BAHAN PA MORIA TGL 12-18 OKT 2014 RG GBKP CENGKARENG

BAHAN PA MORIA TGL 12-18 OKT  2014 RG GBKP CENGKARENG

Ogen :  1 Petrus 2:1-10                              Tema: Jadi Terang Si Lanai Kal Lang-lang Ulina  

Penjelasen teks Ogen:

1.       Surat 1 Petrus enda isuratken Rasul Petrus man kalak Kristen si merap I belang-belang bagin utara Asia Kitik janah tujun surat enda eme mpegegehi kalak si tek si paksa si e ngenanami kiniseran dingen iayak-ayak erkiteken kinitekenna man Jesus. Ibas suratna enda Petrus nggelari kalak Kristen selaku bangsa pilihen Dibata.

2.       Ibas perikop si jadi ogen PA enda ipersingeti Petrus kalak si tek selaku bangsa si Badia si nggo ipilih Dibata ibas nggeluhken kegeluhenna eme alu :

·         Ay. 1-3 : Nadingken kerina si jahat selaku kalak si nggo ngenanami kiniulin Tuhan: ulai erbual, pekulah-kulah, ercian ate, ras cekurak, tapi sebalikna rusur muas nandangi si mehuli bagepe man susu pertendin si lalit campurna bagi anak si mbaru tubuh, si biakna bersih, lalit man pandangen janah reh belinna tetap ibas kiniteken ras pengarapen man Tuhan dingen ndatken keselamaten.

·         Ay. 4-8  : Tetap reh Ndahi Tuhan. Aminna gia itulak ras la iergaken manusia tapi kalak si tek tetap idilo selaku batu si nggeluh si nggo ipilih ras iergaken Dibata. Kita idilo guna ipake Tuhan majekken Rumah Pertoton Kesah (gereja Tuhan) janah Kristus jadi batu palas ingan pajekna gereja e. Kerina kalak si tek pe idilo guna erdahin jadi imam-imam si badia mpersembahken persembahen si ngena ate Dibata.

·         Ay. 9-10 : Petrus nggelari kerina kalak si tek selaku bangsa pilihen, imam-imam Raja, bangsa sikerajangen Dibata, anak-anak Dibata. Ertina kalak si tek ipersingeti Petrus gelah sadar nandangi gelar sinibabana, eme:

-          Selaku bangsa pilihen : berarti arus ngasup nampilken keistimewaan ibas gaya geluh si mehuli gelah jadi usihen man bangsa si deban gelah ula sia-sia kita nggo ipilih Dibata.  Sebab adi gelarna “pilihen” tentuna arus ngasup ncidahken “keunggulan ras keistimewaan” dirinta, tampil beda, la seri ras doni enda.

-          Selaku Imamat Rajani : maka kerina kalak si tek arus sadar maka ia me imam-imam Raja, jadi ertanggung jawab ibas dahin-dahin ras fungsi imam simabai kalak guna jumpa, nembah ras tek man Dibata.

-          Selaku bangsa sikerajangen Dibata, tentuna kalak si tek arus ncidahken kegeluhen si badia sebab Dibata e pe badia kap.

-          Selaku anak-anak Dibata: kalak si tek ipersingeti Petrus gelah ncidahken biak Dibata selaku Bapana sebab lit istilah : “buah ndabuh labo ndauh ibas batangna nari”. Adi kita anak-anak Dibata, ertina karakter Dibata, selaku Bapanta si dem keleng ate, melias, mehuli, bujur dingen benar arus jadi karakterta selaku anak-anakna. 

Janah radu ras gelar siisehken Petrus e lit penugasen ras tanggung jawab siisehken man kalak si tek eme: guna meritaken (naksiken) perbahanen-perbahanen Dibata si mbelin gelah kalak si lenga nandai Dibata banci itandaina Dibata arah kita si nggo idilo ras ipilihNa.

Ipersingeti Petrus tole man bantam aka arus lit bedana kegeluhenta si nai ope denga kita iangkat ras ipilih Dibata jadi anak-anakNa ras kegeluhenta si genduari. Arus lit perubahen si jelas ras nyata ibas kegeluhenta kenca sialoken perkuah ate Dibata e.

3.       Arah bahan PA Moria minggu enda ibabai ras ipersingeti kerina MORIA kerna pendilo Dibata ras tujun pemilihen Dibata nandangi dirina. Moria arus ngasup nehi pendilo Tuhan ras ncidahken kegeluhenna si nggo iubahken Tuhan arah kerina dampar geluhna si nggo nadingken kegeluhen si jahat: erbual, nggeluh pekulah2, ercian ate ras pe cekurak. Ibas HUT MORIA si nggo pe 57 ken enda iarapken MORIA nggo ngasup ncidahken kegeluhenna selaku bangsa pilihen Tuhan, tampil beda ras doni enda, selaku imam-imam Raja: si mabai jabu ras anak2na bagepe kalak si deban si lit isekelewetna guna reh nembah dingen tek man Tuhan. Moria aktif ncidahken kegeluhen selaku bangsa si kerajangen Dibata, nggeluh badia, bujur dingen benar bagepe selaku anak-anak Dibata. Teridahlah biak ras karakter Dibata ibas kegeluhen kerina Moria gelah la sia-sia ipilih Dibata tapi ngasup naksiken perbahanen-perbahanen Dibata si mehuli, jadi saksi Dibata si nggeluh arah kerina dampar geluhna, mabai kalak si deban nandai Dibata dingen ngaloken perkuah ate Dibata.

SELAMAT MELAYANI & TUHAN MEMBERKATI

 (Pdt. Jenny Eva Karosekali STh. M.Min)