BAHAN PA MAMRE TGL 24-30 AGUST 2014 RG GBKP CENGKARENG (HUT MAMRE PE-19-KEN & HUT RI 69)

BAHAN PA MAMRE TGL 24-30 AGUST  2014 RG GBKP CENGKARENG

(HUT MAMRE PE-19-KEN & HUT RI 69)

Ogen : Nehemia 1:1-4                                                              Tema: KEPATE NANDANGI SEKELEWETNDU

Penjelasen teks Ogen: Nehemia 1:1-4

1.     Nehemia mbelin i taneh pembuangen Babil, kenca bangsa Israel (Juda) itaban 70 tahun dekahna I Babil, kerajaan Babil italuken Persia,emaka kerina tabanenna pe termasuk bangsa Juda iteruh kuasa Kerajaan Persia. Ibas jaman Raja Kores (Raja Persia) me bangsa Israel si itaban e iberekenna mulih ku Jerusalem, rombongen sipemena mulih ipimpin Serubabel janah mulai me ibangun tembok Jerusalem. Rombongen  sipeduaken ipimpin imam Esra janah ibas paksa si e me ibangun Rumah pertoton Tuhan mulihi.

2.     Nehemia sekalak pegawai istana Persia janah jadi juru minum Raja ibas jaman Raja Artaserses. Jadi juru minem raja tentulah dahin si ndatken kepercayaan si mbelin ibas Raja nari sebab adi la sekalak si terpercaya tentu membahayaken nandangi keselamaten raja.

3.     Ibas teks ogen enda ituriken maka Nehemia ndatken berita arah seninana ras piga-piga kalak si reh I Jerusalem nari kerna kecibal geluh bangsana si nggo mulih dingen tading I Jerusalem si lit ibas kiniseran si mesangat, tembok Jerusalem si nggo ibangun mulihi nggo ka sontar janah bangsa-bangsa si deban si tading isekelewet Jerusalem megombang dingen usur nguru-nguru bangsana (ay.2-3) Mbegi berita enda ceda kal ate Nehemia kenca rombongen si pemena ras sipeduaken mulih ku Jerusalem tapi kecibal bangsana lenga kepeken pulih ras mehuli. Emaka itungtungken Nehemia ukurna ras sura-surana man Tuhan alu tangis, erpuasa ras ertoto (ay.4). Teridah ijenda uga biak mediate ras kepate Nehemia nandangi bangsana. Sikap pe geluhna bas istana Raja i Persia, tapi kerinana e la ternanamisa janah la erbahanca meriah ukurna nginget kecibal geluh bangsana ras kuta kemulihenna Jerusalem s idem alu perbeben. Rutang iakapna bana muat bagin guna mpenahangi baban mberat bangsana ras terlebih guna mbangun mulihi kota kemulihenna Jerusalem.

4.     Arah Tema ras teks ogen PA Mamre enda ngajuk ras mabai kerina Mamre gelah  peturah rasa kepedulian nandangi sekelewetna. Point-point penting sibanci jadi perenungen ras usihen ibas pengalamen geluh Nehemia eme:

1.      Uga Mamre banci ngusih biak Nehemia si (mediate ras kepate) nandangi perbeben ras kiniseran kalak/bangsana. La berlaku ibas Nehemia kuan-kuan Karo: “kutera kalak kutera, beltekku mbelin kubesuri”, aminna gia sikap geluhna ibas istana tapi la ternikmatisa emaka ceda kal atena janah tangis ia mbegi berita ras meteh kondisi ras kecibal geluh bangsana.

2.      La terjeng nandangi kiniseran bangsana tapi pe ia kepate tapi pe nandangi keadaan kuta kemulihenna, Jerusalem. Lit semangat “Marsipature hutanabe” (Pesikap kuta kemulihen) ibas diri Nehemia, emaka erburak-burak kal ukurna guna banci mulih dingen mbangun kuta kemulihenna Jerusalem. Lit pepatah ngataken: Walau hujan emas di negeri orang masih lebih baik hujan batu di negeri sendiri. Prinsip geluh Nehemia, sikap pe nggeluh i negeri kalak tapi labo jadi keriahen ras la malem atena adi ibegina sontar dingen rontas denga tembok Jerusalem.

3.      Nehemia ngaduken kerina isi pusuh ras ukurna dingen kesusahenna nginget perbeben bangsana man Tuhan arah ertoto ras erpuasa sebab tek ia maka pertotonna e ibegiken Dibata. Janah terbukti pertoton Nehemia ibegiken Dibata seh maka Raja Persia nuruh ia mulih ku Jerusalem dingen mimpin bangsa Juda nerusken mulihi pembangunan tembok Jerusalem dingen kenca si mereken kepercayaan man Nehemia merentah selaku gubernur Juda, juru minem raja jadi gubernur Juda.

5.     Ibas HUT Mamre pe 19 ken enda seh ija Mamre nggo mediate ras kepate nandangi kegeluhen si lit isekelewetna, uga nggo Mamre mediate ras kepate nandangi kegeluhen kalak karo, senina turangta korban deleng Sinabung? Pernah nge Mamre ertoto ras erpuasa guna kondisi ras keberadaan kuta kemulihenta “Takasima (Tanah Karo Simalem” si lit ibas kondisi si memprihatinken genduari, la ngenca arus ngalaken bencana erupsi deleng Sinabung, tapi pe kondisi masyarakatna si paksana “sakit”, masalah narkoba ras  penyebaran HIV/AIDS si cukup tinggi, bagepe kondisi pendidikan si terpuruk. Kai si banci ilakoken Mamre tandana ia mediate ras kepate ? Ula kari mottona ngenca: Mamre erdiate, Mamre erpemere, tapi tetap diam ibas ngidah kondisi sib age rupana si terjadi I sekelewetna…..enda jadi refleksi ras perenungen man Mamre gelah “berbuat sesuatu” (do something).    

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)