BAHAN PA MAMRE TGL 31 AGST- 6 SEPT 2014 RG GBKP CENGKARENG

BAHAN PA MAMRE  TGL 31 AGST- 6 SEPT  2014 RG GBKP CENGKARENG

____________________________________________________________________________________

 Ogen : DANIEL 1:1-19                                                      Tema: PENTAR NJAGA KESEHATAN

Penjelasen teks Ogen: DANIEL 1:1-19

1. Ay. 1-4 : Kitab Daniel nuriken kerna kegeluhen kalak Jahudi tupung paksa lit ibas kiniseran iteruh kuasa ras tabanen bangsa Babel. Ibas paksa pemerintahan Raja Nebukadnesar, Jerusalem iserang janah ipelepas Tuhan raja Joyakim ras bangsa Juda itaban bagepe erta-erta ibas Rumah Pertoton Tuhan irampas. Daniel, Hananya, Misael ras Asaria termasuk ibas piga-piga anak perana ibas bangsa Juda siitaban ku Babel, siipilih guna erdahin ibas istana raja erkiteken mejile rupana, pentar, mbages pemetehna, pedas nangkap pelajaren, janah lalit si man pandangen ibas kulana.
2. Ay. 5-16 : Lit perentah raja maka kerina kalak si terpilih guna erdahin ibas istana raja e arus ipersiapken ras iajari ngoge ras nuratken cakap Babilon janah ndalani latihan selama 3 tahun. Ibas masa persiapen ras latihan e ibereken pangan ras anggur, seri ras pangan kalak si ringan ibas istana raja. Daniel ras 3 temanna e nggo netapken ibas ukurna maka la ia nggit ngelanggar aturen agama alu man pangan siitetapken raja emaka ipindona gule-gulen saja man panganna ras lau saja jadi inemenna. Sebab ibas pangan si itetapken raja e banci saja lit ije siipantangken rikutken aturen agama kalak Jahudi, janah biasana ope lenga ihidangken nggo leben ipersembahken man berhala-berhala kalak kafir. Ketetapen ukur Daniel ras teman-temanna ncidahken maka :

1.      Daniel lebih memilih mbiar man UU Tuhan asangken patuh man ketetapen raja, kai gia resikona.

2.      La ia nggit kulana “tercemar” alu pangan-pangan si menajisken kula rikutken aturen agama Jahudi aminna gia pasti siisikapken e ntabeh sebab pasti labo pangan sembarangen sebab pangan e pangan standart/ukuran istana. Teridah ijenda uga Daniel ras teman-temanna ngasup njaga kebadian kulana ras ngkuasai diri ras ‘nafsu’ kedagingenna.

Kenca nggo sepuluh wari teridah maka ulin rupana dingen mbestangen dagingna, ertina lebih terjaga kesehaten daging kulana asangken kerina kalak si man pangan raja ndai. Jadi kepatuhen ndalanken UU Tuhan alu ngasup menguasai ras mengendaliken nafsu/keinginan daging, njaga kebadiaan kula (kekudusan tubuh selaku Rumah Pertoton Kesah Si Badia mbelin pengaruhna kubas kesehaten jasmani/daging kula.

3. Ay. 17-19 : Erkiteken kepatuhen Daniel ras teman-temanna nandangi aturen agamana ras belinen kebiarenna man Dibata asangken man raja emaka ipasu-pasu Dibata ia empatna, ibereken Dibata pemeteh ras kebeluhen kerna erbage-bage surat rikut ras kepentaren si deban. Tambah si e pe man Daniel ibereken Dibata kebeluhen lako ngertiken pengenehenen ras nipi. Kenca seh 3 tahun e ibaba me kerina anak perana pilihen e ngadap ras ercakap-cakap ras raja janah Daniel ras teman-temanna eme si ngenana ate raja Nebukadnesar sebab kai pe penungkunen ras persoalan si kuga gia siibahan raja, anak perana si empat enda beluhen njababsa 10 kali lipat asangken guru-guru si beluh ngoge nasib ntah guru-guru permangmang si lit  ibas kerajan e.
4. Njaga kesehaten daging kula arah njaga 5P (Perpan, Perpinem, Perukuren, Perpedem, Pergeraken/Olah Raga) termasuk bagin ibas kepatuhen man Tuhan sebab arus sisadari maka kulanta e eme Rumah Pertoton Kesah Si Badia. Arah bahan PA Mamre enda Mamre ibabai ngasup njaga kebadian kulana alu ngkuasai diri ras mengendaliken dirina arah pangan ras inemen si bengket kubas kulana, la terjeng inemen keras ras anggur si memabukkan, mengendaliken diri ibas pangan si ntabeh si la terkontrol, ibas hal2 si banci ncedai daging kula, obat-obatan terlarang (narkoba), isap rsd. Njaga kesehaten daging kula alu mengendalikan/menguasai diri ras seleranta, alu pangan si sehat labo pangan si ntabeh eme bagin ndalanken UU ras kepatuhenta man Tuhan, ulihna labo man kalak, tapi pe guna banta sendiri bagi nina pepatah: “Men sano in corpora sano, di dalam tubuh yang sehat terdapat jwa yang sehat. Adi sehat kulanta,  sehat pertendinta tentu sehat ras jore ka nge perukurenta.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)