BAHAN PJJ 31 AGST – 6 SEPT 2014 RG GBKP CENGKARENG (HUT PERMATA GBKP PE-66-KEN)

BAHAN PJJ 31 AGST – 6 SEPT 2014 RG GBKP CENGKARENG

(HUT PERMATA GBKP PE-66-KEN)

OGEN :    I Sam. 3 :15–21                                       Tema: “Tutus, Bujur Ras Itemani Tuhan”

LATAR BELAKANG :

Samuel eme Anak dilaki ibas  Elkana ras Hana. Tuhan ngidah uga kecedan ate Hana erkiteken usur kiduana nakiti ia sebab lalit anakna, emaka ibegiken Dibata pertoton Hana. Erkiteken Hana bernazar maka kenca ngadi minem, Samuel iendeskenna man Tuhan guna erdahin ibas Kemah Tuhan kidekah geluhna. Emaka Samuel erdahin ibas Kemah Tuhan nampati imam Eli, ibas paksa umur si nguda, janah ia me si nggantiken Imam Eli  selaku imam ras Hakim ras nabi kidekah geluhna( I Sam 7 : 15).

Penjelasen Teks : I Samuel 3 : 15 – 21

Ay. 15-16 : Eli eme sekalak imam  i Rumah Pertoton i Silo. Ibas pudi-pudi kegeluhen Eli, nggo merak-rak Tuhan ncidahken baNa. Tapi iteh Eli  Tuhan reh dingen ngerana man Samuel erkite-kiteken ibas sada berngi telu kali Samuel reh ndahi Eli, akapna Eli sindilo ia (band. Ayat 5-8), emaka ibas erpagi-pagi isungkunna kerna kai siikataken Tuhan man Samuel.

Ay. 17-18 : ituriken Samuel man Eli kerna sura-sura Tuhan guna  ngukum keluarga Eli, maka la lit persembahen gelehen ntah pe persembahen sideban  sibanci nangtangi dosa keluarga Eli e  sebab nggo mejin kal dosa-dosa siibahan keluarga Eli (bdk. ayat 14). Perlu siteh ibas kegeluhen beragama bangsa Israel, adi sesekalak jelma nggo erdosa, maka arah persembahen gelehen ntah pe persembahen tutungen ras pengalemi dosa, dosa e banci ialemi Tuhan. Dosa keluarga Eli la teralemi Tuhan erkite-kiteken anak-anak Eli eme Hopni ras Pinehas nggo   nangko kai siseharusna jadi sekerajangen Tuhan eme persembahen gelehen siharusna ipersembahken bangsa Israel man Tuhan. Bagepe Hopni ras Pinehas erbahan erlua-lua ras diberu-diberu singelai i dalan bengket ku  Rumah Pertoton. Perbahanen simejin ras kemali  kegeluhen Hopni ras Pinehas e, maka  nggo jadi batu antuken man kalak Israel. Berita penghukuman Tuhan man keluarga Eli siipeseh Samuel teraloken Eli sebab tehna Tuhan e erkuasa ras la ngena ate Tuhan kerna sijahat, janah hak Tuhan ngukum kalak sierbahan jahat.

Ay. 19-21 : Tuhan tetap ras Samuel, emaka kai ate Tuhan nandangi bangsa Israel, ipeseh Tuhan arah Samuel janah ipeseh Samuel man bangsa Israel, emaka bangsa Israel meteh maka Samuel tuhu-tuhu sekalak nabi Tuhan emaka iikutkenna kai siikataken Samuel. Jadi tuhu-tuhu  kebenaren ibas Tuhan nari sipeseh Samuel, janah lagu langkah Samuel pe la erpandangen i lebe-lebe Tuhan.

APLIKASI

            Pembahasenta sekali enda berhubungen ras HUT Permata pe 66 ken, tentu ibas ertambahna umur PERMATA ertambahna ka min kualitas anak Permata ibas ncidahken identitasna selaku anak Dibata eme guna kemulian Dibata, sebab man bana me pagi i warisken kerina beban ras tanggungjawab lako pembarken berita si meriah dingen masa depan gerejanta.  Permata harus mpersiapken dirina gelah banci jadi Samuel masa kini,  si encidahken keteladanen ibas kegeluhenna ibas masa ngudana, jadi pemimpin si maba perubahan i tengah – tengah bangsa si mbelin. Piga-piga hal si man usihen ibas Samuel aminna gia nguda denga:

1. Samuel nggeluh bagi singena ate Tuhan mulai ia nguda denga seh pe metua, nggeluh ibas kebujuren ras terteki. Enda me me siniharapken ibas kegeluhen Permata.  
2. Terus menerus nggit erlajar kerna kata Dibata ras patuh man Dibata ibas segedang geluhna seh maka kerina kegeluhenna tetap i temani Dibata.
3. Ngasup ncidahken kebujuren ras ketutusen selaku nabi, emaka ibas tep – tep kali ia ngerana kerina kalak Israel megiken ia (I Sam 3 : 21).
4. Ia me si merombak sosial politik bangsa Israel ibas ia masu – masu Saul ras Daud jadi raja kalak Isarel (I Sam 15 – 16).
5. Ibas sepanjang sejarah kegeluhen bangsa Isarel, Samuel tetap i inget sebage sekalak tokoh si mbelin ras eme maka ibas kematenna kerina kalak Israel ngandungisa (I Sam 25 : 1).

Man banta selaku orang tua, tentu labo ateta hanya menuntut kegeluhen si mehuli ibas anak-anakta si nguda,  Permata, tapi kita sendiri pe selaku orang tua arus ngasup ncidahken kualitas kegeluhen si mehuli ras jadi teladan siman usihen. Kegagalen imam Eli eme: gagal ras la ngasup ngajarken anak – anakna ibas nggeluh tutus ras bujur, emaka jaminen penemani Tuhan la ialokenna, sebalikna iukum Tuhan, la ngenca anak-anakna tapi pe imam Eli ras kesusurenna. Teridah ijenda maka Dibata mindo pertanggungjawaben orang tua ibas kegeluhen anak-anakta. Tentu la ateta kai siisehken Tuhan man keluarga Eli terulang ibas jabunta, dage gelah ula jadi, mari dage silumbaken nggeluh erkemalangen man Dibata alu tutus, bujur ras terteki ibas kai – kai pe sebab adi sekalak (Mamre/Moria) si labo erkemalangen alu tutus man Dibata, nggeluh bujur ras la terteki ibas kai pe, uga nina banci jadi teladan man anak – anakna ?

Dage, nggeluh tutus, bujur ras terteki ibas kai pe, eme kap salah sada tolak ukur maka kita lit ibas pertumbuhen rohani si mehuli. Emaka mari dage erlumba – lumba kita ncidahken kualitas kegeluhen sibage rupana segelah ermulia Tuhan ibas kegeluhenta terlebih – lebih kita kerina warga GBKP.

SELAMAT MELAYANI & TUHAN MEMBERKATI