BAHAN PJJ 15-21 JUNI 2014 RG GBKP CENGKARENG

BAHAN PJJ 15-21 JUNI 2014 RG GBKP CENGKARENG 

OGEN : JEREMIA 7:1-7                  Tema: “Nggeluh i tengah Jelma si Nterem  ”

Tujun: Gelah Ngawan ni perpulungen:

1.      Meteh kecibal Nabi Jeremia I tengah-tengah bangsa Israel.

2.      Ngasup ncibalken dirina bagi si ngena ate Dibata I tengah-tengah masyarakat.

Latar Belakang :

Jeremia ngaloken tugas pengutusan ibas Dibata nari ibas tahun 626, eme ibas tahun pe-13 ken pemerintahan raja Yosia. Ia sekalak si alus penggejapenna janah keleng kal atena bangsana emaka la kal atena ernubuat kerna ukumen bangsana. Jeremia sekalak kesusuren Imam i Anatot nari. Ndekah kal Jeremia erdahin selaku nabi, dingen kidekah e tetap ipersingetina bangsana kerna cilaka si atena ngkenai bangsana erkiteken bangsa e nggo erdosa nembah man berhala. Nubuat e jadi sanga Jeremia nggeluh denga, emaka iidahna nge uga Nebukadnezar, Raja Babel naluken kota Yerusalem ras ngeruntuhken Rumah Pertoton, raja Juda ras sada bagin rakyatna iangkut ku Babel (597 SM). Iidahna  pembrontakan si ilakoken bangsa Juda ibas tahun 587, tapi pemberontaken e banci ipadamken  tentara Kasdim. Kota Jerusalem iruntuhken dingen Rumah Pertoton itutung janah penduduk negeri e iangkut jadi tabanen sipedua kaliken, janah 70 tahun dekahna bangsa enda itaban ibas pembuangen I Babel.

I tengah-tengah permasalahan politik,ras kegeluhen keagamaan si la payo ibas bangsana e me Jeremia erkhotbah, nuriken nubuatkan kerna ukumen ras kehancuran bangsana.

Berita siipeseh Jeremia man bangsana sangat tajam, tapi tujunna eme gelah bangsana jera dingen bertobat sebab keleng kal atena man bangsana. Tapi justru erkiteken berita siipesehna nembeh kal ate bangsana ras pemimpin-pemimpin bangsa Juda man bana seh berusaha nangkap dingen menjarakensa erkiteken pang ia ngerana kerna ukumen si nandangi reh man bangsana.

Penjelasen Teks Ogen: Jeremia 7:1-7

Secara khusus teks ogen Jer. 7:1-7 ngerana kerna uga nabi Jeremia nuriken kerna kebrobokan geluh keagamaan bangsa Israel, Ia mengkritisi praktek kemunafikan ibas kegeluhen kiniteken bangsana, si reh ersembah ku Rumah Pertoton tapi terjeng rutinitas ras sekedar upacara ceremonial saja, la rikut ras lagu langkah /perbahanenna si ncidahken kualitas kiniteken. Iakapna adi nggo ersembah ku Rumah Pertoton nggo pasti terkelin sebab ibegikenna ras tek ia nandangi ranan nabi-nabi palsu (ay.1-4).

Ay. 5-7 : Jeremia nuruh bangsana guna ngubah lagu langkahna. Kai saja si man ubahen, eme :

1.      Olanai ndehken kalak asing, anak melumang ras diberu balu-balu. Ertina sedekah enda aminna gia bangsana rajin ersembah ku Rumah Pertoton tapi tetap ka nge labo lit kekelengen ibassa tapi justru menindas kalak si lemah.

2.      Olanai ngamburken dareh kalak si la ersalah. Enda ncidahken uga ke-la-adilen ras kelabujuren terjadi i tengah-tengah bangsa Juda. Si salah jadi benar. Janah si la ersalah isalahken, ras ikorbanken.

3.      Olanai nembah man dibata-dibata si deban sebab enda ncedai kegeluhen kiniteken bangsa enda.

Emaka iajuk Jeremia bangsana gelah jera dingen robah bagepe ngelakoken si bujur sapih-sapih ia sebab adi bage perbahanenna maka janji Dibata man bangsaNa: IpediatNa bangsa e tetap ringan ibas negeri si si nggo iberekenNa rasa lalap seh rasa lalap.

Tema PJJnta : “Nggeluh I tengah jelma sinterem”.

Lit istilah : “orang jujur mati terbujur”,  ntah pe istilah “jaman ini jaman edan, jadi jika tidak ikut-ikutan edan tidak akan kebagian”. Istilah enda mabai nterem kalak dungna lanai nggit ngelakoken hal si jujur adi sekelewetna lanai lit kejujuren ras kebujuren sebab justru adi ia nari ngenca si jujur ije, justru banci meneken ia.  Emaka la mengheranken adi mental masyarakatta  genduari : korupsi pe berjemaah, alu kata si deban salah pe adi nterem nge ngelakokenca nggo iakap biasa saja.  Lanai piga kalak nggit “tampil beda” ntah nggeluh benar adi sekelewetna e merajalela ke labenaren. Emaka nterem kalak ikut-ikutan edan ntah pe “hanyut”/ ikut arus gelah cari selamat.

Nabi Jeremia idilo Tuhan jadi nabi I tengah-tengah situasi kegeluhen bangsana si la payo, nggeluh ibas kelaadilan, kelabujuren dingen nembah berhala tapi Jeremia tetap ngasup ncibalken dirina tetap nggeluh bagi si ngena ate Dibata dingen pang ia nuriken kerna kebenaren Dibata, pang ia mpersingeti bangsana ras pemimpin-pemimpin bangsana kerna ukumen Dibata adi  bangsa e la robah dingen jera aminna gia resikona imusuhi bangsana ia, nembeh ate bangsana man bana dingen itangkap ras ipenjaraken bahkan nyawa pe jadi taruhenna.

Bahan PJJnta enda mabai kita gelah ngasup jadi Jeremia jaman enda si pang nuriken kebenaren, pang kita  mpersingeti teman/kalak si deban ibas si la benar siilakokenna, adi lepak perdalanna, pang kita nuriangi kerina perbahanen si la mehuli, pang kita ngataken salah man kalak si salah sebab bage me arusna silakoken selaku kalak si erkiniteken man Dibata, selaku kalak si nggo ipilih Dibata sebab adi la kita pang maka man banta ipindo Dibata pertanggung jawaben (baca: Esekiel 33:8-9).

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)