BAHAN PA MORIA TGL 17 -23 AGUST 2014 RG GBKP CENGKARENG

BAHAN PA MORIA TGL 17 -23 AGUST  2014 RG GBKP CENGKARENG

Ogen : Galatia  4 : 27 - 31                                     Tema: PENTAR MAKEKEN KEBEBASAN

Penjelasen teks Ogen: Galatia 4:27-31

1.      Perikop enda nuriken maka kebebasen/kemerdekaan rehna ibas Dibata nari janah Dibata si ngasup mulahi ise pe ibas ketertindasen nari. Ibas teks enda ndai ikataken: “Meriahlah akapndu diberu si la banci mupus”. Ibas tradisi kalak Jahudi, diberu si la banci mupus ianggap “aib”, menyedihkan janah diberu sibage iakap kena “kutuk” emaka la dat pasu-pasu.  Tapi justru ibas bagin teks enda justru ikataken sebalikna  “meriahlah akapndu diberu si la banci mupus,” engkai maka banci ermeriah ate? Ayat enda ikaitken kubas Janji Dibata. Bagi Sarah, diberu si la banci mupus (mandul) si mengalami ketertindasen erkiteken pemahamen si nggo jadi tradisi ibas masyarakatna, tapi justru Dibata mulahi ia tekanan budaya/tradisi ras tekanan sosial e alu mereken tuah man bana ibas usiana si nggo metua, la masuk akal tapi lalit si metahat ibas Tuhan. Aminna gia Hagar banci mupus tapi ia tetap nge diberu si jadi budak man tapi Sarah aminna gia ia “mandul” tapi justru ia bebas ibas tekanan sosial/tradisi ras budaya si lit erkiteken Dibata si mulahi ia. 

2.      Hagar (budak) Sarah  ipebali/ iandingken Paulus ijenda ras kalak Jahudi/Israel si nggeluh denga iteruh hukum Taurat si ertina bangsa Israel pe tetap denga jadi “budak” nandangi Undang-Undang. Ipersingeti Paulus perpulugen Galatia maka Jesus nggo mulahi ras mbebasken kita ibas kuasa dosa ras lanai kita budak nandangi dosa ras nandangi hukum Taurat tapi jadi manusia si bebas guna ndalanken si ngena ate Dibata, ndalanken kebenaren, keadilen ras kebujuren. Kalak si nggo bebas ngasup makeken kebebasenna alu la biar-biaren, la melukah ipengaruhi kalak si deban, kai pe siibahan/silakokenna la erkiteken dibawah ancaman/tekanan atau paksaan tapi alu ukur si meriah dingen menahang.

3.      Tradisi Jahudi la ndauhsa ras tradisi/budayanta kalak Karo sebab system masyarakatna menganut system “Patriakhal” (garis keturunan ayah), janah terkesan maka dilaki lebih “superior” dari pada diberu. Erkiteken si e,  seh ibas paksa enda melala dengan nge diberu mengalami diskriminasi, tekanan erkiteken budaya ras tradisi, ketidakadilan ibas hukum ras sidebanna. La ngenca alasen budaya/tradisi si la memihak man diberu, tapi erkiteken dilaki merasa lebih superior emaka mekatep ka nge timbul kekerasan nandangi diberu, termasuk kekerasan fisik ras mental. Tentuna enda kerina jadi tantangan si man alankenta selaku diberu.

4.      Tapi bas dampar si deban melala ka nge kesempaten2 si nggo terbuka nandangi diberu subuk ibas lingkungan gereja, masyarakat ras pemerintahan. Emaka ibas kebebasen si nggo terbuka enda arah PA Moria enda iajuk ras ipersingeti kita kerina Moria gel aula nia-niaken kesempatan si lit e. Katawari saja adi lit kesempaten guna ncidahken kualitas dirinta mari sipakeken kesempaten e, contohna: adi ibere kesempatan man banta nuriken Kata Dibata ibas PJJ, adi lit kesempatan guna maju sebagai calon Pertua/Diaken ula kita erpenulak, adi lit kesempaten man banta guna jadi pemimpin, pakeken alu maksimal. Guna sie tentuna Moria (diberu) kerina arus tetap nggit erlajar guna nambahi pemeteh, mengembangkan potensi diri si lit ibas kita gelah kualitas SDM nta kerina diberu reh meningkatna janah banci iidah jelma sinterem kemajun diberu. Adi Dibata si nggo mereken kebebasen man banta, adi Ibu Kartini nggo mperjuangken hak-hak diberu ras mbuka kesempaten man diberu mengenya pendidiken setara ras dilaki emaka sipakekenlah kebebasen/kemerdekaannta e alu dem tanggung jawab. Sebab melala ka nge kita diberu enda tetap denga mentalta mental “tertindas” janah riahen siakap ka ibas tekanan e, lit pe kesempaten guna maju ibas pendidiken, melala ka nge diberu enda pangen akapna lampas erjabu, la nggit maju ras berkembang. Pentar makeken kebebasen ertina ertanggung jawab ras la nia-niaken kebebasen si nggo ibereken Dibata man banta diberu guna terus erlajar ras nggit maju.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)