BAHAN PA MORIA TGL 19-25 OKT 2014 RG GBKP CENGKARENG

BAHAN PA MORIA TGL 19-25 OKT  2014 RG GBKP CENGKARENG

Ogen :  I Raja2 6:1-14                                      Tema: “Pemuliakenlah Dibata Alu Kepentaren”   

Penjelasen teks Ogen:

1.       Majekken Rumah Pertoton Tuhan situhuna nggo isura-suraken Raja Daud tupung ia merentah bangsa Israel, tapi la iijinken Tuhan ia majekken Rumah Pertoton erkiteken nggo ipadanken Tuhan maka sekalak ibas anakna si dilaki nari siiangkat Tuhan jadi raja ia me siitetapkn Dibata guna majekken Rumah Pertoton ingan Dibata ringan (bdk. 2 Sam 7:12). Bagepe erkiteken melala dareh kalak si nggo iamburken arah tan Daud sebab ibereken Dibata kemenangen man bana ibas erperang naluken bangsa Filistin, bangsa Moab bagepe ras musuh-musuh bangsa Israel si debanna emaka la ate Dibata Daud mbangun ras majekken rumah PertotonNa.

2.       Ibas perikop ogen enda ituriken maka  Salomo singgantiken bapana jadi raja guna mimpin bangsaNa, ia me siitetapken Tuhan guna nerusken sura-sura bapana Daud majekken Rumah Pertoton Tuhan.  Isuratken ijenda alu jelas maka pembangunan majekken Rumah Pertoton Tuhan e ibenaken Salomo ibas 480 tahun kenca bangsa Israel ipulahi Dibata i Mesir nari (ay.1).

3.       Ay. 2- 9 : Ituriken kerna uga Salomo makeken kerina pemeteh ras kepentarenna ibas perencanaan pembangunan Rumah Pertoton e, mulai ibas ngaturken bentuk, ukuren ras bahan-bahan siniperluken lako erbahan Rumah pertotonsi mehaga man Tuhan sebab kerina bahan-bahan si ipakeken ras siisikapken eme pilihan si terbaik. Rumah Pertoton e idungi Salomo ibas 11 tahun 8 bulan dekahna, ertina ngidah waktu sib age dekahna tentu luar biasa kal pengerjanna janah atena ilakokenna si terbaik man Dibata ras mpermuliaken Dibata alu pemeteh ras kepentaren si lit ibas ia siialokenna ibas Dibata nari. Hikmat ras Pemeteh (Kepentaren) si nggo ibereken Dibata man bana ipakena ka guna mpermuliaken Tuhan. Ibas masa pemerentahen Salomo me pajek Rumah Pertoton si megah dingen mehaga si terberita man bangsa-bangsa si deban janah arah si e atena ipehagaken dingen ipermuliakenna Tuhan. Pesan moralna ijenda eme: uga ka kita Moria nggit makeken talenta, pemeteh ras kepentaren si lit ibas ia si nggo ipercayaken Dibata man banta guna mpermuliaken Tuhan. Salomo la nggit nia-niaken kesempaten ras kepercayaan siibereken Dibata man bana guna majekken Rumah PertotonNa emaka alu maksimal iupayakenna mereken si terbaik arah kai si banci ilakokenna. Mekatep kita Moria ibas ndahiken dahin-dahin pelayanen ibas gereja lit denga si lenga erdahin ras ngelakoken tugas pelayanen e alu maksimal, makeken kerina talenta, pemeteh ras kepentaren si lit ibas kita. Megati sitanggung-tanggungi, deba susunna talentana, deba mela-mela guna ncidahken ras mbagiken pemeteh ras talenta si lit ibas ia, deba lit pe pemeteh ras talenta ibas ia la ia percaya diri guna makekenca she maka mekisat kita melayani sue ras talentanta.

4.       Bahan PA Morianta enda ngajuk kerina Moria erlajar kerna uga Salomo majekken Rumah Pertoton Tuhan la ngenca arah kebeyakenna, emas ras pirak si lit ibas kerajaanna, tapi pe arah kerina kepentaren siibereken Dibata man bana bagepe arah makeken kai si lit ibas ia gelah tuhu-tuhu Rumah Tuhan e teridah mehaga janah arah si e Dibata ipehaga dingen ipermuliaken kerina kalak ras bangsa-bangsa si deban pe si ngidah Rumah Tuhan e.

5.       Kenca idungi Salomo dahinna ibas majekken Rumah Pertoton e emaka ipersingeti Dibata Salomo gelah tetap patuh ras setia nembah man baNa, enda me syaratna maka Dibata nggit ringan I Rumah Pertoton si ipajekkenna e bagepe nggit tading I tengah-tengan bangsaNa. Tapi adi la patuh ras setia man Tuhan, Tuhan erpadan maka iradaskenNa Rumah Pertoton e dingen ikernepkenna bangsana e. Ertina jelas ijenda maka kepatuhan ras kesetiaan sekalak pemimpin erpengaruh kal kubas keselamaten kalak/bangsa siipimpinna.

SELAMAT MELAYANI & TUHAN MEMBERKATI

(Pdt. Jenny Eva Karosekali STh. M.Min)