BAHAN PA MAMRE TGL 20-26 JULI 2014 RG GBKP CENGKARENG

BAHAN PA MAMRE TGL 20-26 JULI 2014 RG GBKP CENGKARENG

  Ogen : 2 Tes 3:3-10                                                      Tema : “Mela Adi La Erdahin ”

Point-point penting & Garis Besar:

1. Paulus nuratken suratna si peduaken man perpulungen Tesalonika guna mpegegehi kiniteken perpulungen gelah tetap setia ibas kiniteken man Tuhan aminna gia paksana ngenanami kiniseran bagepe guna ngelayasi keguluten ibas perpulungen si lenga erpengangka kerna kerehen Kristus sipeduakaliken. Sabab tupung paksa si e lit pengajaren sesat si ngataken maka wari Tuhan e nggo seh, emaka lanai perlu erdahin. Pengajaren si e erbahanca turah ibas perpulungen gaya geluh si mekisat/malas sebab lanai lit gunana iakapna erdahin ncariken keperluh geluh emaka iajuk Paulus perpulungen e guna tetap erdahin ncukupken keperlun geluh gelah ula jadi beban man kalak si deban.
2. Ay. 3-5 : Paulus ngajuk perpulungen gelah tetap tek man Tuhan sebab Tuhan e setia mpegegehi ras ngkawali perpulungen ibas kerina kuasa si jahat nari. Pengarapen Paulus alu penegu-negu Tuhan perpulungen Tesalonika tetap megenggeng ibas ngalaken kai pe alu ngandalken gegeh siibereken Kristus.
3. Ay. 6-10: Paulus mpersingeti perpulungen gelah la bergaul (nirangken) kalak si perkisat si la nggit ngikutken pengajaren Paulus. Maksud Paulus ijenda tentu harus sipahami alu payo, ertina Paulus labo bermaksud gelah perpulungen jadi “musuh” nandangi kalak si perkisat tapi maksudna “sirangilah”.  Sebab ras ise kita usur bergaul akrab/dekat pasti berpengaruh kubas cara geluhta. Paulus mindo man perpulungen gelah kalak sibage tetap iperdiateken tapi ula iperkuanken gelah mela iakapna (ay.14) saja ula iakap jadi imbang ertina ula segat ntah nembeh ateta man kalak si bage, sebalikna iajukna perpulungen gelah ngasup ngajarkenca bagi sekalak senina (bdk. Ay.15)  La ngenca ngajuk dingen ngajarken jemaat gelah ula perkisat, tapi Paulus pe ngasup ncidahken dirina jadi usihen man perpulungen tupung ia nggeluh I tengah-tengah perpulungen labo pernah icidahkenna biak perkisat, tapi erdahin ia alu latih, suari ras berngi dingen la nggit jadi beban man perpulungen. Janah persinget si cukup tegas isehken Pauls ibas bagin enda : “Kalak si la nggit erdahin ola bere man” (ay.10), ertina ayat enda mpersingeti kita alu tegas maka lanai lit alasenta la nggit erdahin/ bermalas2an sebab adi la nggit erdahin/perkisat la patut kita man, la patut kita nggeluh.   

4.      Arah PA Mamre enda Mamre ibabai gelah meteh maka erdahin eme tanggung jawab kalak si tek sebab Dibatanta pe Dibata si erdahin (bdk. Joh. 5:17). Bagepe Mamre iajuk gelah ngasup jadi guru alu ngajarken kalak si perkisat sebab biak perkisat tentuna biak si la ngena ate Tuhan janah la payo si mabai geluh manusia jadi musil (Kuan2 10:4), janah kalak malas labo pernah seh kai siisurakenna (Kuan2 12:27) emaka arusna mela siakap adi la kita nggit erdahin/mekisat (Tema).

5. Menurut Calvin : “apapun pekerjaan, di dalamnya termuat panggilan Tuhan. Gerejanta GBKP eme penganut ajaran Calvin, tentuna arah pemahamen enda, Mamre pe ngasup ngejapken maka kai pe pendahinta ibassa lit pendilo Tuhan, emaka arus sidahiken alu tutus sebab kai pe si idahiken kita, pendahinta e pemere Dibata, emaka ertanggung jawab kita man Dibata si mpercayaken pendahin e man banta janah ibas kai pe siidahiken kita e lit pendiloNa guna naksiken dingen mpermuliaken gelarNa. Emaka si jaga gelah ula arah pendahinta tercurna gelar Dibata.   

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.MIN.