BAHAN PA MAMRE TGL 14 – 20 SEPT 2014 RG GBKP CENGKARENG

BAHAN PA MAMRE  TGL 14 – 20 SEPT  2014 RG GBKP CENGKARENG

________________________________________________________________________________________

OGEN :  JAKUB 4:13-17                                                          TEMA: NGANDALKEN TUHAN

Penjelasen teks Ogen:  Jakub 4:13-17

1. Surat Jakub itujuken man kerina kalak si tek si merap marpar I taneh perlajangen (Jak 1:1) janah mereken ajar man kalak si tek uga kin arusna perlagu langkah kalak Kristen sebab menurut penulis surat enda maka agama si tuhu-tuhu arus rikut ras perbahanen, sebalikna adi kiniteken la rikut ras perbahanen mate kap (bdk. Jak. 2:26)

2. Ibas ogen si jadi bahan PA Mamre enda (Jak. 4:13-17)isehken Jakub maka perukuren ras perbahanen kalak si tek arus erpalasken UU Tuhan gelah kepercayaan dirinta selaku kalak Kristen la lepak (salah kaprah).

Ay. 13-15: Ipersingeti Jakub ijenda maka kalak si la melibatkan peran serta ras campur tan Tuhan ibas kerina perencanaan geluhna dingen erpengakap maka banci idalanina kerina rencanana ras ngasup mastikenca maka kerina erdalan bagi sura-surana, kalak sibage megombang kap sebab situhuna ise pe labo ngasup meteh kai si terjadi pagi. Lalit ise pe patut meganjang ngerana, janah ipersingeti Jakub maka kerina manusia iumpamakenna la lebih bagi remang nge ngenca, si kentisik ngenca lit jenari bene. Ertina: arah ayat enda ibabai kita manusia gelah sadar maka kita enda lemah, labo berdaya, la erkuasa dingen la ergegeh guna menentuken masa depan ntah warinta si pepagi emaka labo patut ise pe ngandalken dirina, gegehna, pemetehna ras kengasupenna jine tapi iajuk kita guna ngandalken Tuhan ras melibatken penyertaan Tuhan ibas kerina geluh ras rencananta. Ertina sadarlah kita maka kita banci denga nggeluh janah banci ngelakoken kai e erkiteken perkuah ate dingen pemere Tuhan (ay.15).  Adi pemasmur ngataken maka adi la alu campur tan Tuhan sia-sia kap kerina, percuma kap encari alu latih erdahin, lampas medak dinge melawen tunduh (bdk. Masmur 127:1-2)

3. Ay. 16-17: Kiniganjangen ukur ras pengerana menurut Jakub eme sada kesalahen ras dosa sebab “meniadakan” / ngelupaken peran/penampat ras pemere Dibata ibas geluhta janah kalak sibage bali ras nundalken Tuhan. Kiniganjangen ukur ras memegahken diri enda tentu terkait erat ras biak doni. Arah teks enda Jakub mpersingti kita guna:

1. Mengandalken ras melibatken Tuhan ibas kai pe si irencanaken kita gelah Dibata si masu-masu dingen mpengasup kita erdahin, ndalani geluhta ras pendahinta sebab adi alu gegeh ras pemetehta saja labo kita ngasup. Gegeh dingen kuasa Dibata nge si mpengasup kita.
2. La nundalken Tuhan ras sura-sura Tuhan ibas erbahan pertimbangan ras rencana kai pe ibas kegeluhennta gelah kai pe silakoken ras sidahiken kita tetap sue ras sura-sura ras si ngena ate Dibata.
3. Ndatken kepercayaan diri si payo dingen benar. Kepercayaan dirinta adi alu nginget kelemahennta ras ketergantungenta man Tuhan mahan bana kita jadi meteruk ukur, la sombong/meganjang ukur. Aminna gia sadar kita maka kita lemah ras bergantung ras gegeh Tuhan labo erbahanca kita minder/ rendah diri tapi tetap percaya diri sebab gegeh ras penampat Tuhan erbahanca kita ngasup. Aminna gia kita kalak biasa-biasa tapi adi si penalem gegeh ras kuasa Tuhan kita banci ipengasupNa ras iubahkenNa jadi kalak si luar biasa.

SELAMAT MELAYANI & TUHAN MEMBERKATI

(Pdt. Jenny Eva Karosekali STh. M.Min)