BAHAN PA MAMRE TGL 29JUNI – 5 JULI 2014 RG GBKP CENGKARENG

BAHAN PA MAMRE TGL 29JUNI – 5 JULI 2014 RG GBKP CENGKARENG

  Ogen :Masm. 131: 1-3                         Tema : “Gereja eme nande man kalak si tek”

Point-point penting & Garis Besar :

1. Masmur enda isina eme pertoton Daud man Tuhan ibas ia nggejapken lias ras keleng ate Dibata nandangi kegeluhenna dingen uga sura-surana tetap ernalem man Tuhan. Ay. 1-2 : Daud nuriken kerna uga ia berupaya nggeluh ernalem man Tuhan eme alu cara:

v  Nggeluh la meganjang ukur ras la megombang, ertina: gaya geluh si ernalem m.an Tuhan menurut Daud arus teridah arah ndalani geluh alu meteruk ukur dingen la megombang man ise pe. Alut kata si deban kalak si meganjang ukurna dingen megombang man kalak pasti labo kalak si ernalem man Tuhan, sebab kalak si meganjang ukur pasti labo Tuhan penalemenna/ inganna ernalem, tapi gegehna, dirina, pemetehna jadi penalemenna, emaka kai pe si inanamina iakapna kerina erkiteken gegeh, pemeteh, kebeluhenna, piah megombang ia man kalak si la ngasup bagi ia.

v  La memaksaken diri alu ngayaki perkara-perkara si mbelin ntah si matahatsa akapna, ertina : “tau diri” ras “sadar diri” ibas ndalani kegeluhen, la “ngoyo” (bhs Jawa), ntah pe nggeluh alu la mperhitungken kengasupen bagi nina istilah: nafsu besar , tenaga kurang, la sesuai harapan /expektasi ras kemampuan. Kalak si la ernalem man Tuhan pasti meganjang ukur emaka lalap nge iayakina hal2 si mbelin sebab adi perkara-perkara si kitik labo iakapna lit ertina/ la lit ergana.

v  Ngasup bersyukur ibas kegeluhen si idalanina: puas dingen dame iakap pemasmur janah igambarkenna kepuasen dingen dame pusuhna e bali ras sekalak anak dame iakapna ibas ampun nandena. Daud naksiken uga kegeluhenna ikawali ras itemani Tuhan seh maka puas dingen dame iakapna sebab iperdiateken dingen ikelengi Tuhan alu keleng ate si tuhu-tuhu, mereken rasa aman ras tentram bagi sekalak  anak si nyaman dingen dame iakapna ibas ampun nandena.

2. Ay. 3 : Pengarapen ras pengajuk Daud man bangsana gelah Israel pe tetap nggeluh ernalem man Tuhan rasa lalap. Kiniulin Tuhan si nggo ialami Daud e jadi kesaksin Daud guna ngajuk kerina kalak, ibas bangsana Israel gelah ngikutken gaya geluhna alu nggeluh ernalem man Tuhan.

3. Tema : Gereja eme nande man kalak si tek. Pemasmur ibas teks ogen enda ndai nggambarken penemani dingen pengarak-ngarak Tuhan ibas kegeluhenna bali ras sekalak nande si mereken rasa nyaman rasa man man anakna, tema PA Mamre mabai Mamre guna ngenen ras meng-evaluasi Peran gereja sedekah enda nggo nge jadi nande man kalak si tek, si mpebelin2 dingen ngajarken anak2na gelah bertumbuh ras reh belinna ibas kiniteken man Tuhan ? Biasana sekalak anak, adi la akapna aman ntah lit kebiarenna, minter daramina nandena, kiam ia ku ampun nandena, adi nggo bas ampun nandena aman dingen dame iakapna janah bene nge kebiarenna e. Nggo nge kalak si tek njadiken gereja jadi ingan si mereken dame dingen ketenangen ukur? Nggo nge iakap Mamre adi reh ia ku gereja datna gegeh si mereken ketenangen dingen kengasupen guna ngalaken kerina tantangen geluh ras kebiaren2 doni ? Kalak Jahudi njadiken Rumah Pertoton jadi symbol kehadiren Dibata I tengah-tengah bangsaNa, emaka kalak Jahudi tetap mpehagaken Rumah Pertoton jadi ingan si Badia, sebab ije Dibata ringan emaka Rumah Pertoton penting kal bas kegeluhen kalak Jahudi, ijapa pe ia ringan tetap nge ia ersembah alu pengalana (kiblatna) kempak Rumah Pertoton I Jerusalem. Daud pe ngungkapken uga ketedehen atena nandangi R. Pertoton Tuhan alu ngataken: “madin sada wari I Rumah Tuhan asangken seribu wari ibas ingan si deban” (bdk. Masm. 84:11). Gerejanta GBKP  tentuna selama enda nggo berperan mpetandaken Tuhan man banta, terlebih man kerina Mamre. Arah pengajaren, arah program2 si idalanken, GBKP tentuna nggo berperan ibas proses pertumbuhan kiniteken Mamre ras mabai Mamre nggeluh ibas kegeluhen pertendin si mehuli ras sikeleng-kelengen bagi si ngena ate Tuhan, emaka nggo sepatutna Mamre ngkelengi gerejana si nggo mpebelin, mpeturah dingen mpekena-kena kegeluhen kiniteken Mamre.

4. Selaku Mamre nggo nge kegeluhen religius perbapan e bagi kegeluhen Daud si katawari pe ertedeh ate reh ku Rumah Pertoton Tuhan ? Arah ogen ras tema PA Mamre enda mereken kesadaren dingen ngajuk Mamre gelah mpeturah biak erkeleng ate nandangi gereja Tuhan ija ia jadi anggota, ertanggung jawab nandangi perkembangen pelayanen gereja ras tetap mpehagaken dingen njadiken gereja selaku nande ibas pertumbuhen kegeluhen pertendinta. Mamre iajuk gelah ngkelengi gerejanta GBKP alu ncidahken karya nyata, bekerja, berkarya ras muat bagin ibas kerina pelayanen guna kemajun gereja gelah kerina pagi jemaat terlebih masyarakat ermalem ate ibas kehadiren GBKP.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)