BAHAN PJJ 03-09 AGUST 2014 RG GBKP CENGKARENG

BAHAN PJJ 03-09 AGUST 2014 RG GBKP CENGKARENG 

OGEN : Esra 8:24-30                 Tema: “Kelengi Ras Pekena-kena Rumah Pertoton”

Tujun: Gelah Ngawan ni perpulungen:

1.       Meteh uga Esra ras bangsa Israel mpesikap Rumah Pertoton.

2.       Ngangkai ras ngergaken pentingna ngaturken inventaris gereja alu payo.

3.       Makeken inventaris gereja guna mpermuliaken Dibata ras kiniulin perdalanen gereja.

Latar Belakang :

Kitab Esra nuriken kerna sejarah bangsa Israel kenca mulih i pembuangen Babel nari siisuratken sekalak imam eme Esra. Kenca Babel italuken Persia, maka ibas masa pemerentahen Kores, raja Persia ipekeke Dibata ukurna guna erbahan surat perentah, si merentahken bangsa Israel mulih ku Jerusalem dingen mereken kesempaten man bangsa enda guna majekken mulihi Ruma Pertoton si nggo runtuh dingen iendeskenna barang-barang Rumah pertoton si nggo irampas Raja Nebukadnesar. Terpuk si pemena ibas kalak Jahudi si mulih ipimpin Serubabel ras Nehemia janah ibas paksa si eme Rumah Pertoton ipajekken mulihi ras kebaktin ibenaken. Ertahun-tahun kenca si e mulih ka terpuk si debanna siipimpin Imam Esra.  Point pentingna ijenda: ise pe banci ipake Dibata guna nehken sura-suraNa ras rencanaNa nandangi bangsaNa Israel, termasuk Raja Persia si la nandai ia pe ipake Dibata nehken keleng ateNa man bangsa Israel.  

Penjelasen Teks Ogen: Esra 8:24-30

Ayat 24-28 : Ibas bagin enda ituriken uga Esra mpepulung kerina terpuk si mulih ibas pembuangen Babel nari janah ipilihina kalak Lewi guna erdahin ibas Rumah Pertoton ras 12 kalak pengulu imam guna njagai Persembahen si nggo iendesken Raja Arthasasta ras mentri-mentrina bagepe pirak ras emas si nggo ipepulung kalak Israel (Esra 7: 15-21) guna ipake ibas Rumah Pertoton. Fungsi kerina e me guna nampati pelayanan ibas Rumah Pertoton. Janah kenca nggo seh i Yerusalem, itimbang me kerina, jenari  ibereken man pengulu Imam, pengulu-penglu kalak Lewi, bagepe man pengulu-pengulu kalak Israel. Emaka ibaba imam-imam e kerina erta ras perkakas-perkakas Rumah Pertoton e. Emas, pirak ras perkakas-perkakas Rumah Pertoton nggo ipersembahken man Tuhan, erkiteken si e, kalak sijaga barang-barang e pe harus ka kalak singgo iserapken man Tuhan.

Ayat 29-30 : Tugas pengulu-pengulu imam si nggo ipilih Esra e eme : njaga alu metenget kerina erta ras perkakas Rumah Pertoton si nggo ipersembahken e, nimbangsa ras mbabasa ku Rumah Pertoton Tuhan I Jerusalem.  

APLIKASI

Rumah Pertoton rikutken tradisi ras pemahaman kalak Israel eme symbol kehadiren Dibata I tengah-tengah bangsaNa. Rumah Pertoton/ gereja pe banci sipahami la saja sebagai ingan ersembah, tapi pe jadi sada simbol ketutusan kalak si tek man Tuhan. Sebab i je teridah, kalak situtus ersembah man Tuhan tentu reh ia ku gereja guna ersembah. Gelah sikap ersembah ibas Rumah Pertoton tentu arus ilitken perkakas-perkakas ibas rumah pertoton, misalna: perkakas guna lakon persadan ras lakon peridin, Saund system, alat musik, bangku, meja, rsd. Janah bagi teks ogenta enda ituriken uga Esra milih dingen ngangkat 12 pengulu imam guna ertanggung jawab njaga ras mpekena-kena perkakas-perkakas ras erta si nggo ipersembahken enda bage ka pe tentuna ibas gereja jaman genduari perlu nge ilitken kalak si ertanggung jawab guna ngerawat ras mpekena-kena kerina isi, fasilitas ras sarana inventaris si lit. Tapi siidah lit denga nge kita silenga terdilo guna ngerawat Gereja ras iventaris si nggo lit ibas gereja. Memang ibas perpulungen nggo lit pengurus gereja (Runggun Gereja), janah tanggungjawab pengurus gereja antara lain eme mpekena-kena rumah pertoton ras iventarisna, tapi kita  kalak sitek, lit tanggungjawabta guna njaga ras mpekena-kena Rumah Pertoton e, janah enda merupaken sada pendilo kiniteken. Harus sipeturah kesadaranta kerina warga jemaat maka gereja ras kerina sarana inventaris si lit eme tanggung jawabta kerina guna ngerawat ras mpekena-kenasa. Harus lit ibas kita rasa memiliki (sense of belonging) she maka kerina kita berusaha ras ertanggung jawab kerina njaga ras memelihara. Alu bage terjaga ras terawat me Rumah Pertoton ras kerina sarana inventaris si lit  e.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)