BAHAN PA MAMRE TGL 22-28 JUNI 2014 RG GBKP CENGKARENG

BAHAN PA MAMRE TGL 22-28 JUNI  2014 RG GBKP CENGKARENG

  Ogen : KEL. 6: 2-9                                                          Tema : “Ncikep Padan Dibata”

Point-point penting & Garis Besar :

1. Kitab Keluaren nuriken kerna pembebasen bangsa Israel ibas perbudaken Mesir nari. Aminna gia lit usaha Firaun meneken generasi bangsa enda, alu perintah kerina anak dilaki ibas bangsa Heber arus ibunuh tapi pemeliharaan Tuhan man Musa jadi bukti maka Tuhan nggo mpersiapken karya penyelamaten man bangsaNa. Janah kuasa Raja Firaun pe la ngasup nebeng rencana Dibata guna mbebasken bangsaNa.

2. Ibas bahan ogen PA Mamre enda (Kel. 6: 2-9), Dibata mpetandaken identitasNa selaku si erkuasa, si lebih megegeh asangken raja Firaun. Dibata ndilo Musa dingen mpetetap ukur Musa guna jadi alat Dibata mbebasken bangsaNa alu mpersingeti Musa kerna biak Dibata si setia ibas perpadanenNa. Dibata nggo erpadan man Abraham, Ishak ras Jakub maka Dibata mereken tanah Kanaan man bana bagepe man kesusurenna. Aminna gia Abraham, Ishak ras Jakub lanai nggeluh tapi erkiteken biak Dibata setia ibas padanNa emaka kai si nggo ipadankenNa tetap isehkenNa man bangsa Israel selaku kesusuren Abraham, Ishak ras Jakub. Ibas kegeluhen Manusia, biasana adi temanta erjanji e nggo mate lanai siakap berlaku janjinta man bana, nggo sai/ dung siakap utangta man bana. Tapi Dibata tetap setia dingen ncikep perpadanenna man Abraham, Ishak ras Jakub janah isehkenNa man kesusurenna, eme bangsa Israel. Emaka ibebaskenNa ateNa bangsa Israel ibas perbudaken Mesir nari janah itaruhkenNa ku taneh si enggo ipadankenNa man Abraham janah iberekenNa taneh e jadi sikerajangen bangsaNa (ay. 4-8).

3.  Ay. 5 : “….enggo Kubegi penderkuh kalak Israel, …”, ayat enda ncidahken man banta uga Dibata mediate man bangsaNa.  Inisiatif guna nelamatken ras mbebasken bangsa Israel ibas perbudaken Mesir nari reh bas Dibata nari erkiteken mekuah ateNa ras mediate nandangi kiniseran bangsaNa. Janah enda erkiteken iingetNa padanNa man Abraham: “Kupasu-pasu kalak si masu-masu kam tapi Kusumpahi kalak si numpahi kam…” (bdk. Kej. 12:32).
4. Ay. 9: Ituriken Musa kerina si nggo ikataken Dibata man bana janah rencana Dibata nelamatken dingen mbebasken bangsaNa, tapi la ibegiken bangsana Musa dingen la kalak tek sebab erkiteken perbudaken si kejam, kerja paksa ras penindasen siilakoken bangsa Mesir, erbahanca mesui kal ate bangsa Israel seh maka nggo bene ukur ras pengarapenna. Pesan moralna: mekatep kiniseran ras perbeben erbahanca bene ukur ras pengarapen manusia seh maka lanai tek nandangi kuasa ras padan Dibata si ngasup mulahi dingen nelamatken kita tapi arah bahan PA Mamre enda ibabai Mamre gelah :

1.      Tetap tek nandangi kuasa Dibata si ngelebihi kerina kuasa, termasuk kuasa penguasa sekalipun. Tuhan ngasup mulahi kita ibas kerina perbebennta, uga belinna gia persoalen/masalahta belinen nge tetap kuasa Dibata sisembah kita. Janah Dibata ngasup mbebasken kita ibas kerina kiniseran ras perbeben si ngasup meneken kita adi kita nderkuh dingen mindo penampat man baNa.

2.      Tek maka Dibata setia nandani padanNa. Mamre iajuk gelah “meng-imani” dan “meng-aminkan” padan Dibata man banta kalak si tek si nggo isehkenNa arah KataNa. Kerina siisehken Dibata arah Kata Dibata (FirmanNya) ibas pustaka si Badia labo bual tapi pasti. Tapi arus sipahami maka adi setia dingen tek kita man Dibata nggo ijamin mulus nari geluhta lanai lit masalah dingen perbeben si reh man banta, bukti kesetiaan dingen pasu2 Dibata man banta ukurenna labo arah kesuksesan ras kinibayaken materi saja ngenca tapi ibas perbeben, kegagalan pe hadir pasu-pasu Tuhan, arah gegeh, kesehaten siibereken Tuhan ngasup kita megenggeng ibas ngalaken kiniseranta e pe pasu-pasu si luar biasa si isehken Dibata man banta. Tek kita Dibata setia nge ibas padanNa maka labo ipelepasNa kita icubai lebih asa gegehta janah asum kita ngenanami kiniseran ibereNa gegeh man banta janah radu ras si e iberekenNa pe dalan pulah (bdk. 1Kor. 10:13).   

3.      Mamre iajuk guna nggit jadi alat Dibata bagi pendilo Dibata man Musa, eme jadi agen pembebas, nandangi kiniseran ras perbeben teman, keluarga, bagepe kalak si deban gelah ula sempat putus asa ibas perbebenna tapi mabaisa tek dingen erpengendes man Dibata, bagepe jadi alat/ tan Dibata mereken solusi / serpang pulah ibas kiniseranna nari.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)