BAHAN PJJ 1- 8 juni 2014 RG GBKP CENGKARENG

BAHAN PJJ 1- 8 juni 2014 RG GBKP CENGKARENG 

OGEN : Masm. 139:13-24                                       Tema: “Pepayo Ras Tandailah Aku  ”

Tujun: Gelah Ngawan ni perpulungen:

1.       Meteh uga Daud mpepayo dirina I lebe-lebe Dibata.

2.       Nandai ia dingen nggit ipehuli Dibata.

3.       Nandai anak-anak I tengah jabuna sebage “Pribadi si unik” bagepe “Talenta” anak-anakta sejak dini”.

Kata Perlebe :

Sada hal siakui ras siimani maka kita (manusia) itepa Dibata selaku mahluk si sempurna. IjadikenNa kita sue ras tempasNa. Ibas kerina tinepaNa kita manusia iberekenNa mandat guna “erkuasa” nandangi tinepaNa sideban (Kej. 1:26-31). Sienda lebe nuduhken maka kita “meherga iadepenNa”. Adi sipergermetken ibas kesaksian Pustaka Sibadia maka gia manusia enggo erdosa, jenari ndalani kegeluhen e pe megati la bagi sinisuraken Dibata, tapi tetap icidahken Dibata kekelengenNa man manusia seh maka Ia pe nggit jadi manusia ibas diri Yesus guna keselamatenta (bd. Yoh. 3:16).

Ibas pengertin si mendasar enda sisadari ise kita enda simeherga iakap Dibata labo erkiteken beluh, gegeh, pentar entah mehulina kita tapi kerina e erkiteken pemereNa man banta. Guna sienda tentu perlu sirespon alu ndalani kegeluhen si meherga enda. Ertina siniarapken maka jadi kita bagi siisuraken Dibata eme ncidahken kegeluhen selaku anakNa ibas pertibi enda eme erguna man dirinta, keluarga, teman, doni enda terlebih man Tuhan Dibatanta.

Pengertin enda pe mabai kita kubas kegeluhen si aktif labo pasif sebab rancangen Tuhan eme segelah arah kita teridah kemulianNa. Sienda pe tentu mabai kita ndalani kegeluhen si “berkarya” gia ibas litna pelain-lain kita sada ras sidebanna. Perbedaan siibahan Dibata tetap nge ibas rancangenNa, sebab ibas kita ijadikenNa pelain-lain, iarapken maka sicidahken kita nggeluh ibas sikeleng-kelengen rikut ras saling memperlengkapi sada ras sidebanna. Siibahan Dibata man banta eme “sempurna” ibas kerina pemereNa, gia banci jadi lit siakap rusur kekurangenta tupung sibandingken ka ras kalak sideban, ula min sienda ipebelin, sebab siman pebelinen eme respon ungkapen syukur ibas perbahanenNa erkiteken lit kelebihen ras kekurangen e situhuna mahan bana kita nggeluh ibas mengandalken Ia bagepe ibas hubungen ras kalak sideban.

Dibata enggo ncidahken kekelengenNa man banta, jadi syukurilah alu karya nyata ibas kegeluhen enda. Ibas bahan PJJ Minggu enda tole i ingetken kita kerna ise kita sienggo ijadiken Dibata enda, alu pengarapen segelah sergai e kerina alu ndalanken kegeluhen ibas rancangenNa.

Penjelasen Teks Ogen: Masmur 139 : 13-24

Isi nats renungen PJJ enda nuduhken kerna pemahamen rikut ras pengakun Pemazmur kerna ise Dibata, maka Dibata nge simeteh kerinana (ay.1) janah  selaku “creator” nandangi manusia. Ay. 13-18 : Pemazmur nuduhken pengakunna kerna perbahanen Dibata :

• Njadiken kerina bagin tep-tep badan alu mehuli mulai ibas bertin nari.
• Pengakun kemahakuasaan Dibata ibas proses penciptaan
• Manusia mulai itepa ibas bertin nari alu ratur rikut ras rehbelinna
•  Mulai ibas bertin nari lit ibas kuasa ras pengidah Dibata
• Kegeluhen manusia ibas rancangen Tuhan

Pengakun sienda igejapken Pemazmur seh maka ungkapen “kupujiken kam” jadi bagin penting pengakunna. Pengakun enda mempengaruhi pengertin Pemazmur ibas kai silit ibas ia seh maka iaturken Dibata kegeluhenna ibas kiniulin. Sienda me erbahanca maka Pemazmur ngasup mujiken Dibata ibas i idahna kuasa Dibata ibas ngaturken kerina mehuli.

Pengertin Pemazmur enda iarapken jadi pengertinta ibas zaman gundari enda. Ibas ketubuhen manusia mulai kin ibas bertin nari, gia tehnologi reh canggihna seh maka ibas bertin e pe banci siidah kegeluhen manusia (USG 4 D), sie kerina iarapken maka reh tetapna pengakunta kerna pengaturken Dibata maka banci sie kerina jadi. Tambah umur tambah belinna seh maka tubuh manusia sie kerina ibas rancangen Tuhan si patut kel kita merespon alu pujin man baNa. Labo terukuri kita kerna kerina siibahan Tuhan.

Ay. 19-24 : Ibas kerina si enggo ibahan Dibata nandangi kegeluhenna selaku manusia si nggo irancang Dibata alu mehuli mulai kin ibas bertin nandena nari emaka tekad pemasmur :

-          La ia nggit nggeluh ras kalak jahat ras kalak si nggit ngamburken dareh sebab adi bergaul ia ras kalak jahat banci mabai ia ndabuh kubas perbahanen jahat ras banci njuruken gelar Tuhan (ay. 19-20).

-          Nembeh atena man kalak si nimbak dingen ngelawan Tuhan. Kalak si ngimbangi Tuhan man pemasmur imbangna kap (ay. 21-22).

-          Nggit ipepayo ras iuji Tuhan perukurenna. Enda sada bentuk pengendesen (penyerahan) diri man Dibata. Siap katawari pe ikoreksi (mengoreksi diri) gelah tetap nggeluh alu payo dingen benar emaka ipindo pemasmur man Tuhan gelah tetap ia ibabai kubas dalan si payo dingen mehuli, tetap rasa lalap.  

Tema : Pepayo Ras Tandailah Aku

Arah bahan PJJnta enda kita ibabai gelah ngasup nandai ise Dibata sebab Dibata pe jelas nge itandaiNa kita sebab Ia sinjadiken kita dingen si nepa kita mulai kin kita ibas bertin nandenta nari. Janah Tuhan ka psi meteh kerinana ibas kegeluhennta. Emaka bagi tekad ras komitmen pemasmur ibas ogenta enda ndai bagekalah tekad ras komitmenta guna tetap nggit geluhta ipepayo Dibata selaku anak-anak Dibata.

Selaku orang tua, bage ka lah perbahanenta nandangi anak-anakta, ngasup kita nandai anak-anakta, ras meteh perkembangen anak-anakta mulai kin kitik-kitik nari seh dewasa. Emaka perlu siperdiateken pendidiken ras pengajaren siisehken man anak-anakta mulai sejak dini (pendidiken usia dini) sebab adi kitik-kitik nari nggo itanemken pengajaren si mehuli man bana, janah kitik-kitik nari nggo itandaina Tuhan si njadiken ia, e jadi jaminen si nteguh guna mbangun karakter si mehuli dingen nuanken biak malang (takut) man Tuhan. Emaka mahan bana ibas pertumbuhen ras perkembangenna pe terus, bagi pemasmur ndai nembeh atena ras labo meriah iakapna bergaul ras kalak jahat ras “mbentengi” dirina ibas pergaulan si la payo.  Karakter ras kepribadian anak ipengaruhi factor pendidiken siiperolehna ibas orang tuana, lingkungenna bagepe ibas perawaten ras asupan (makanan, keseimbangan gizi) si ialokenna.  Secara psykologis mekatep igambarken: anak ibarat kertas putih, akan seperti apa dia nantinya  tergantung bagaimana kita menuliskan dan member coretan apa pada kertas putih tersebut. Uga pagi masa depan anak-anakta tergantung uga kita orang tuana ngasup nandai ia, meteh keberadaanna, mpepayo perdalanna gelah ula papak, mperdiateken pertumbuhen ras perkembangenna terlebih sejak dini mereken pengajaren ras pendidiken si mehuli guna membentuk karakter si mehuli ka ibas dirina. 

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)