BAHAN PJJ 12-18 OKT 2014 RG GBKP CENGKARENG

BAHAN PJJ 12-18 OKT 2014 RG GBKP CENGKARENG

OGEN :   II Raja 4: 8-17                                Tema:  " Pasu-pasu Guna Jadi Pasu-pasu"

Latar belakang:

• Sunem eme gelar sada Kuta i utara kota Jizreel deherken danau Galilea, Ije me tading sekalak diberu si bayak, si la tersinget ise gelarna saja rusur igelari alu “Perempuan Sunem”. Ia sekalak keturunen suku Ishakar, janah ia cukup ihamati masyarakat si enterem. Ituriken maka diberu enda ras perbulangenna eme kalak bayak si ndatken kerina kebayakenna arah kerja kerasna alu ndahiken dahin si mehuli, erkiteken daerah Sunem e sendiri merupaken daerah si mehumur. Alu bage banci sikataken maka kerina kebayaken si idatna labo erkiteken warisen ntah pe alu cara sila jujur janah tuhu ia i hamati jelma si enterem pe erkiteken kerina kebayakenna i pakena guna nampati jelma si enterem (Kej 49 :

14 – 15, Jos 19 : 17 – 23). Elisa eme sekalak nabi Tuhan si nggantiken Elia. Ia jadi nabi kenca Elia iangkat ku surga janah ibas kidekah ia jadi nabi erkiteken kepatuhenna man Tuhan, maka melala pe mujizat si ilakokenna ibas pemasu – masun Tuhan (bdk. II Raja – raja 4 : 1 – 7).

Penjelasen Teks: II Raja2 4 : 8-17

1.       Diberu Sunem enda pe ituriken selaku diberu si tuhu – tuhu mehamat man perbulangenna selaku kepala rumah tangga, enda teridah ibas ia la nggit muat keputusen si sada ibas kai pe si atena si ilakokenna, tapi tetap iarihkenna ras perbulangenna gia sekali perbulangenna e enggo metua (II Raja – raja 4 : 9, 22). Diberu Sunem end ape sekalak si mehamat man Dibata, sie teridah arah ia enghamati Elisa sebage nabi Tuhan. Kehamatenna e teridah arah ia nenahken Elisa man I rumahna janah mehuli kal pengalo-ngalona man Elisa tep-tep kali adi  Elisa reh ku kutana (Sunem) janah la tanggung – tanggung maka ia pe nikapken ingan ibas rumahna alu erbahan ingan tading si khusus man Elisa (II Raja – raja 4 : 9 – 10).

2.       Lit sada penggejapen man diberu si bayak e maka Elisa eme sekalak si badia, erkiteken sie ersura-sura ia la saja terjeng nikapken man man Elisa, tapi pe mbereken siterulin. Emaka sura-surana e ikatakenna man perbulangenna, ras iueken perbulangenna, emaka tep-tep kali  Elisa reh ku Sunem singgah ia i rumah diberu bayak e sebab nggo isikapkenna kamar khusus man Elisa. Erkiteken keriahen ukur ras kiniulin diberu Sunem enda, emaka ate Elisa lit siharus bereken man keluarga e, emaka idilo Elisa si Gehasi guna nungkun kai siate ibereken Elisa man keluarga e. Tapi Erkiteken palasna ngalo-ngalo Elisa alu meriah ukur selaku kalak sibadia maka la lit sura-surana guna mindo kai pe man Elisa. Teridah maka Keluarga enda eme keluarga situtus ras erkemalangan man Tuhan, emaka selaku keluarga sierkemalangan man Tuhan tehna kai tanggungjawabna nandangi suruh-suruhen Tuhan (nabi) janah labo ngarapken balasen ibas si mehuli siilakokenna.

3.       Tapi situhuna lit perbeben man diberu bayak e, tuhu kerna erta lit bas ia, tapi kerna anak jadi perbeben keluarga e sebab keluarga enda la lit anakna. Diberu bayak e la banci mupus. Tapi ibas kerina perbahanenna simehuli,  Dibata ersemulih man bana dingen mereken keleng ateNa alu nehken anak dilaki jadi pasu – pasu situhu – tuhu meherga kel ibas jabu (II Raja – raja 4 : 18. Bdk, Sara si ipasu – pasu Tuhan ibas, Kej 25 : 1 – 2). Emaka ibas kuasa Dibata si lit man Elisa, ikatakenna maka tahun sireh keluarga enda ndatken pupus. Janah adi sioge terdauhen keluarga enda ipasu-pasu Tuhan alu mereken sada anak dilaki. Enda me upah man keluarga diberu Sunem enda erkiteken nggo ngalo-ngalo Elisa alu meriah ukur.

4.       Keluarga diberu bayak enda nggejapken maka kai si lit bas ia eme ibas Dibata nari, meriah ukurna makekenca guna ngalo-ngalo nabi Elisa selaku nabi/kemahen Tuhan dingen ipake guna kemulian Tuhan.

PENGKENAINA/ APPLIKASINA :

·         Sue ras konsep kinitekennta arus si akuken ras sigejapken maka kita kerina nggo ngaloken pasu-pasu idur Dibata nari. Dibata me ulu kerina pemere ras pasu-pasu, enggo ipasu-pasuna geluhta, alu mereken gegeh, kesehaten, pendahin ras keselamaten. Kerina pasu – pasu e isehken Dibata man banta erkiteken Dibata enggo erpadan maka tetap engkelengi kita manusia (kalak si tek).  Kerina pasu-pasu Tuhan enda, tentuna lit sura-sura Tuhan man banta, eme: gelah kita jadi alatNa guna jadi saluran berkat  ras alat pasu-pasuNa ka man kalak sideban.  Alu kata si deban maka kalak si nggo ngaloken pasu-pasu Tuhan, pasu-pasu e la ngenca tading ibas ia tapi siap ka guna nehkenca man kalak si deban. Ertina tupung Dibata mereken pasu – pasuNa man banta maka Dibata pe menuntut kita jadi pasu – pasu man kalak sideban (Blessed to be Blessing).  Kita harus nampati kalak si deban alu kai silit bas kita,  kita jadi alat pasu-pasu Tuhan nandangi kalak sideban, gelah kalak sideban nggejapken lias ras perkuah ate Tuhan. Emaka pujina Tuhan ibas kegeluhenna.  

·         Diberu Sunem e makeken kerina kebayekenna guna hal simehuli janah erkiteken kiniulinna e maka ia pe i pasu – pasu Tuhan ka alu mereken anak dilaki kubas jabuna (II Raja – raja 4 : 17, bd, Mat 10 ; 41). Ibas si enda penting ka si perdiateken maka Dibata sendiri si berinisiatif ibas mereken pasu – pasuNa (II Raja – raja 5 : 11- 13).

·         Diberu Sunem enda ndai  mehamat man Dibata alu ncidahken kehamaten man Elisa, selaku serayan Tuhan, emaka meriah ukurna nikapken kai si perlu man nabi Elisa. Tentu hal sienda pe jadi pelajaren penting man banta uga kita pe banci min berinisiatif guna banci mereken simehuli man temanta simembutuhken ras si man sampaten, palasna eme erkiteken Tuhan nggo leben nampati kita (bdk 1 Yoh. 4:19 “kita engkelengi erkiteken Kristus nggo leben ngkelengi kita”).

·         Kita enggo ngaloken pasu – pasu sue ras Tema PJJnta mari dage minter si aplikasiken,  ibas  kita enggo nggejapken bage belinna pasu – pasu Tuhan man banta, marilah kita jadi saluran berkat ras jadi pasu-pasu man teman-temanta si sangana perlu man sampaten, terlebih ibas situasi genduari nandangi kerina kekelengenta si lit i Tanah Karo si paksana ngenanami bencana Erupsi Gunung Sinabung si tuhu – tuhu membutuhken penampat ibas kita nari, emaka asa banci mari minter sibahan aksinta guna nampati senina – turangta e arah kai si lit ibas kita guna banci sibagiken mpenahangi babanna si mberat.

SELAMAT MELAYANI & TUHAN MEMBERKATI