BAHAN PA MAMRE TGL 1-8 JUNI 2014 RG GBKP CENGKARENG

BAHAN PA MAMRE TGL 1-8 JUNI 2014 RG GBKP CENGKARENG

Ogen : Masm. 1:1-6                                                       Tema: “EERTA SI MEHERGANA”

Tujun : Mamre njadiken Pustaka Si Badia jadi nakan pertendinna.

Penjelasen teks Ogen: MASMUR 1:1-6

1.      Mazmur enda banci sigolongkan mazmur kepentaren, erkiteken mazmur enda ncidahken kerna perbahanen ras ulihna. Janah enda situhuna singgeluh ibas kegeluhen manusia. Pemazmur alu terang ncidahken maka lit 2 kelompok manusia eme:

-          kelompok situtus ras erkemalangen man Tuhan, janah kelompok enda ndatken kemalemen ate.

-          kelompok si la patuh ibas ndalanken peraten Tuhan, emaka datkenna penghukumen ibas Tuhan nari. Enda merupaken gaya ngerana kalak Ibrani. Kalak Ibrani (Isreal) rusur ngerana kerna kegeluhen moral ras perbahanen, janah standart moral kalak Ibrani eme taurat ras ndalanken UU Tuhan.

2.      Pemazmur ncidahken kemalemen ate ras keriahen man kalak Israel la itentuken erta ras materi, tapi itentuken arah ngikutken/ndalanken peraten Dibata. Sebab ibas ngikutken/ndalanken peraten Dibata manusia ngaloken pasu-pasu idur Dibata nari, termasuk erta ras materi. Jadi erta ras materi merupaken sada akibat ibas ndalanken peraten Tuhan. Erkiteken sie me sada kata persinget pemazmur nandangi bangsa Israel eme ula megiken pedah kalak jahat ras ula ngusih perbahanen kalak perdosa ras ula erteman ras kalak simegombang man Dibata. . Tapi siharus idalanken  eme matuhi undang-undang Tuhan ras ngukurisa suari ras berngi. Kalak jahat, kalak perdosa ras simegombang man Dibata eme seri i lebe-lebe Dibata eme kalak sipatut datken hukkumen ibas Dibata nari, sebab kalak sibagenda jadi imbang Tuhan, janah la lit kemalemen ate ras keriahen man kalak jahat ras  perdosa.

    

3.      Undang-undang Tuhan merupaken sada palas man bangsa Israel simerupaken bangsa Tuhan. Ate Pemazmur gelah bangsa Israel la terkontaminasi ibas perbahanen-perbahanen si la mehuli si la merupaken karakter bangsa Tuhan. Erkiteken sie undang-undang sajalah siharus jadi bagin ibas kegeluhen bangsa Israel. Emaka ise si matuhi undang-undang Tuhan ras ngukurisa suari ras berngi man bana isehken pasu-pasu Tuhan.

4.      Ibas litna kepatuhan nandangi undang-undang Tuhan janah ngukurisa suari ras berngi, maka bangsa israel terhindar ibas penghukuman Tuhan nari.  Bagepe ate pemazmur gelah bangsa Israel nggeluh ibas kepatuhen man Dibata. Pengajaren uga patuh man Dibata lit ibas undang-undang Tuhan (taurat). Undang-undang Tuhan ngajarken uga seharus jadi bangsaNa. Emaka penting man bangsa Israel la saja maatuhi  undang-undang Tuhan tapi pe ngukurisa suari ras berngi. Ibas kata sideban lit min “perenungen siterus menerus” ibas kegeluhen bangsa israel emaka itehna kai sura-sura Tuhan ibas kegeluhenna tep-tep wari. Jadi kalak si banci ndatken kemalemen ate adi lit bas ia keriahen ibas matuhi ras ngukurisa suari ras berngi.

5.      Pemazmur “nggambarken” kemalemen ate ntah pe  ulih ibas kalak simatuhi undang-undang Tuhan ras ngukurisa suari ras berngi eme  : “Ia seri ras batang kayu si turah i tepi lau anak erbuah i bas paksana, dingen bulungna pe la melus. Sangap ia i bas kerina pendahinna”. Guna meteh enda kita harus meteh kerna latar belakang ntah pe situasi i Palestina. Iklim Palestina eme melas ras kerah. Janah lit memang ingan tertentu si lit launa. Emaka adi lit tanaman i deher lau e tetap ia erbuah janah la mate, sebab akar tanaman e ersada ras lau e. Lau e me simereken kegeluhen man tanaman e. Emaka erbuah ia ibas paksana. Jadi ise simatuhi undang-undang Tuhan ras ngukurisa suari ras berngi ndatken kegeluhen. Tapi ise sindauh ras kegeluhen e eme Tuhan maka  siidatkenna eme penghukumen ntah pe kematen.

APLIKASI

Sukat-sukat kemalemen ate ras keriahen ibas kegeluhen kalak si tek menurut pemasmur eme : si la nggit megiken, ngusih perbahanen kalak jahat tapi matuhi UU Tuhan dingen ngukuri Kata Dibata suari ras berngi. Ertina njadiken Kata Dibata jadi erta si mehergana ibas kegeluhenna. Tentuna enda mabai Mamre guna mengevaluasi diri masing-masing: Nggo nge Mamre njadiken Kata Dibata jadi erta si mehergana ibas geluhna? Nggo nge Mamre ertedeh ate ngoge ras ngerenungken Kata Dibata suari ras berngi ? Piga kali nge Mamre ngoge Pustaka ibas sada Minggu ?

Selaku kalak sitek maka kegeluhenta harus min bagi singena ate Dibata. Kata Dibata eme tendang man nahenta ras si ngajari kita guna ngasup ndalani geluhta rikutken si ngena ate Dibata.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)