteken keriahenNa ngidah kerina si nggo ijadikenNa,  ermeriah ukur ibas keajaiban si la terhitung buena si teridah arah kerina tinepaNa janah iidah Tuhan maka kerina e mehuli emaka ipebadiakenNa. Enda me sebabna maka isubadiaken wari Sabat. Manusia pe iperintahkenNa arus erdahin enem wari ras ngadi dingen istirahat ibas wari sipepituken, mpebadiakenca ras ngataken bujur  nandangi pasu-pasu Tuhan ibas setiap kai si nggo sidahiken. Tapi situhuna ;a ngenca ibas wari  Minggu saja kita ersembah ras ngataken bujur man Tuhan, tapi sangat layak bagi kita guna muji Tuhan  tiap-tiap wari sebab keleng ate Dibata ras pasu2Na e pe teptep wari isehkenNa man banta. Tapi khususnya ibas wari Minggu ituntut Dibata kita guna nginget ras nembah man baNa radu ras reh ku Rumah Pertoton Tuhan guna nggejapken ras ngataken bujur ibas keleng ateNa si nggo sialoken  ibas kerina dampar geluh ras pendahinta.

4.      Adi nai kalak Jahudi mpebadiaken Sabat (Jumat karaben jam 18 seh Sabtu karaben), gundari kalak Kristen ngerayaken Sabat ras ersembah i Rumah Pertoton ibas wari Minggu erkiteken wari Minggu eme wari kekeken Tuhan Yesus janah enda me siirayaken sebagai wari kemenangen man kerina kalak si tek. Uga kalak Kristen mpebadiaken wari Sabat/Minggu? Banci nge kita erdahin ibas wari Minggu adi wari Sabat e ikataken wari istirahat ras wari ersembah man Tuhan? Wari Minggu labo utamana  berarti waktuna istirahat/ngadi/pekesahken (ije ka pake kalak gawah2, refreshing, ngkawil) tetapi siutamana eme guna  muji Tuhan. Wari Sabat eme wari khusus guna Tuhan jadi labo sipake guna kesenangenta. Tapi labo ka berarti wari Minggu e erkai pe kita la banci ngelakoken kai pe selain ersembah man Tuhan tapi ibas nehken dahin-dahin kekelengen tetap nge arus ilakoken bicara wari Minggu ntah wari kai gia, sebab Jesus nggo mpelimbarui pemahamen kerna wari Sabat,  maka dahin kekelengen labo banci ngadi erkiteken aturen Sabat.

 5.      Ersembah man Tuhan/ menghadiri ibadah ras erbage-bage persekutuan rohani        (PA, rsd) merupakan hak istimewa ras sada anugerah man kalak si tek sebab              arah si e kita banci mengalami perjumpaan ras Tuhan. Tapi, man kalak si tek                labo cukup wari Minggu ntah wari2 tertentu ngenca megiken Kata Dibata ras          ngaloken nakan pertendin tapi arusna setiap wari perlu ngoge Kata Dibata                secara pribadi gelah kiniteken, pengarapen ras kekelengen si lit ibas kita tetap          turah dingen erbuah. Wari Minggu ras waktu2 PJJ ras PA mereken kesempatan           man banta selaku persekutuan gereja Tuhan  guna mbangun kiniersadaanta            radu ras majekken kula Kristus ras menikmati kiniersadaanta.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)