BAHAN PJJ 08-14 FEBRUARI 2015 RG GBKP CENGKARENG

BAHAN PJJ 08-14 FEBRUARI 2015 RG GBKP CENGKARENG

OGEN : KEJ. 5: 21-24, HEBER 11:5-6                            Tema: “Nggeluh Ersada Ras Dibata”

Tujun: Gelah Ngawan ni perpulungen:

1.      Meteh ulih nggeluh ersada ras Dibata.

2.      Ergiah-giah ukurna nggeluh ersada ras Dibata.

Ibas Teks ogen PJJ nta enda ituriken kerna kegeluhen Enoh, sekalak si tek dingen nggeluh ersada ras Dibata janah sedekah geluhna  ndalanken sisentudu ras peraten Dibata.  Ngasup ia “tampil beda” ras kegeluhen manusia ibas zamanna.

Uga kin nggeluh ibas pesadan ras Dibata? Ibas Teks ogen : Kej. 5:21-24 ijenda ndai,  isingetken maka si jadi  tanda2  Enoh “nggeluh ibas persadan Dibata” (Hidup bergaul dengan Allah) eme :

1.       Kidekah geluhna erdalan ibas dalan Tuhan (Kejadin 5:24), ertina:  ibas kerina dampar geluhna “ibahanna si sentudu ras peraten Dibata”. kerina perilaku kegeluhenna ngena ate Dibata, ertina lalit si man pandangen ibas geluhna sebab ia hanya erorentasi kubas kegeluhen singena ate Dibata (Kej 5 : 22 – 24. Ibr 11: 5).

2.       Erkiniteken man Dibata, sebab ise pe la ngasup ndalanken si  sentudu ras peraten Dibata adi la kin erkiniteken  (Heber 11:5, 6). Erkiniteken  ertina eme:  tek nandangi kai si iarapken kita, tek kerna si la idah (Heb. 11:1). Tanda2 kalak si tek man Dibata teridah arah gambaren Kitab Heber  Pasal  11 :  iangkana maka kerina sinasa lit Dibata kap njadikenca (Heber 11:3), itehna nehken persembahen si mehulina (Heber 11:4), patuh dingen ngikutken kai siperentahken Dibata aminna gia di luar logika ras lenga idah kai siikataken Dibata e (Heber 11:7-11), rsd.

Erkiteken si e luar biasa ulih siialoken Enoh, eme:   la ia ngenanami kematen,  tapi langsung iangkat Dibata ku surga sebab IbereNa upah man kalak si tek dingen  ndarami Ia (Heber 11:6b),

Ibas Pustaka Si Badia  selain Enoh, si ituriken “nangkih” (iangkat)  ku surga, eme :  Elia (II Raj 2 : 11) ras Yesus , nangkih ku surga kenca ndungi kerina pendahinNa i doni ras nikapken ingan man si enggo i tebusNa i kayu persilang (Luk. 24:51; Mrk. 16: 19-20), ertina kai siialoken Enoh eme hal si istimewa ibas Dibata nari. La terjeng  iangkat ku Surga saja, tapi Enoh ndatken hasil si melebihi kerina hasil si idarami manusia, la terjeng kubas dirina tapi kerina kesusurenna pe ipasu – pasu Dibata alu umur si gedang  (ay. 26-32) bagepe  ndatken keselamaten tupung Dibata engkernepken kerina kalak jahat (bd. Kej 6. Jud 1 : 14 – 15).

Nggeluh Ersada ras Dibata, tentu banci  iertiken nggeluh ibas keterikatan / “ke-intim-an” ras Dibata. Adi kita ersada ras memiliki hubungan si akrab ras intim ras Dibata tentuna  mahan bana biak Dibata jadi biakta, mabai kita ngasup  nggeluh ibas terang kataNa ras sue ras singena ateNa. Bagi Enoh, si erdalan ibas dalan Dibata, nggeluh sentudu ras si ngena ate Dibata, tentuna memotivasi (ngajuk)  kita gelah kita pe ngasup “njaga” dingen ndalani geluhta sue ras si ngena ate Dibata, pang “tampil beda” aminna gia i sekelewetta  reh buena sijumpai “kelabenaren”, kejahaten ras perbahanen si la sentudu ras peraten Tuhan. 

Langkah-langkah si banci ras si arus silakoken guna mabai  kita nggeluh ersada ras Dibata, antara lain eme:

1.       Membangun relasi/hubungan si akrab/ intim ras Tuhan tutus ertoto  man Dibata (cth : Daniel tetap setia ras ertoto  man Dibata rikutken aturen agama kalak Jahudi;  Jesus  tetap nikapken waktu guna ertoto (Mrk. 1: 35; Mat. 14:23; Luk. 6: 12; Mat. 26: 39; dst).

2.       Tutus ersembah  dingen mengalami perjumpaan ras Dibata arah kebaktin ras kegiaten2  gereja (cth: PJJ, PA, rsd), ertina labo gelah nggo pulung saja, tapi ertutus ate ras ertedeh ate guna matuhi ras ngerenungken Kata Dibata dingen makekenca, bagi siikataken pemasmur : “  keriahenna eme matuhi UU Tuhan dingen ngukurisa suari ras berngi” (Masm. 1:2).  Ngoge Pustaka si Badia ras ngertikenca, tutus ertoto, nehken kekelengen, rsd, ertina labo banci sekalak ngatakenca dirina lit ibas persadaan ras Dibata adi labo kin teridah ibas praktek kegeluhen si icidahken arah persekutuan ras Dibata.

Tema PJJ-nta  enda nuriken kerna uga pentingna “Nggeluh Ersada Ras Dibata” ras sebage sada keharusen terlebih ibas perkembangen zaman sigenduari  ija kejahaten ras kelabujuren semakin merajalela, tantangan ras godaan si mabai kita ndabuh kubas dosa / ndauh ras Dibata reh buena. Ijah ijenda reh teremna manusia si meriah iakapna erdalan ibas kenikmaten doni  si mbabai kita reh dauhna  papak. Erkiteken si e, persinget arah PJJ nta minggu enda mabai ras mpersingeti kita maka  lanai lit alasen guna menunda- nunda: MARI SIBANGUN KEGELUHEN SI INTIM RAS TUHAN,  gelah kita tetap ngasup NGGELUH ERSADA RAS DIBATA . Janah bagi kai siikataken Jesus ibas Joh 15 : 4c “adi la kin kam ersada ras Aku labo kam erbuah”. Ertina labo kita ngasup erbahan kai pe, ndalanken kebenaren, kebujuren ras si ngena ate Dibata adi la kita nggeluh ersada ras IA, bagepe labo kita ngasup ngelawan kerina tantangan jaman ras erpenulak nandangi biak dosa ras kejahaten adi la nggeluh ersada ras Tuhan. Sebab  kalak si erdalan ras Dibata malem me atena  erkiteken Dibata nuduhken dalan siarus ibentasina.

SELAMAT MELAYANI & TUHAN MEMBERKATI

(Pdt. Jenny Eva Karosekali STh. M.Min)