BAHAN PA MAMRE TGL 17-23 AGUST 2014 RG GBKP CENGKARENG

BAHAN PA MAMRE  TGL 17-23 AGUST  2014 RG GBKP CENGKARENG

Ogen : KUAN-KUANEN 13:20, 27:10                                    Tema: PENTAR IBAS ERTEMAN

Penjelasen teks Ogen: KUAN-KUANEN 13:20, 27:10

1. Kitab Kuan2en eme kumpulen Kitab2 Hikmat, si isina  kerna pengajaren agama ras ajaren uga arusna ndalani kegeluhen si tep-tep wari alu payo, dingen nggeluh alu pentar. Inti ibas kerina Kitab Kuan-kuanen eme : Kuan2 1: 7  sinuriken maka ulu, kerina pemeteh ras palas kepentaren eme erkemalangen man Tuhan. Alu hikmat ras kepentaren si rehna bas Dibata nari nge si erbahanca kita ngasup ngaturken kegeluhenta alu mehuli dingen mabai kita kubas keberhasilan geluh ras kebenaren Dibata.

2. Kuan-kuanen 13:20 si jadi ogen PA Mamre enda nuriken kerna kepentaren ibas erteman bagepe ibas ersenina ras sangkep nggeluh. Engkai maka ipersingeti kita gelah pentar ibas erteman sebab biasana: ras ise kita erteman/bergaul mbue sitikna pasti maba pengaruh kubas biak, cara geluh, sikap rasp e termasuk banci mpengaruhi kinitekennta. Adi kita erteman ras kalak bodoh, kitape dungna jadi bodoh. Adi kita erteman ras bergaul ras kalak si perkisat lambat laun kitape terpengaruh ras terbiasa nggeluh perkisat. Emaka ipersingeti kitab Kuan2en ijenda ndai gelah pentar min kita ibas erteman, tapi tentu ijenda maksudna labo guna ngajari ras mabai Mamre gelah rayo-rayo ntah pe milih-milih ibas erteman tapi bijaksana ras pentar ibas bergaul akrab ras dekat ras ise pe alu nandai biak/karakter kalak si ate Mamre itemanina e. Tujunna tentu gelah arah pertemanen Mamre banci reh berkembangna Mamre kubas hal si positif ras mabai kiniulin man dirina, labo sebalikna arah pertemanen e mabai Mamre ndabuh kubas pergaulan si la payo dingen la benar, la sue ras si ngena ate Dibata. Ertina pertemanen arusna ningkatken kualitas diri, biak/karakter ras kiniteken Mamre kubas kegeluhen si lebih mehuli asangken si enggona.

3. Ibas bagin teks Kuan2 27:10 ituriken gelah ngasup kita njagai pertemanen si nggo terjalin mehuli gelah ula ceda emaka arus irakut alu keleng ate, kekelengen si tulus ras la ngarapken balasen. Janah si jadi penekanen ibas bagin enda eme uga kita arus ngergai hubungan pertemanen si nggo mehuli e subuk man teman sekelewetta/ tetangga, teman erdahin, masyarakatta si lit isekitarta sebab justru eme teman si lebih dekat/ si ndeherna ras kita. Kedekatan relasi/hubungen dareh labo jadi hal siutamana kal ibas mbangun relasi pertemanan si mehuli digen baik, sebab teman si mehuli mawen2 ergan asangken keluarga ras sangkep nggeluh si ndauh inganna tading ras kita sebab kai pe si terjadi ibas kita leben nge teman sebalengen/tetangganta e si ngidahsa/si metehsa janah si banci pedas nampati kita.

4. Kinatana melala denga Mamre salah ibas bergaul ras menjalin pertemanan, si la pentar erteman she maka melala nge perbapan e ceda kinitekenna erkiteken salah pergaulan. Pentarlah Mamre bergaul gelah geluhna reh ulina, pertemanenna maba kiniulin ras kerihen la ngenca man bana tapi pe man isi jabuna.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)