BAHAN PA MORIA TGL 15 -21 JUNI 2014 RG GBKP CENGKARENG

BAHAN PA MORIA TGL 15 -21 JUNI  2014 RG GBKP CENGKARENG

Ogen : KUAN2 31: 24-28          Tema: Cerdik Ngelitken Ras Makeken Perbeliten Jabu

Penjelasen teks Ogen: Kuan2 31:24-28

Perikop enda nuriken kerna sisi mulia sekalak ndehara. Kitab Kuan2 enda ncidahken 2 hal, eme:

1.      Hikmat/ kepentaren la ngenca lit ibas diberu. Hikmat eme pemere Dibata man kerina anak kalak. Dilaki ras diberu bali iadep-adepen Tuhan.

2.      Ndehara si cerdik ijenda eme ndehara si menyadari penuh pendilo Dibata ibas geluhna emaka guna me-respon positif pendilo Tuhan e, idalankenna peranna la ngenca selaku pendamping man perbulangenna, sekaligus pengelola rumah tangga she maka ngasup ia ningkatken ekonomi jabuna alu makeken kerina talenta/potensi dirina.

Perikop enda nuriken maka Peran ndehara la sederhana, adi sekalak ndehara ngasup menempatkan dirina selaku ndehara si cerdik/bijak, maka mbelin kal pengaruhna subuk man keluargana bagepe masyarakat. Ndehara si cerdik penalemen perbulangenna, emaka idaman kerina perbulangen nge adi bijak/pentar ndeharana. Peran ndehara ibas jabu labo kalah penting sebab ndehara eme nande ibas jabu, tiang tinande man kerina isi jabu. Adi sikap dingen paguh tiang ingan jabu e tertande tentu njamini maka sikap jabuna.

Piga-piga gambaren si icidahken ndai ibas ogenta enda kerna ndehara si cerdik eme :

ayat 24, 27: Ndehara si bijak la nggit bermalas-malasen, tapi aktif/mejingkat erdahin guna nampati peningkatan ekonomi jabu. La ia nggit berpangku tangan, tapi bekerja keras alu makeken talenta si lit ibas ia guna nambahi penghasilan jabu.

ayat 25 : pentar ngerencanaken masa depan jabu alu erbahan planning si mantap janah e erbahanca ia tegar, penuh harapan menatap hari esok la aru atena kerna wari si pepagi.

ayat 26-28 : bagin enda pe seh kal perluna jadi perhatinnta selaku nande/Moria, maka sekalak ndehara si bijak ijagana pengeranana, manjar-anjar ngerana janah dem alu kepentaren. Sedekah enda diberu identik kal pet ngerana, mekatep anak-anakta protes janah nggambarken pernanden e “cerewet”, diberu percikurak, rsd. Tapi ijenda ipersingeti alu tegas maka sekalak ndehara si bijak la nggit asal ngerana ras makeken dilahna alu la alu kepentaren, contohna: bergosip, menghina, memarahi anak-anak,suami dan orang yang ada disekitarnya tapi manjar-anjar ia ngerana janah alu dem kepentaren. Alu kata si deban mereken pengajaran alu dem keleng ate, lemah lembut ibas ndidik anak-anak, alu hikmat/bijak menegur perbulangenna aminna gia salah pe.

Erkiteken si e anak-anakna ngataken bujur man bana dingen perbulangenna pe mujiken ia.

Tema : Cerdik ngelitken Ras Makeken Perbeliten Jabu

Arah teks ogen ras tema enda  mabai Moria gelah bijak ibas perbahanen ras perukuren she maka ngasup ngaturken perbeliten jabu, la ngenca pentar ibas makeken tapi pe pentar ka ibas ngelitkenca alu makeken talenta/potensi si lit ibas ia. La ia jadi perongrong man perbulangenna tapi ngasup jadi penolong ibas nampati perbulangen ncukupken keperlun geluh kerina isi jabuna. Emaka gia ibas situasi si sulit tetap ia ngasup ermeriah ukur ibas geluhna. Sienda pe jadi pelajaren man Moria i bas ngaturken perbeliten ibas jabu : asakai pe situhuna bias/cukup nge sebab asakai ka pe banci kange lalap kurang, tergantung uga kita  selaku nande pentar ibas management keuangen/perduiten ibas jabu. Adi siukuri jamanta gundari mekatep pernanden mengeluh kerna keberadaan ekonomi ibas jabu.  Lalap nge siakap kurang ibas kecibalta. Arah teks enda ibabai kita Moria maka ndehara si cerdik labo jungut-jungut ras mengeluh, tapi justru erbintuas, mejingkat ras berupaya guna mpekena ras nampati ekonomi jabu alu makeken talentana si banci menghasilkan. Janah lebih asa si e iarapken kita jadi kalak pentar ibas mengelola kai siibereken Dibata man banta, mulai ibas proses kita ndatkensa seh pe kenca sialoken ulih pendahinta e.

Ibas pengelolaan perbelitan jabu arus ngenda  kita pentar/ berhikmat. Kecenderungen nggeluh materialis, konsumtif enda jadi tantangen ibas perkembangen jaman enda, terlebih si mbuena sifat materialistis ras konsumtif enda lit ibas pernanden. Perlu kita nerapken kegeluhen sederhana ras pentar ngaturken pemere Tuhan subuk guna dirinta bagepe masa depan jabunta seh banci tetap malem ateta janah la aru ateta.

Erbage kebutuhen ibas jaman enda, reh tambahna reh dekahna. Siniarapken maka kita labo nggeluh ikut-ikuten sebab kita arus lit perencanaan guna kiniulin kegeluhenta. Mpersiapken masa depan jabu tentu mahan bana kita jadi kalak sipentar. Sieteh apai kebutuhen pokok, sekunder entah tertier. Segelah ula ka matanta jadi penggurunta, kepuasenta ateta sibaba : ingetlah labo pernah erbias-bias siakap ibas kegeluhen enda, sipasti ula ka “lebih besar pasak dari pada tiang”.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)