BAHAN PA MORIA TGL 22-28 JUNI 2014 RG GBKP CENGKARENG

BAHAN PA MORIA TGL 22-28 JUNI  2014 RG GBKP CENGKARENG

  Ogen : Hakim2  5:7-13                                                     Tema: “Tutus  Erdahin, Rulih!”

Latar Belakang :

Surat Hakim-hakim itulisken alu tujun gelah bangsa Israel tetap ngasup nggeluh selaku bangsa si setia /taat ndalanken UU ras setia nembah man Dibata.  Adi bangsa e taat ras setia man Dibata maka ipasu-pasuNa bangsaNa, tapi adi lang iukum Dibata janah ipediat Dibata bangsaNa italuken musuh2na. Teks ogen enda pe nuriken uga bangsa Israel nggo erdosa man Tuhan emaka ibereken Tuhan  Jabin, raja kalak Kanaan ras puanglimana Sisera, ngkuasai Israel.

Ibas jaman Hakim-hakim Dibata ngangkat piga2 si jadi Hakim guna ngerunggui ras mimpin bangsaNa. Salah sada Hakim diberu ibas sejarah bangsa Israel eme Debora, ia ndehara Lapidot (sekalak nabi).  Biasana Debora kundul I teruh batang Kurma , kelang2 Ramah ras Betel I deleng2 Efraim janah kuje me ia idahi bangsa Israel ibas mindo nasehat ras keputusen2na selaku hakim (bdk. Hak. 4:4-5). Pendahin ras kualitas kepemimpinan Debora teridah/teruji arah uga ia mpetetap ukur ras meyakinkan  Barak guna pang erperang dingen naluken Sisera ras tentarana. Tapi la tenang ukur Barak adi Debora la ikut erperang. I tengah-tengah tradisi masyarakat si memandang rendah keduduken diberu, Debora justru tampil jadi sekalak hakim diberu si luar biasa, si ngasup ncidahken ketetapen ukur ras keberanian lebihen asangken sekalak dilaki (Barak), erkiteken si e Debora dat kehamaten sebab Dibata ngendesken Sisera, panglima Kanaan ras tenterana man sekalak diberu.

Penjelasen teks Ogen: Hakim2  5:7-13

Teks Ogen PJJ enda eme bagin ibas Ende-enden  Debora ras Barak erkiteken ibereken Dibata kemenangen man bangsa Israel ngelawan Jabin, raja Kanaan ras Sisera panglimana.

Ay. 7-9 : Ibas bagin enda Barak mereken gambaren uga Kuta-kuta Israel tempa-tempa terulang dingen mesuni, menam lanai lit arapen. Kenca bangsa Israel nembah dibata-dibata si deban terjadi perang dingen ikuasai bangsa si deban ia tapi labo lit ise pe si ngangkat ampang2 ras lembing guna ngelawan dingen mbebasken bangsa e ibas penindasen bangsa si deban. Tapi tupung Debora reh jadi hakim man bangsa enda, si jadi sekalak nande man bangsana, si mereken semangat, mpetetap ukur ras kiniteken bangsana,  justru terjadi kebangkitan si maba kemegahen sebab puanglima2 Israel bagepe rakyat ermeriah ukur ngendesken dirina. Kemegahen kerna enda igejapken Barak ras Debora erkiteken Tuhan emaka ipujina Tuhan. Debora ras Barak labo erpengakap maka kemenangan bangsa Israel naluken Kanaan ras semangat bangsana guna ikut erperang ras ngendesken dirina enda erkiteken kebeluhenna tapi iakuina maka e erkiteken Tuhan, emaka ipujina Tuhan. Ayat enda ncidahken man banta maka Debora ras Barak  labo pemimpin si meganjang ukur, si ‘ter-aku-aku” ibas kemenangen e, labo nggit “mencuri” kemuliaan Tuhan.

Ay. 10-13 :

Debora ras Barak ngajuk bangsana arah ende-endenna enda guna nuriken ras naksiken kemenangen bangsa Israel e sebagai kemenangen Tuhan. Ertina bangsa Israel isuruh ersaksi man jelma sinterem kerna perbahanen Tuhan si nggo mereken kemenangen man bangsaNa. Arah kepemimpinen Debora bangsa Israel ibabai mulihken setia man pemimpinna, reh mulihken ndahi Tuhan sebab adi bangsa Tuhan reh man Tuhan mahan bana bangsa e dat kuasa ras sikap guna erperang naluken musuh-musuhna sebab Tuhan mereken kemenangen man bangsaNa si setia reh man baNa.

Tema : Tutus Erdahin, Rulih !

Arah teks ogen ras tema enda  mabai Moria gelah ngasup ngusih Debora, sekalak diberu si tangguh, jadi hakim, pemimpin  ras nande nandangi bangsana, si ngasup mpetetap ukur, mereken semangat, mbangun motivasi ras kiniteken bangsaNa guna mulihken setia man Tuhan. Piga2 hal si banci siidah janah mereken semangat ras kebanggaan man banta selaku diberu arah teks enda, eme :

1. Debora gambaren sekalak pemimpin si tutus ndalanken tugas ras tanggung jawabna aminna gia is sekalak diberu, la lemah, mbiar ras gentar I tengah-tengah situasi ras tradisi bangsa Israel si la mperhitungken keduduken sekalak diberu pe tapi ngasup ia ncidahken kualitas diri ras kualitas kepemimpinenna. Kerina resiko pendahinna selaku hakim, aminna gia arus berkat erperang (ibas jamanna situhuna si berkat erperang eme si dilaki saja) tapi la ia gentar, janah idahikenna tugasna alu tutus. Ketutusenna ndahiken tugas ras tanggung jawab siendesken Tuhan man bana mahan bana Debora ipasu-pasu Tuhan, erbahanca ia berhasil, Tuhan mereken kemenangen man bana sekalak diberu dingen ndatken kehamaten ibas bangsana nari.
2. Lenga bo nterem diberu jadi pemimpin subuk i negaranta bagepe i doni enda tapi tetap nge jadi kemegahen man banta sebab sekalak diberu la ngenca kita wajib jadi pemimpin tapi sekaligus nande man isi jabunta si mereken semangat ras motivasi si ngasup mabai perubahen si mehuli man isi jabunta bagi kai siilakoken Debora man bangsana, perubahen cara pandang, mental bagepe kiniteken.
3. Selaku Moria kita pe imotivasi gelah tutus ibas kerina bidang pendahinta, aminna gia lit resiko, misalna: la iergai, la ianggap ras la iperhitungken kalak, sebab kai pe siidahiken kita adi sigejap pendahinta e pemere Dibata ras pendilo Dibata man banta emaka arus sidahiken alu dem ketutusen ras ertanggung jawab man Dibata emaka Dibata mereken gegeh dingen masu-masu pendahinta.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)