BAHAN PJJ 19- 25 OKT 2014 RG GBKP CENGKARENG

BAHAN PJJ 19- 25 OKT 2014 RG GBKP CENGKARENG

OGEN :   Ester 4:12-14                                                  Tema:  “ MBELA SI BENAR "

Latar belakang:

Kitab Ester nuriken sekalak diberu bangsa Jahudi si tergelar Ester si patut igelari Pahlawan erkiteken belinna keleng atena nandangi bangsana janah bersedia menanggung resiko kai pe guna nelamatken bangsana. Alu strategina ia menggagalkan rencana Haman ibas sura-surana ngkernepken kerina kalak Jahudi.  Ester eme sekalak anak si lanai lit bapa nandena (yatim piatu) si ringan i pembuangen Persia emaka  iangkat Mordekai(turangna sembuyak bapa) me ia  jadi anak agkatna. Ester sekalak sekalak si nguda-nguda si mejile rupana janah potongenna pe sikap  emaka erkiteken bekas pemasu – masu Tuhan ras erkiteken Hagai, suruh-suruhen raja Ahasyweros (raja Persia) si ngurusi kerina gundik raja erngena ate man Ester emaka ipersiapkenna kal Ester alu mehuli guna jadi ratu (kemberahen raja) janah  terpilih guna  nggantiken Wasty ratu Ahasyweros raja Persia (Ester 2 : 7).

Penjelasen Teks: Ester 4:12-14

Ibas ogen PJJ-nta sekali enda, ituriken uga Ester selaku sekalak diberu tampil ibas Mbela bangsana alu melawan “Ketidakadilan ras Menegakken Kebenaren”. Ibas Perikop ogenta  Ester 4 : 12 – 14 enda lit piga – piga pointl si banci si idah arah sikap Ester ra Mordekai ibas  “Mbela Si Benar” eme :

1, Kenca Ester iangkat jadi ratu, ia tampil  guna mbebasken bangsana ibas upaya ras sura – sura Haman,  perdana mentri paksa si e siaena ngkernepken kerina kalak Jahudi. Hal si erbahanca ertambah – tambah pe nembeh ate Haman nandangi kalak Yahudi eme erkiteken Mordekai la nggit erjimpuh nembah i lebe-lebe Haman erkiteken la ia nggit ngelanggar aturen agama (ibas tradisi agama Jahudi Dibata Jahwe ngenca si patut isembah) ras  itandaina Haman sebage musuh bangsana. E me sababna engkai maka Haman la saja ersura-sura munuh Mordekai saja, tapi pe kerina kalak Jahudi.  Emaka Haman erbahan perencanaan nandangi Mordekai gelah ibunuh (Ester 3 : 12, 5 : 9 – 14).

2. Engkai maka bage kal sura-sura Haman guna ngkernepken bangsa Jahudi ? Alasen & latar belakangna eme : Erkiteken Haman e me kap anak Hamedeta, kesusuren Agag (3:1), raja Amalek (1 Sam. 15:8) si pernah ikernepken bangsa Israel ras raja Agag pernah itawan Saul erperang ras naluken bangsa Amalek emaka nembeh kal atena nandangi kalak Israel. Jadi banci ikataken maka sura-sura jahat Haman e erkiteken “dendam kesumat” ras niat balas dendam (Kel. 17:8-16, Ul. 25:17-19 ). 2).

3. Ibas situasi geluh kalak Yahudi  si terancam ras kebiaren nimai wari penghukumen ras hasil keputusen raja Ahasweros ras Haman,  Ester tampil dingen jadi pasu – pasu man bangsana alu cara reh ngadap raja gia sekali ia mbiar nandangi resikona sebab lit aturen maka labo sembarangen ise pe reh ngadap man raja termasuk  ratu ntah gundikna pe adi la kin raja ndilosa tapi reh ngadap man raja arus iukum mate, tapi adi idudurken raja ciken emasna emaka la ia ibunuh (ay. 11).

4. Mordekhai mpersingeti Ester gelah  ia sadar kerna statusna maka lit nge situhuna maksud Tuhan ibas ia iangkat jadi ratu raja Persia emaka ipersingeti Mordekhai gelah Ester ula sinik tapi tampil guna nelamatken bangsana. Adi la pe isampati Ester tetap nge lit si nampati kalak Jahudi. Alu kata si deban, ate Mordekai ngataken kerna kuasa Tuhan sibanci nampati bangsaNa. Emaka idorong Mordekhai Ester gelah pang ras tetap ukurna tampil ncidahken peranna. Eriteken si e  itetapken Ester me ukurna ngadap man raja gia nyawana jadi taruhan alu mindo kerina kalak Jahudi si lit I kuta Susan guna ertoto ras erpuasa kerna ia (ay. 16)

Arah turi-turin enda piga – piga hal si idah ibas diri Ester ras Mordekai si man usihen she maka ngasup ras pang ia ngalaken kerina resiko guna mbela si benar ras nelamatken kalak si la ersalah ibas ketidakadilen eme:

1.       Mordekai ras Ester ngandalken Tuhan ibas kai pe siilakokenna arah ertoto ras erpuasa (Ester 4 : 3, 16).

2.       Ester ras Mordekai peduli, tanggap ras la nggit sinik ngidah ketidakadilen ras rencana jahat Haman si mengancam bangsana tapi berjuang alu gegeh, strategi ras siap ngalaken kerina resiko.  

3.       Ester situhuna ibas posisi aman tapi ia la egois, ras  la ia nggit“cari selamat sendiri”. Banci nge ia aman jadi ratu Ahasweros, sebab raja labo meteh maka Ester eme kalak Yahudi (Ester 2 : 10), tapi  labo ia nggit sinik/cebuni ibas zona nyamanna e janah berjuang ia  guna keselamaten bangsana alu siap ngalaken kai pe resikona.

4.       Mordekhai ras Ester erpengakap maka ia jadi ratu i negeri Persia ianggapna sebagai rencana Tuhan nandangi kegeluhenna ras rencana Tuhan ibas penyelamaten bangsana (Ester 4 : 12b). Ertina: pemahamen enda pe mabai kita gelah ngasup ngangkai maka ibas kai pe peran, fungsi, pendahinta  lit rencana ras sura-sura Tuhan dingen ateNa makeken kita jadi alatNa emaka iajuk kita guna la sinik nandangi sura-sura jahat ras kerina ketidakadilan ras penindasen si terjadi I sekelewetta tapi lakokenlah  perannta ibas mbela kebenaren ras membongkar kejahaten.

PENGKENAINA/ APPLIKASINA :

Faktana genduari ibas kegeluhenta melala terjadi ketidakbenaran ras ketidak adilen i sekelewetta, tapi mekatep nge terjadi “pembiaran” ntah pe sisinikken. Arah pengajuk tema PJJ-nta “Mbela si Benar” seharusna min pang kita tampil guna mbela korban-korban si tertindas erkiteken kelabenaren ras kelaadilan. Emaka istilah-istilah pe gundari nggo ipelesetken: adi nai lit pepatah ngataken “berani karena benar, takut karena salah” genduari jadina “berani karena bayar” sebab si salah banci jadi benar, hitam banci jadi putih tergantung “bayarannya” janah ibas pengadilan pe istilah KUHP pe nggo ipelesetken jadi Kasih Uang Habis Perkara. Lagu “maju tak gentar membela yang benar” berubah jadi “maju tak gentar membela yang bayar”. Enda me fakta si lit I tengah-tengah kegeluhen masyarakatta ras sekelewetta, tapi pendilo man kalak si tek justru idilo gelah la sinik tapi pang mbela si benar, mbela korban-korban akibat ketidak benaren e. Selaku kalak kristen harus pang menyuaraken kebenaren ras mbela kebenaren,  sebab enda merupaken karakter Dibata sisembah kita.

Ibas kita pang “Mbela ras menegakken kebenaren” pasti lit risiko si mberat man alanken. Banci saja resikona : segat ate kalak kita; lanai lit temanta; adi bas pendahin banci saja kita ipengadi, rsd. Pang nge kita tetap mbela si benar ibas si bage? Apai ka resiko adi resikona kematen. Pang nge kita tetap mbela si benar? Ester ras Mordekhai mereken usihen man banta maka pertoton ras pengendesen man Tuhan mpengasup ras mereken gegeh ras keberanian man bana guna mbela si benar ras mbongkar kelabenaren ras pengadi sura-sura si jahat. Emaka kitape iajuk gelah tetap ertoto maka kitape ngasup dingen pang mbela si benar.  
Keberadanta ibas zamanta si genduari enda selaku kalak si ipasu – pasu Tuhan alu litna : jabatennta, pangkatta, kinilitennta, pemeteh ras keahlinta, rsd, sigejapkenlah e sebage pemere Tuhan man banta guna sipakeken mperjuangken kebenaren ras keadilen man ise pe si membutuhken dirinta ras guna sie kap kita hadir i tengah doni enda bagi Kristus hadir i doni  mbebasken kalak sitertaban, mulahi kalak si tertindas  alu ngkorbanken kesahNa (bd. Luk 4 : 18 – 19). Tetapkenlah ukurta kita gelah kehadirenta sebagai anak – anak Tuhan ras sekaligus sebage warga GBKP si benar – benar mperjuangken kebenaren ras keadilen maka lit nanamna kehadirenta. Tuhan pasti nampati kita ibas mperjuangken kebenaren si tuhu – tuhu – tuhu ngena ate Tuhan.