BAHAN PA MAMRE TGL 03-09 AGST 2014 RG GBKP CENGKARENG

BAHAN PA MAMRE TGL 03-09 AGST  2014 RG GBKP CENGKARENG

Ogen : Heber 12:14-17                                        Tema : Njagai Perturah Kiniteken

Point-point penting & Garis Besar : Heber 12:14-17

1.       Surat Heber enda isuratken tupung kalak Kristen paksa si e ngenanami kiniseran si mesangat kal, emaka tujun surat enda eme guna mpegegehi kiniteken kalak si tek ibas paksa si e. Ibas ngalaken situasi si lit ibas kiniseran tentu la seri kerina kengasupen kalak ibas ngalakenca, emaka ibas kondisi sibage rupa tentu iarapken kalak si megegeh kinitekenna banci nampati dingen mpegegehi si la megegeh kinitekenna. Bagepe arah suratna enda penulis Heber mereken piga-piga hal si jadi persinget guna mpegegehi kiniteken kalak Kristen ibas paksa e kerna kai si arus ilakokenna gelah ula surut ibas kinitekenna man Tuhan, antara lain persinget siisehkenna eme:

1.        Njaga relasi/hubungen si baik ras mehuli subuk ras teman manusia bagepe ras Tuhan, emaka nina: “Meriahlah ras ise pe, janah usahakenlah nggeluh bagi si ngena ate Tuhan. Tujunna jelas, adi mehuli ras meriah kita ras ise pe ras ndalanken si ngena ate Tuhan berarti arah si e kita nggo mpetandaken Tuhan man kalak si deban, janah teridah biak Dibata ibas kegeluhen kalak si tek (ayat 14). Adi meriah kita ras ise pe berarti ngasup kita ngaloken kerina kalak jadi temanta, kuan2 bhs Indonesia ngataken: 1000 teman kurang, 1 musuh mbuesa, ertina kalak si tek arah relasina si mehuli ras manusia bagepe ras Tuhan jadi kesaksin si mehuli man jelma si nterem guna petandaken Dibata.

  

2.       Kalak si tek isuruh gelah njaga dirina gelah ula surut ibas lias ate Dibata, ertina aminna gia lit ibas kiniseran si mesangat labo berarti la keleng ate Dibata. Bagepe njaga pengkebetna gelah ula jadi batu sandungan man ras nuhsahi jelma si nterem alu racunna (ay. 15).

3.       Kalak si tek ipersingeti gelah tetap njaga dirina gelah ola sempat erlagu la mehuli dingen la ngergai si meherga si enggo ialokenna ibas Dibata nari, selaku kalak si nggo ipilih Dibata janah nggo jadi “anak sulung” ibas kiniteken, gelah aminna gia arus ngalaken kiniseran ula sempat ndayaken kinitekenna erkiteken si e ibandingkenna ras kai silakoken Esau, si ndayaken “hakna selaku anak sulung” seh maka bene hakna guna ngaloken pasu-pasu selaku anak si ntua (ay. 16-17). Mekatep kalak si tek ibas jaman enda erkiteken tawaren-tawaran doni enda idayakenna kinitekenna, gelah banci bayak, naik pangkat/ dat jabaten, lako binagana, malem pinakitna.

2.       Kiniteken e iumpamaken bagi sinuan-sinuan, ijaga, ipekena-kena, isiram, ipupuki maka banci turah ras berkembang, bageka pe kiniteken arus tetap ijaga gelah mehuli perturahna. Uga carana maka banci torah terus kiniteken e? Lagu sekolah Minggu ngataken: “baca Kitab Suci doa tiap hari kalau mau tumbuh”, jadi alu berjuang ras berupaya bagepe mbangun relasi si mehuli ras Tuhan gelah tetap banci bertumbuh bersama ibas kiniteken man Tuhan. Arah bahan PA Mamre enda iarapken kerina Mamre njagai dingen mpekena-kena kerina hal si banci peturah kiniteken bersama ibas persekutuan Mamre. Ula sebalikna justru Mamre ka erbahanca ceda kiniteken kalak si deban, kenca nggo ikut Mamre maka kalak si deban nggo ka tehna ka macam-macam, sebab Mamre ka ngajarisa main kartu/ erjoker, rsd. Melalui bahan PA Mamre enda ipersingeti kerina Mamre maka tugas ras tanggung jawab Mamre nge njaga dirina ras njagai kinitekenna bagepe arah pengkebet geluhna e pe banci njagai pertumbuhan kiniteken kalak si deban.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)