BAHAN PA MORIA TGL 31 AGST – 6 SEPT 2014 RG GBKP CENGKARENG

BAHAN PA MORIA TGL 31 AGST – 6 SEPT  2014 RG GBKP CENGKARENG

Ogen :  Mat. 15: 21-28                                Tema: MEGENGGENG NGALAKEN PERBEBEN JABU

Penjelasen teks Ogen:

1.      Perikop enda nuriken kerna perjuangan sekalak pernanden (diberu Kanaan) guna anakna siiseluki setan, gelah ipepalem Jesus. Kejadin enda terjadi sanga Jesus I daerah Tirus ras Sidon, daerah di luar wilayah Jahudi. Tupung paksa si e lit pemahaman maka kalak di luar Jahudi ianggap kafir janah la atan ngaloken keselamaten ras keleng ate Dibata sebab la termasuk bagin ibas “bangsa pilihen”.

2.      Aminna gia ia diberu Kanaan, ianggap Kalak Jahudi selaku bangsa Kafir, najis, hina ras rendah tapi jelas itandaina ise Jesus arah pengakunna: “O Tuhan, anak Daud…”. Ertina iakuina maka Jesus eme Tuhan, janah kesusuren Daud, bagepe tek ia maka Jesus ngasup mpepalem anakna si iseluki setan. Point pentingna ijenda: justru kalak siianggap kafir (perbegu), la termasuk bangsa pilihen, tapi justru itandaina dingen iakuina ras tek ia maka Jesus eme Tuhan, sementara nterem kalak Jahudi justru erpenulak nandangi Jesus janah la tek maka Jesus eme Tuhan. Jadi perikop enda situhuna sada teguran/sindiran nandangi kalak Jahudi si la ngakui kerna ke”ilahian” Jesus.

3.      Aminna gia ia ras pemindonna “tempa” la iperdiateken ras la ibegiken Jesus, aminna gia ia irendahken alu perkataan Jesus: “la patut ibuat nakan anak-anak jenari ibereken man biang”, tapi diberu enda ndai tetap megenggeng, la ia megelut, la ia nembeh ntah pe mbenceng, aminna gia ipeseri Jesus dirina ras ‘biang’. Biang man kalak Jahudi eme “menajisken” janah bage ka nge kalak si la Jahudi pe ianggap kalak Jahudi “najis” emaka kalak Jahudi labo nggit bergaul ras ndeher ras si la Jahudi sebab “haram hukumnya”. Tapi reaksi diberu Kanaan enda luar biasa, la ia putus asa/ menyerah dingen mulih tapi tetap berjuang guna ndatken kai siiarapkenna, eme gelah anakna ipepalem. Teridah jenda uga ia “sadar diri”, itehna ise ia, labo termasuk bangsa pilihan, ras meteruk ukurna emaka la ia megelut. Cataten pentingna: kalak si ianggap kafir (perbegu) la nandai Tuhan, tapi ibas ia justru mbelin kal kiniteken, pengarapen ras kiniteruken ukur. End ape jadi teguran si cukup tegas ras keras kal man banta, ula kari kita siigelari kalak si erkiniteken tapi justru melukah kal megelut, mbenceng, menyerah dingen putus asa. Ciri-ciri kalak si erkiniteken justru arusna tangguh, megenggeng, la melukah putus asa sebab mbelin pengarapenna, ermeteruk ukur emaka la melukah megelut. Enda kerina justru teridah ibas diberu Kanaan enda ndai. Arah peristiwa enda pe ate Jesus mbuka wawasen ras pemahamen/paradigma baru man kalak Jahudi maka situhuna Misi Jesus ras tujun kerehenNa labo man kalak Jahudi saja tapi man kerina kalak/bangsa.

4.      Ajar-ajar Jesus pe ngerana, nina: “..pelawes min diberu e, sebab gejek ia arah pudinta.” Sikap ajar-ajar ijenda ncidahken sikap si la mediate janah la kepate (sitik pe la berempati ras la er-ate mekuah) nandangi diberu Kanaan enda. Mekatep sikap ajar-ajar pe lit dingen terjadi ibas kita, kurang mediate ras la kepate nandangi perbeben kalak si deban.

5.      Jesus njumpai kiniteken si tuhu2 mbelin ibas diberu Kanaan (bangsa Kafir), si justru la ijumpaiNa ibas kalak Jahudi selaku bangsa pilihen. Ikataken Jesus man diberu Kanaan enda ndai : “ Kam sekalak diberu si tuhu-tuhu tek man Dibata”. Enda ikatakenNa erkiteken sikap ras perjuangan diberu enda ndai, si la megelut amin gia ihina, megenggeng ibas ngalaken kerina tantangen si isehken man bana, tuhu2 berjuang, la menyerah, meseksek guna ndatken pengarapenna, emaka ialokenna kai si iarapkenna, ipepalem Jesus anakna. Perikop enda tentuna jadi pergegeh ras mereken motivasi man Moria selaku nande si erkiniteken gelah:

1.      Jadi Moria si semangat terus berjuang nehken kai siisuraken ras kai siiarapken kita nandangi kegeluhen jabu, perbulangen ras anak2ta.

2.      Jadi Moria si megenggeng, kai gia perbeben si man alanken sebab kita selaku nande (tiang tinande, ingan jabunta tertande). Nande si megegeh/tangguh, la gampang putus asa ibas ngalaken erbage-bage tantangen sireh kubas kegeluhen jabunta.

3.      Jadi Moria si ngasup meteruk ukur, emaka la melukah megelut aminna gia lit si la ngergakenca, gia irendahkan/ihina kalak la melukah mbenceng/ngadi ibas usaha ras upaya siilakoken kita. 

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)