BAHAN PJJ 17- 23 AGUST 2014 RG GBKP CENGKARENG HUT MAMRE GBKP Pe-19 ken

BAHAN PJJ 17- 23  AGUST 2014 RG GBKP CENGKARENG

HUT MAMRE GBKP Pe-19 ken 

OGEN : PERB. 10:1-2                                                      Tema: “MAMRE GBKP SI ERKUALITAS ”

PENJELASEN TEKS OGEN :

1.      Kitab Perbahanen Rasul-Rasul si itulisken Lukas nuriken kerna kai si idahiken ras iajarken Tuhan

Jesus, arah kuasa Kesah Si Badia si erdahin ibas diri  ajar-ajarNa ras perpulungen si pemena. Arah kitab enda teridah maka Berita Si Meriah terus berkembang mulai i batas Jahudi si sempit nari terus ku darat kalak Jahudi, si lenga nandai Dibata, aminna pe lit nge si ngelawan ras si berusaha nebengsa.

2.      Teks ogen enda ndai nuriken kerna Kornelius, sekalak bangsa Roma. Tuhan Jesus arah sada pengenehenen nuruh rasul Petrus nginjili Kornelius. Kornelius me kalak non Jahudi sipemena jadi kalak Kristen (Perbahanen Rasul-Rasul 10). Lit piga-piga kualitas Kornelius si perlu si eteh, si banci jadi pelajaren man banta kerina perpulungen, secara khusus man MAMRE GBKP. Kualitas Kornelius la secara doni ngenca tapi pe secara pertendin. Alu bage kualitasna e kuh ntah pe lengkap. Kai saja kualitas Kornelius? Sipemena, Kornelius sekalak komandan ibas pasuken tentara Romawi si igelari pe "pasuken Itali" (ayat 1). Alu bage si eteh maka ia labo sekalak prajurit si meteruk tapi perwira menengah ntah pe banci kataken perwira tinggi.Sipeduaken, ia kalak tutus ibas agama (Indonesia: "saleh"). La ia anggap enteng ras main-main kerna agama ntah pe kiniteken. Tapi tutus kal atena. Sipeteluken, ia ras isi jabuna nembah man Dibata (Indonesia: "takut akan Allah"). Aminna pe ia kalak Roma tapi ia eragama Jahudi si nembah Dibata. Janah la ia saja, tapi ikut pe ndeharana ras anak-anakna. Sipeempatken, ia nampati kalak Jahudi si musil (Indonesia: "memberi banyak sedekah"). Melumbar ia lako nampati kalak Jahudi si musil ras kepiceten. Ia erdiate ku sekelewetna, janah erpemere. Janah sipelimaken, ia la erngadi-ngadi ertoto). ku Dibata. Alu teratur ras tetap ia ertoto (ayat 2).

3.      Kualitas SDM si mehuli erbahanca Kornelius jadi komendan ibas pasuken khusus i tentara Roma. Maka banci ia jadi komandan, tentu saja alu perjuangen si luar biasa, arah proses si nggedang. La lit kualitas si mehuli idat alu instant. Ngawan ni perpulungen secara umum, ras MAMRE GBKP secara khusus arus terus ras tetap tutus, patuh, erlajar, erjuang, erusaha meningkatken pendahin ras karierna ija ia erdahin ntah encari. Pakelah tetap kesempaten guna ningkatken kualitas pendahin ras pencarinta. Ula minter puas nangdangi si enggo idat, tapi pindolah tetap man Tuhan gelah reh entebuna kegeluhenta. Kualitas ketutusen eragama/ erkiniteken pe arus itingkatken. Marilah bagi Kornelius, ia tutus eragama. Ia sekalak si soleh ntah pe saleh. Kalak si tutus eragama teridah kap ibas pengerana, pengenehenna ras perbahanenna si tep-tep wari. Ngasup kita nilaisa sesekalak e tutus (saleh) ntah lang arah pengkebetna si tep-tep wari. La ia megangjang ngerana, la tual, la anceng, la cekurak. Pengehenenna pe erbahanca teneng ras dame kalak. Lit kalak arah pengenehenna pe tempa-tempa nelen atena, sombong, curiga, mpeteruk kalak si deban. Arah perbahanenna erbahanca senang dingen malem ate kalak.

4.      Bagi Kornelius ras isi jabuna nembah man Dibata, MAMRE pe arus bage. Kiniersadan jabu ersembah man Tuhan jadi perayaken ntah prioritas MAMRE. Lit bas jabu MORIA-na ngenca tutus ersembah man Tuhan, MAMRE-na riahen akapna i rumah, i kede, nehi hobbina. Sebalikna pe lit MAMRE tutus ersembah, MORIA-na riahen akapna nonton sinetron, cekurak, ras gawah-gawah kujah kuje. jabu si bage bali ras sorong sada ban, nonggali, nggandili. Guna si e MAMRE arus ngasup encidahken tanggungjawabna selaku ‘bapa rohani’ (imam ras serayan nonformal) i tengah-tengah jabuna. 

5.      Kualitas Kornelius teridah tole arah ia nampati. Melumbar ia mere (bersedekah) man kalak musil. Kualitas kiniteken la terlepas ibas nggit erdiate ras erpemere. Idahna kepiceten kalak. La ia tutup mata ras EGP (Emang Gue Pikirin) man kakak si medanggel. Pakelah kuan-kuan Karo nina ‘Jadilah penampat man kalak si deban, labo nampeti’. Kita banci jadi penampat arah kinilitenta, rejeki ras pemereta man kalak si deban. Ula pelit ras serakah. 

6.      Teruslah ertoto man Tuhan. La erngadi-ngadi ertoto man Bapanta sini surga. Kalak si tetap ertoto eme kalak si nggejapken perkuah ate ras keleng ateNa, ernalem ia man Tuhan labo gegehna ras beluhna saja. Kalak si tetap ertoto eme kalak si njaga komunikasi si mehuli ras Tuhan. Kalak si ertoto eme kalak si tetap njaga kesah kinitekenna.

7.      Kualitas ertina: "kadar, isi, mutu" si mehuli. Kegeluhenta manusia pe arus erkualitas ras ertambah erkualitasna wari ku wari. Kualitas sebage sada kearusen, mutlak ntah pe la banci lang. Kalak si erkualitas erguna kal ras iperluken kalak si enterem kal. La erkualitas erbahanca kegeluhen la erguna, kisat kalak ndeher ras jumpa. Puji Tuhan, ibas tgl 26 Agustus 2014 enda genep 19 tahun MAMRE GBKP. Kerina MAMRE (persadan perbapan GBKP) tentu merincuh, ngarap ras ngayak gelah kualitas kiniteken ras kegeluhen jadi bas geluhna. La kebetulen MAMRE GBKP itamaken Tuhan selaku imam i tengah-tengah jabu, perbulangen man ndehara, bapa man anak-anakna ras sebage warga i tengah-tengah masyarakat. Sura-sura Tuhan eme gelah jabu Kristen jadi jabu si ermalem ate, jabu si ipasu-pasu ras jabu si mpermuliaken Tuhan.

SELAMAT MELAYANI & TUHAN MEMBERKATI