BAHAN PJJ 22-29 JUNI 2014 RG GBKP CENGKARENG

BAHAN PJJ 22-29 JUNI 2014 RG GBKP CENGKARENG 

OGEN : Kuan2 8:1-12                 TEMA :“Bukalah Perukurenndu” (Berwawasan luas)

Tujun: Gelah Ngawan ni perpulungen:

1.      Meteh  maka mbelin kal ertina ras gunana kepentaren.

2.      Nggit mbuka perukuren ras mpebelin potensi diri ntah pe talenta si lit bas ia.

Latar Belakang :

Kitab Kuan2en eme kumpulen Kitab2 Hikmat, si isina  kerna pengajaren agama ras ajaren uga arusna ndalani kegeluhen si tep-tep wari alu payo, dingen nggeluh alu pentar. Inti ibas kerina Kitab Kuan-kuanen eme : Kuan2 1: 7  sinuriken maka ulu, kerina pemeteh ras palas kepentaren eme erkemalangen man Tuhan. Alu hikmat ras kepentaren si rehna bas Dibata nari nge si erbahanca kita ngasup ngaturken kegeluhenta alu mehuli dingen mabai kita kubas keberhasilan geluh ras kebenaren Dibata.

Penjelasen Teks Ogen : Kuan2 8:1-12

Ay. 1-6: Ijenda penulis Kitab enda igambarken (ipersonifikasiken) bagi sekalak jelma si erlebuh ras erdilo. Kepentaren ras pemeteh si erlebuh ras erdilo e eme Kata Dibata, si mpersingeti kerina manusia, ibas kerina ingan nari :  I datas uruk, I tepi dalan, I serpang-serpang, I pintu gerbang kuta. Ertina arah japa nari pe Kata Dibata perlu ipeseh guna mpersingeti kerina manusia, sebab Kata Dibata e:

·   meherga dingen ngasup mabai manusia si nggit ndengkehkenca  reh dewasana ibas ndalani kegeluhen. Kalak si nggit terus ndengkehken Kata Dibata pasti bertumbuh kubas kedewasaan kiniteken, sebab bagi nina Paulus: “iman tumbuh melalui pendengaran”, kiniteken turah arah nggitna megiken/ndengkehken Kata Dibata janah terus torah, dingen erbuah,  reh dewasana ia seh kutingkat kedewasaan Kristus si serta.

·   mabai kalak si lenge nggit erlajar janah alu bage datna pemeteh.  Kata Dibata mereken semangat erlajar si tinggi man banta, arah nggitna kita erlajar ibas PA, PJJ, tambah pemetehna.  Alu nggit erlajar terus menerus  (bdk. Kuan2 1:5), la pernah ngadi erlajar (long life education) erbahanca ertambah-tambah kita ibas pemeteh ras kepentaren. Arah kininggiten ras semangat si tinggi ibas erlajar nampati kita guna nambahi wawasennta nandangi kerina hal seh maka reh bijaksanana kita janah ngasup kita ertimbang secara lebih luas ibas kerina masalah ras persoalan sir eh man banta ibas kegeluhenta si tep-tep wari.

·                        nggeluh alu payo sebab kerina siipeseh dingen iajarken Kata Dibata payo dingen benar.

Ay. 7-13 : Kalak si lit ibas ia kepentaren terang dingen jelas iangkana maka kepentaren e ergan asangken emas ntah pirak, la terbandingken asangken kai pe si meherga. Sebab kalak si lalit ibas ia kepentaren uga Buena pe kinibayakenna banci nge bene ban kinibayakenna e, janah kerina kinibayaken (emas ras pirak) e banci nge kernep, keri ras bene dalam sekejap, tapi kalak si nggeluh alu dem kepentaren, erpalasken mbiar ras erkemalangen man Tuhan si jadi ulu kepentaren, ngasup ndalani kegeluhenna alu pentar/bijak,emaka ngasup ngalaken kerina kecibal geluh, la bene pengarapenna tapi cerdik, la kehilangan akal, tetap ngasup mbuka perukurenna ibas ndalani kerina dampar geluh.  

Gelah nggeluh ibas kepentaren maka sipentingna eme begiken ras nggeluh ibas kepentaren e sendiri, jenari ngergaken kepentaren e lebihen asangken kai si lit ibas doni enda. Adi enda idalanken maka keputusen simehuli, nggeluh ibas kebujuren,  jadi kalak pentar bagepe mpraktekken simehuli ras erlagu langkah simehuli jadi sikerajangenta. Jadi adi kepentaren lit bas manusia, maka si lit bas manusia eme ciga atena kerna si la mehuli ras sijahat.

PENGENANNA:       

Lit sada perbedaan kalak sibeluh/erpemeteh ras kalak si pentar/bijak ras berwawasan luas. Kalak beluh/erpemeteh (pintar) tuhu-tuhu ngkuasai salah sada ntah lebih disiplin ilmu (secara akademis), tapi kalak pentar ras berwawasan luas eme kalak si tehna bersikap ras uga arusna ndalani kegeluhenna ibas kerina situasi, kondisi ras perkembangan siterjadi ibas doni enda, bijaksana menyikapi kerina situasi si terjadi, bagepe tehna jalan keluar siharus ilakokenna. Jadi kalak pintar lenga tentu ia berwawasan luas, tapi kalak siberwawasan luas, ia igogolongkan kalak beluh dingen bijak.

Kalak siberwawasan luas la gampang terpengaruh  ibas hal-hal si la mehuli, sebab tehna dampakna, bagepe kalak siberwawasan luas ras mbiar man Tuhan nggit ia mbangun hubungan harmonis, ras mereken masuken-masuken si positif ibas pelayanan gereja, bagepe nggeluh alu meteruk ukur, sebab itehna kepentaren si lit ibas ia e pe rehna ibas Dibata nari. Jadi kalak siberwawasan luas simbiar man Tuhan katawari pe ndalani geluhna alu rukur positif.   Enda me siniharapken lit bas kita. ersoalenna uga carana gelah kita banci nggeluh ibas kepentaren/berwawasan luas. Kita banci nggeluh ibas kepentaren, adi nggit kita ngoge, megi kerna simehuli ras berita-berita, bagepe nggit kita erlajar terlebih tetap nggeluh erkemalangen man Dibata gelah kepentaren Dibata e ngajari kita ibas kerina dampar geluhta.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)