BAHAN PJJ 28 SEPT – 4 OKT 2014 RG GBKP CENGKARENG

BAHAN PJJ 28 SEPT – 4 OKT 2014 RG GBKP CENGKARENG

OGEN : Esekiel 36 : 26 – 33                                     Tema:  "Nggeluh I bas Kesah Dibata"

Tujun : 
- Gelah ngawan ni perpulungen meteh tanda-tanda kalak si nggeluh ikuasai Kesah Dibata.
- Gelah ngawan ni perpulungen meteh kai ulihna nggeluh i bas Kesah Dibata.
- Gelah ngawan ni perpulungen tetap nggit ipelimbarui Kesah Dibata. 

Latar belakang:

Nabi Esekiel erdahin selaku nabi tupung Israel lit i taneh pembuangen i Babel (Irak). Kalak Israel ibuang erkiteken dosa ras kesalahenna jine si merupaken perlawanen ras pemberontaken man Dibata. Para memimpin Israel lanai bertindak sebage permakan si mehuli tapi nggo jadi permakan si jahat. Aminna gia Israel eme bangsa pilihen si i-istimewakan Tuhan, tapi bangsa e gagal  mpermuliaken gelar Tuhan. Kegeluhen bangsa enda mekatep mabaisa ndabuh kubas penembahen berhala janah ncurnaken gelar Tuhan. Hukum Taurat ras UU Dibata si ndauh ganjangen secara moral ibandingkan ras ajaran bangsa-bangsa kafir la kepe ngasup njadiken Israel jadi bangsa si lebih mehuli ibandingken bangsa-bangsa si debanna. Teks ogen enda nuriken kerna uga Dibata ngerana man bangsa Israel sisangana ibas pembuangan Babel, ija bangsa Israel ndalani penghukuman, sekaligus itempah Tuhan mulihi gelah bangsa Israel jera ras mulih ku Tuhan saja. Sebab jelas, alasan Tuhan ngukum bangsa Israel ku Babel erkite-kiteken lagu langkah bangsa Israel lanai mehuli ras lanai patuh man Tuhan. Kinilapatuhen bangsa Israel man Tuhan teridah ibas saling membunuh ras nembah man berhala, emaka taneh e pe nggo iliami (nggo najis).

Penjelasen Teks: Esekiel 36: 26-33

Ay. 26-27: Ibas bagin enda isingetken Esekiel bahwa permakan si tuhu-tuhu eme Tuhan dingen bangsa Israel tetap nge biri-biriNa. Esekiel ernubuat maka ipelimbarui Dibata me bangsaNa alu mereken KesahNa ku bas pusuh ras perukurenna. Gia Israel enggo erdosa, Tuhan ibas perkuah ras keleng ateNa maba mulihi bangsaNa ku tanehna ndube gelah banci ipermuliakenna Tuhan. Ipesusur Tuhan KesahNa bana, ibereNa pusuh ras perukuren si mbaru. iaguiNa pusuh si batu-batun, jenari itamakenna pusuh si lembut si nggit patuh, ibereken Tuhan pusuh ras perukuren simbaru man bangsa Israel, bagepe Kesah Tuhan itamaken   man bangsa Israel (ayat 26-27). 

Ay. 28-30: Arah pendahin Tuhan si mereken KesahNa man bangsaNa maka kalak Israel banci mulihken dingen ringan i bas taneh perjanjin e, ija Israel jadi bangsaNa, dingen Tuhan jadi Dibatana. Tuhan mbersihken bangsaNa alu KesahNa ibas dosa-dosana nari. Makna Tuhan namakan KesahNa ibas pusuh bangsa Israel eme gelah bangsa Israel patuh, ngikuti ras ndalanken undang-undang Tuhan, alu bage la saja bangsa Israel terhindar ibas pernembeh ate Tuhan, tapi pe taneh e “terhindar” ibas kenajisan.  Alu perbahanen Dibata e maka bangsa Israel nggeluh bersih ras patuh man Tuhan. Ibas kegeluhen sibage me bangsa Israel njadiken Tuhan jadi Tuhanna, janah bangsa Israel jadi bangsaNa. Jenari icidahken Tuhan perbahanen-perbahanenNa si mbelin si seh kal perluna man kalak Israel eme: Engkelini Israel gelah olanai lit si ngeliamisa. Merentahken gandum gelah mbuah, ras nambahi buah batang kayuna alu bage lanai lit si kelihen si erbahanca mela. Palas perbahanen Tuhan si mbelin si icidahkenna lako engkelini, mpelimbarui, maba mulihi bangsana ku Jerusalem ras masu-masusa eme erkiteken gelarNa si badia enggo icurnaken Israel. Tindaken ras perbahanen Israel erbahanca meling (terhina), mela dingen medungu kal Tuhan. Arusna arah kegeluhen Israel ermulia gelar Tuhan, tapi justru sebalikna terjadi ipermelakenna Tuhan. 

Tema : Nggeluh ibas Kesah Dibata

Kesah Si Badia eme Kesah Dibata, janah Kesah Dibata me si meteh kai sura-sura Dibata (1 Korinti 2:10-11). Dibata erdahin arah KesahNa. Mulai ibas Ia nepa doni ras kerina si nasa lit, KesahNa enggo erdahin ras ikut erdahin. La lit kai pe si terjadi terlepas ibas pendhin Kesah Dibata (Kejadin (1:2; 2:7; Masmur 33:6). Kesah Dibata pe erdahin mereken kegeluhen si mbaru man manusia. Kesah Dibata mpelimbarui kegeluhen kalak si tek wari lepas wari. Dibata si mereken KesahNa guna mpelimbarui kita. Emaka kita idilo Tuhan gelah nggeluh ibas KesahNa, gelah tangkas man banta sura-suraNa dingen nggeluh kita rikutken si ngena ateNa. Tanda-tanda Kalak singgeluh ibas pimpinen Kesah Si Badia, rikutken teks ogenta enda eme :

1.  Lit kepatuhen ibas ia: ertina  patuh ia kubas si ngena ate Tuhan. 
2. Sadar dosa (ayat 31), ertina : si inget kerna dosanta; perukurenta si jahat, perbahanenta si melket, pengerananta si bual, si kasar si erbahanca kitik ukur kalak dingen bene semangatna; ras pendahinta si la payo. 
3. Nggit Ngakuken dosa ras kesalahenna dingen nggit jera. 
4. Erciga ate nangdangi dosa si enggo ibahanna ras njaga kebadian (ayat 30). 

Bagepe tentuna banci sievaluasi dirinta nggo nge kita tetap nggeluh ibas Kesah Dibata ntah dekahen lenga ? Sebab kegeluhen kalak si nggeluh ibas Kesah Dibata pasti lit ibas kebujuren, kebenaren ras kedamen, teridah ibas  kerina dampar kegeluhenna ulih  pendahin Kesah Si Badia, eme: lit kekelengen, keriahen, kemalemen ate, sabar, ndalanken perbahanen si mehuli, mehuli, setia, meteruk ukur, ras engkuasai diri (band. Galati 5:21-23), subuk ibas pengerana, perukuren, bagepe arah perbahanenna.

Mari terus berjuang guna tetap ngasup nggeluh ibas Kesah Si Badia ras mere dirinta tetap ipimpin Kesah Dibata gelah ngasup kita nggeluh bagi sura-sura ras si ngena ateNA. Berelah dirinta, geluhta itegu-tegu Kesah Tuhan. Nggeluhlah ibas Kesah Dibata eme perayakennta ras tanggungjawabtta selaku anak-anak Tuhan. Kalak si ipimpin Kesah Tuhan pasti mere dirina ipelimbarui Dibata wari lepas wari. 

SELAMAT MELAYANI & TUHAN MEMBERKATI