BAHAN PA MAMRE TGL 19- 25 OKT 2014 RG GBKP CENGKARENG

BAHAN PA MAMRE  TGL 19- 25  OKT 2014 RG GBKP CENGKARENG

________________________________________________________________________________________

OGEN : 1 Korinti 2:1-9                                                               TEMA: Kiniteken Ntah kebeluhen

Penjelasen teks Ogen:  

1.     Kota Korintus eme salah sada kota ija Paulus cukup ndekah tading (Kis 18:11), erkiteken si e jemaat i Korintus banci jadi salah sada jemaat siikelengi Paulus, enda teridah arah uga gedangna  surat si isuratkenna janah  itujukenna man jemaat/perpulungen Korinti adi ibandingkan ras surat-surat Paulus si debanna. Tupung Paulus reh ku Korinti, labo ibeluh-beluhina ngerana ntah pakena pemeteh si meganjang. Pengajaren siisehken Paulus eme berita kerna uga Jesus ipakuken seh mate i kayu persilang,  pengajaren ras berita siipesehna e labo rikutken kebeluhen ngerana, tapi alu ncidahken kuasa Dibata(ay. 1 - 4). Tujunna eme : gelah kiniteken si turah ras berkembang ibas perpulungen Korinti la erpalasken kepentaren manusia, tapi erpalasken Kuasa Dibata (ay. 5).

2.     Iupayaken Paulus kal guna njaga kemurnian isi pengajaren ras berita siisehkenna gelah ije teridah kepentaren Dibata si terbuni e nge si luar biasa labo kehebaten sinehkenca ras kebeluhen si meritakenca e si utama. Menurut Paulus kepentaren Dibata siiberitakenna e terbuni, si terligen man manusia, emaka la iangka jelma sinterem, termasuk penguasa-penguasa i doni endape la metehsa, sebab adi ietehna labo min ndai ipakukenna Jesus i kayu persilang seh mate (ay. 6-8). Kepentaren Dibata  adi rikutken kepentaren ras pemeteh doni enda eme sada kebodohen sebab adi lit kalak si nggit mate, ngasamken kesah, ipakuken ku kayu persilang seh mate guna keselamaten kalak si deban, labo erkiteken kalak siiselamatken e mehuli dingen benar tapi justru erkiteken erdosa, secara logika tentu e sada kebodohen. Enda me si la terantusi manusia, ras penguasa-penguasa doni enda sinalipken Jesus. Tapi ibas kerina kelangasupen manusia guna ngantusi dingen ngangkai kepentaren Dibata e, isadari Paulus nge maka Tuhan pasti mereken kai siiperluken Paulus ibas ngelakoken dahin ras pelayananna ibas meritaken kerna kai si nggo ilakoken Jesus e (ay. 9).

3.     Paulus menyadari maka Tuhan si nggo mperlengkapi Paulus guna nehken berita ras pengajaren e. Ipetangkas Tuhan kerna kerinana si selama enda pe la terukuri Paulus. Tuhan mereken hikmat, Tuhan mereken perlindungan, bagepe Tuhan  mereken kengasupen man Paulus guna meritaken berita si meriah. Adi Tuhan ngasup mereken kai pe, termasuk si la pernah terukuri Paulus, tentuna Tuhan pe ngasup mereken man banta kai si la pernah siukuri sebelumna. Melala situhuna hal si sebetulnya la pernah siukuri tapi ibereken Tuhan man banta. Melala hal situhuna si labo pernah sipindo, tapi isikapken Tuhan man banta.

4.     Dahin naksiken ras meritaken berita si meriah ras berita keselamaten ibas Dibata nari eme tugas ras kewajiban kerina kalak si tek, ertina adi labo kita nggit erberita, meritaken kerna keterkelinen si nggo ibereken Dibata arah kematen Kristus maka situhuna lenga bo kita payo jadi pengikut Kristus (jadi kalak Kristen) Arah ogen PA Mamre enda iajuk gelah kerina Mamre nggit naksiken ras meritaken kerna Jesus labo arah kebeluhenta sebab kepentaren Dibata e labo terjabarken ras terantusi alu kebeluhen manusia ras kepentaren doni. Terbatas gia kebeluhenta, kepentaren si lit ibas kita tapi adi nggit kita ipake ras iperlengkapi Tuhan guna naksiken kerna Berita Keselamaten e man kerina kalak maka pasti kita ipengasup Dibata. Adi ibas kita lit motivasi si benar i adapen Tuhan, pasti Tuhan mperlengkapi kita ras tetap masu-masu kita alu berkat-berkat si la pernah terpikirkan kita. Si penting eme : motivasinta eme motivasi si benar, eme mpermuliaken Tuhan.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)