BAHAN PA MAMRE TGL 12-18 OKT 2014 RG GBKP CENGKARENG

BAHAN PA MAMRE  TGL 12-18  OKT 2014 RG GBKP CENGKARENG

________________________________________________________________________________________

OGEN : JOSUA 24:14-21                          TEMA: Aku Ras Jabungku, Tuhan Saja Isembah Kami

Penjelasen teks Ogen:  

1.       Josua eme sekalak tokoh pemimpin bangsa Israel si luar biasa, si nggantiken Musa ibas mimpin ras mabai bangsa Israel  guna bengket ku taneh Kanaan, taneh perpadanen, si nggo ijanjiken Dibata. 

2.       Perikop si jadi ogen PA Mamre enda eme bagin ibas Pidato Perpisahen Josua man bangsa Israel. Ope denga ia nadingken bangsana ipersiapkenna lebe bangsana gelah tetap nggeluh setia nembah man Dibata, sebab jelas itandai Josua uga biak bangsa Israel si mekatep la setia ras ngelupaken kerna perbahanen-perbahanen Dibata si mbelin si nggo icidahkenna man bangsaNa. Tupung si e ipepulung Josua  kerina suku Israel I Sikhem, pertua-pertua, pemimpin, hakim-hakim ras kepala-kepala pasuken Israel ngadap ku lebe-lebe Dibata. Emaka iadep-adepen kerina bangsana e ngerana Josua :

v  Ipersingeti Josua bangsana kerna kai si nggo ibahan Dibata janah iajukna bangsana guna mpehaga Tuhan, Nembah man Dibata alu kepatuhen ras ketutusen ate.

v  Iperentahken Josua bangsana gelah Ersembah man Dibata saja, Mpedauh dibata-dibata si nai isembah nini-nini bangsa Israel I Mesopotamia nari.

v  Tapi  iendesken Josua man bangsana guna menentukan pilihenna ise atena siisembahna, saja alu tegas icidahkenna kai si jadi prinsip geluhna, maka Ia ras keluargana (isi jabuna) Tuhan saja ngenca si isembahna.

3.       Teridah ijenda kepemimpinen Josua si luar biasa, erkiteken :

v  Ia sekalak pemimpin si ertanggung jawab nandangi bangsana. Ope denga ia mate dingen nadingken bangsana, ipersiapkenna lebe bangsana guna erbahan pembaharuan janji kiniteken gelah tetap setia dingen ersembah man Dibata saja.

v  Ia sekalak pemimpin si la otoriter, la memaksaken kehendak. Iberekenna pengarahen man bangsana kerna ise kin Dibata bangsa e si nggo ngelakoken perbahanen2 si mbelin tapi keputusenna iendeskenna man bangsana gelah bangsa e ertanggung jawab nandangi konsekuensi pilihen kinitekenna sebab kiniteken (iman) si ipaksaken labo mehuli hasilna.

v  Ia sekalak si tegas ras teguh ibas memegang prinsip. Janah tanpa ragu isehkenna prinsip kinitekenna janah ijaminina maka ia ras keluargana tetap nembah man Dibata.

v  Ia sekalak pemimpin si banci jadi ikuten, usihen si mabai bangsana (kalak siipimpinna ) pe yakin nandangi kai siiyakinina, ngasup mereken argumentasi  ras penjelasen si tepat she maka kalak siipimpinna pe yakin guna ngikutken ia.

4.       Arah Teks ogen ras bahan PA Mamre enda ibabai Mamre gelah ngasup jadi Josua-Josua jaman enda, jadi pemipin2 si luar biasa, si tegas, nteguh njemak prinsip si benar, si banci jadi usihen man isi jabuna si ngasupnjamini kinitekenna ras isi jabuna guna tetap setia nembah man Dibata. Tentuna enda me pengarapen Moria ibas HUT na pe 57 ken ibas tahun enda, gelah kerina Mamre pe ngasup jadi imam, jadi pemimpin si man ikuten, si tegas njamini jabuna guna tetap nembah man Dibata. Mamre iarapken jadi perbulangen, jadi Bapa, jadi pemimpin si mbiar ras patuh man Tuhan, jadi usihen ras contoh ibas erkiniteken seh maka kai siiajrkenna teridah ras terbukti arah perbahanenna.

5.       Kualitas Josua selaku pemimpin nggo ter-uji ras terbukti iadep-adepen bangsana (kalak siipimpinna) seh maka ngasup ia mereken keyakinen ka man bangsana guna menentukan pilihen si tepat, emaka nggit  jabuna ras bangsana (kerina kalak siipimpinna)  ngikutken kai siilakoken Josua,  nembah man Dibata saja ngenca. Emaka gelah Mamre pe banci berkualitas kepemimpinenna janah iikutken jabuna ras kalak siipimpinna, arus teruji lebe kualitas dirina alu ncidahken kualitas diri ras kinitekenna, ia lebe arus patuh man Tuhan dingen setia ersembah man Dibata, geluhna ibas kerina dampar nggo arus jadi contoh ras usihen emaka mahan bana kerina isi jabuna ngikutken ia  janah jabuna jadi jabu si ipasu-pasu Tuhan.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)