BAHAN PJJ 20 - 26 JULI 2014 RG GBKP CENGKARENG

BAHAN PJJ 20 - 26 JULI 2014 RG GBKP CENGKARENG 

OGEN :  Kolose 2 : 6 – 10                            TEMA :“Rurat, turah Ras Erbuah Ibas Kristus Jesus”

LATAR BELAKANG

1.      Surat Paulus man perpulungen I Kolose  tujunna eme mereken pergegeh man perpulungen i Epesus gelah tetap nggeluh ibas Kristus. Aminna gia labo Paulus si mantekisa perpulungen e tapi asum ia nuruh piga-piga kalak erdahin I Efesus nari, igejapna maka ia pe ertanggung jawab nandangi perpulungen e sebab ietehna maka lit guru-guru perguak si nehken pengajaren si papak ibas perpulungen e. Paulus erbahan surat man perpulungen Kolose guna nehken pengajaren Kristus si benar janah ngelawan pengajaren si papak e.

2.      Ibas bagin suratna enda Paulus nehken pengajaren kerna uga kin arusna kegeluhen kalak Kristen si serta. Ay. 6-7 : Alu tegas ikatakenna maka kalak si nggo ngaloken Kristus Yesus selaku Tuhanna, maka konsekuensina :

• Geluhna arus tetap ersada ras Ia, ertina : kiniersadaan kalak si tek ras Kristus teridah tuhu-tuhu ibas kerina dampar geluhna. Biak Kristus jadi biak geluh kalak si tek. Kiniersadaan si terjadi antara kalak si tek ras Kristus eme kiniersadaan si utuh, menyatu tuhu-tuhu, la bagi minak ras lau, tupung iaduk e ngenca teridah ersada, kenca si e terpisah ka. Arus bagi lau teh ras gula, kenca iaduk lanai terpisahken apai gula apai teh. Ertina la erpaksa-paksa ngenca kalak si tek nggeluh ersada ras Kristus, la tupung I Rumah Pertoton (I gereja) teridah kalak si tek e bujur, benar, mehuli dingen terteki tapi mulih I gereja nari pe tetap teridah biak Kristus nggeluh ibas ia, bagi kai siikataken Paulus: “Hidupku bukannya aku lagi, tapi Kristus yang hidup di dalamku”. Bagi kapas si itamaken lau, ndarat pe ibas lau nari tetap lau e lit ibas kapas e kujapa pe ia itamaken, bagepe kalak si tek kujapa pe ia laws Kristus e tetap ibas Ia, janah Ia tetap ibas Kristus.
• Geluhna arus rurat ibas Kristus. Rurat ras nggeluh ras Yesus, maka perpulungen ndatken kepentaren situhu-tuhu, sibanci mbedaken apai sisalah ras apai sibenar. Adi rurat nteguh ibas Kristus ugapa pe la melukah ijolah-joleken pengajaren si papak. Adi batang kayu megegeh rurat akarna la melukah mbulak, la melukah i ruah, angin meter pe la ngasup ngeruahsa.
• Kinitekenna arus reh gegehna
• Ngasup rusur ngataken bujur man Tuhan nggeluh ngataken bujur man Dibata. Perpulungen harus rusur ngataken bujur man Dibata, sebab ibas perkuah ate Tuhan maka perpulungen Kolose banci nggeluh ibas keselamatan,

2.      Ay. 8: Paulus mpersingeti perpulungen guna njaga kinitekenna gelah ula melukah itebu-tebu kalak si deban alu pengajaran si papak si rehna ibas manusia nari, alu kepentaren s idem taki pacik. Pengajaren e ngataken maka guna nandai Dibata ras ndatken keselamaten si tuhu-tuhu maka tep-tep kalak arus nembah man kesah (roh2) ras kuasa-kuasa si lit i awang-awang. Bagepe manusia arus patuh nandangi adat sunat ras adat peraturen-peraturen si deban.

 3.   Ay.9-10: Perpulungen arus metenget guna nandai biak Dibata si nggo tangkas dingen serta ibas Kristus si nggo jadi manusia, janah kegeluhen si serta e pe nggo ialoken kalak si tek ibas persadanna ras Kristus. Isingetken Paulus man perpulungen Kolose, gelah perpulungen Kolose tek man Kristus saja, sebab Kristus eme Dibata jine sireh ku doni enda ras jadi rupa manusia, janah Kristus ganjangen asangken kerina kuasa-kuasa si lit ibas doni enda ras kerina pemerentah si la teridah.      Adi kuasa Kristus ganjangan asangken kerina kuasa, maka lanai lit alasen guna mengandalken kuasa-kuasa di luar Kristus.

PENGENANNA/ APLIKASINA :

Harus siteh Yesus Kristus eme ulu kegeluhen ras keselamatenta. Adi nggo ersada ras Kristus maka kegeluhenta arus tetap ersada ras Kristus ras nggeluh rurat ibas Ia. Aminna gia genduari pe melala pengajaren ntah pe pengajuk doni si banci mabai kita papak, melala tawaran-tawaran doni enda si mereken pengarapen ras ngasup mereken jaminan nggeluh man banta, tapi teks ogen PJJnta enda mpersingeti kita gelah tetap metenget, njaga kiniteken ras pengarapennta tetap ernalem man Kristus sebab la lit kuasa kai pe I doni enda, si teridah bagepe si la teridah si ganjangen asangken kuasaNa. Kalak sitek man Yesus Kristus harus tetap nggeluh ibas Yesus, sebab nggeluh ibas Yesus lit jaminan keselamatan, janah labo lit ingan penalemen si deban si lebihen asangken IA.  Erkiteken sie me kita harus rurat ras nggeluh ibas Yesus. Sebab Yesus eme ulu kegeluhenta, kalak sirurat ras nggeluh ras Yesus ndatken kegeluhen situhu-tuhu. Ibas erti kata kegeluhen kinitekenta lalap ertumbuh, sebab kegeluhenta bagi batang kayu situmbuh ideher lau anak, sindatken kecukupen lau ras nakan tep-tep wari (bnd. Mazmur 1:3).  Bagepe singgeluh ras Yesus teridah ibas kegeluhenna tep-tep wari eme:

1. Biak Kristus nggeluh ibas kita janah jadi biakta: nggeluh alu bujur dingen benar, ndalanken singena ate/sura-sura Tuhan,  Meritaken Berita Simehuli (subuk arah kata ras perbahanan).
2. La melukah ijolah-joleken pengajaren si la benar sebab megegeh dingen paguh kinitekenta rurat ibas Ia. Emaka ibas rangka mperingeti GBKP si nggo berumur 124 tahun, warga GBKP arusna reh teridahna nggeluh ibas kiniteken si paguh, lanai dekahen monce-once.
3. Perlu pe siteh GBKP njayo eme ibas tgl 23 Juli 1941. Tanggal enda eme sidang Sinode sipemena i Sibolangit. Alu bage, tentuna GBKP nggo njayo sedekah 73 tahun. Jadi situhuna enda jadi persinget man banta, erkiteken genduari kita selaku gereja GBKP nggo bage dekahna njayo (mandiri) arusna reh teridahna min kedewasaanta ras kemandirianta ibas erkiniteken man Tuhan ras ndalanken tri tugas gereja. Selama enda, nggo pe njayo tapi GBKP tetap denga ka nge lit dat penampat ibas gereja-gereja/ Lembaga Penginjilan LN nari, janah PI nta pe terjeng internal denga dekahen, tentuna genduari nggo nge paksana kita erbuah, banci ka nampati gereja-gereja si deban, er-PI ku daerah-daerah ras di luar gerejanta. Sebab adi erbuah ertina labo kita ngenca nggejapkenca ras ngenanamisa, erti erbuah eme ernanam man kalak si deban.
   
   

SELAMAT MELAYANI & TUHAN MEMBERKATI

                                        (Pdt. Jenny Eva Karosekali STh. M.Min)