BAHAN PA MORIA 20 - 26 JULI 2014 RG GBKP CENGKARENG

BAHAN PA MORIA 20 - 26 JULI 2014 RG GBKP CENGKARENG

OGEN : KEJ. 37:5-11                              TEMA : “Bujur Ibas Nuriken Kebenaren”

POINT-POINT & GARIS BESAR :

1.     Jusuf, sekalak anak Jakub si ikelengi Jakub lebih asangken anak2na si deban, erkiteken si e nembeh ate senina-seninana man bana. Ibas sada berngi ernipi ia maka kerina ia sangana I juma ngerakuti gandum, jenari kerina gandum siirakuti nembah mungkuk man berkisen gandum Jusuf. Bagepe ernipi Jusuf peduakaliken, ija idahna matawari, bulan ras sepuluh sada bintang mungkuk man bana. Megi nipina enda senina-seninana ernembeh ate man bana sebab nokoh akapna Jusuf emaka nina: “Ntah akapndu kam raja si engkuasai kami?” (ay.8). Bagepe ipandang Jakub, bapana Jusuf jenari nina: “ Akapndu kin maka nandendu, senina-seninandu ras aku, reh mungkuk man bandu?” (ay.10). Cian ate senina-seninana kerina man Jusuf tapi bapana rukur kerna si e (ay.11).

2.     Kai siituriken Jusuf situhuna gambaren nubuaten nandangi kai si terjadi pagin, uga Jusuf iangkat Dibata jadi wakil Fira’un dingen jadi pemimpin I Mesir, isembah rakyat Mesir ras senina-seninana, saja tupung paksa si e ipahami senina-seninana secara negative, erkiteken ope si e pe enggo kin lit bibit segat ate/nembeh ate senina-seninana erkiteken “pilih kasih” siilakoken bapana Jakub, si ngkelengi Jusuf lebihen asangken anak2na si debanna. Ertina adi nggo lit ibas pusuh ate nembeh (kebencian) maka kai pe siikataken Jusuf pasti ialoken secara negatif.

3.     Jusuf memang la peka ibas penggejapen ras sikap senina-seninana man bana emaka bebas ras percaya diri saja ia nuriken kai pe man senina-seninana, janah la ia berprasangka buruk ras erpengakap negative dingen mbiar senina-seninana ernembeh ate /erate segat man bana . Megati kita ragu-ragu ras la percaya diri ibas nuriken kai si benar dingen tuhu man kalak si deban sebab mbiar kita nembeh ate kalak man banta emaka mekatep sipilih “sinik” (diam) ibas kelabenaren si terjadi. Melala kalak la siap menerima resiko ibas nehken “suara kenabian” man jelma si nterem.

4.     Sebalikna megati melala ka kalak la siap di koreksi/ dikritik ras ipersingeti kalak si deban. Tupung ikoreksi kalak kesalahenta, ipersingeti kalak kita gelah kita robah nembeh ateta man bana, contohna: tupung kalak ngajarken kita kerna cara per-uista selaku Moria misalna si kurang sopan, rok siipake kita gendeksa, ntah erlejing (erseluar gedang) kita reh kebaktin/PA (ngikuti kegiaten2 gereja). Padahal sadar kita maka sikatakenna e payo ras benar. Ntah pe misalna ipersingeti kalak kita soal pengerananta si “asal bunyi” ntah pe cakapta si megati ‘kasar’ ntah pe megati “sal ngerana” , ate2ta mbelasken kai pe janah la ngukurken perasaan kalak.  Arah bahan PA Morianta enda mabai Moria gelah :

v  Pang nuriken kai si benar, ngataken si payo man temanta/anak jabunta ntah pe kalak si deban, aminna gia lit resikona.

v  Ngataken kata tuhu alu teng-teng, ertina: ibas ngataken kebenaran e pe perlu tekhnik ras strategi si payo dingen mehuli, labo asal “embus” saja. Ertina motivasi dibalik kita nehken kebenaren e tetap alu motivasi keleng ate dingen ibas pusuh sibersih nari.

v  Bersedia ras lapang dada ka ibas ngaloken persinget, teguran, kritiken, koreksi ibas kalak si deban nari, gelah ula ngenca beluh “mandang/ngkritik” kalak tapi la ngasup dingen la bersedia ikritik/ikoreksi.

v  Lanai ncakapken kesalahan/kelabenaren temanta man kalak si deban (ncekuraki) kekurangen kalak tapi la pang nehkenca man si bersangkuten gelah ia robah. Ertina arah PA enda bica lit temanta si la payo siakap lanai man kalak si turiken tapi langsung lah man si bersangkuten si turiken kekurangenna gelah itehna mpekenasa.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.MIN.