BAHAN PJJ 15 - 21 FEBRUARI 2015 RG GBKP CENGKARENG

BAHAN PJJ 15 - 21  FEBRUARI 2015 RG GBKP CENGKARENG 

OGEN :  1 Timotius 4 : 13 – 16                                                                                      Tema: “Ngiah- Ngiahi Alu Tutus ”

Tujun: Gelah Ngawan ni perpulungen:

1. Mengevaluasi dahin Perkunjungen Rumah Tangga.
2. Tetap ngiah-ngiahi I tengah-tengah perpulungen.

Surat  I Tim 4:13-16 eme bagin ibas surat Paulus man Timotius si nampati Paulus ibas meritaken Berita Si Meriah. Paulus sadar maka labo melukah ndahiken dahin pelayanen, melala tantangan, perbeben ras kiniseran si turah guna ihadapi. Guna mperlengkapi ras nampati Timotius  ibas ngalaken erbage tantangen si lit e me maka ikirimken Paulus suratna enda, gelah megegeh Timotius ibas mpermakani dingen ngajari perpulungen Efesus nerusken pelayanen si nggo ibenaken Paulus, terlebih paksa si e lit turah dingen berkembang pengajaren si papak ibas perpulungen e. Erkiteken si e Paulus mpersingeti Timotius gelah tetap jadi suruh-suruhen Kristus si mehuli si tetap ngasup ngajarken ajaren-ajaren si benar si iikutkenna sedekah enda alu tutus.

Arah bahan PJJ nta enda lit piga-piga point penting siisehken Paulus man Timotius gelah ngasup jadi suruh2en Kristus si mehuli guna ngasup ngepkep dingen mabai perpulungen megegeh, antara lain alu :

v  Ay. 13 : Ngogeken Pustaka Si Badia man perpulungen, ngiah-ngiahi ras ngajari perpulungen Efesus terus menerus seh Paulus reh mulihken ku Efesus. Menurut Paulus, Timotius la cukup ngogeken Pustaka Badia  saja,  tapi arus terus ngajarkenca, gelah iangka perpulungen pengajaren sibenar seh maka la melukah ibabai pengajaren si papak. Ngiah-ngiahi pe jadi penekanan gelah perpulungen tetap pulung ibas kiniersadaan si nteguh. Paulus menekanken pentingna ngogeken Pustaka Si Badia ras mereken pengajaren kerna Kata Dibata e sebab arah Kata Dibata nari me siteh kebenaren (bdk: Yoh 8:31-32 "Jikalau kamu tetap dalam firman-Ku, kamu benar-benar adalah murid-Ku dan kamu akan mengetahui kebenaran, dan kebenaran itu akan memerdekakan kamu"). Ngoge ras empetangkas Kata Dibata eme tugas utama gereja.

v  Ay. 14 : Timotius iajuk Paulus gelah maksimal nehken pengajaren alu makeken pemere si ibereken Dibata tupung ia itangkuhken eme alu ngandalken pemere Tuhan eme Kesah Sibadia siempengasup kalak sierkiniteken ngangkai Kata Dibata.

v  Ay 15-16 : Paulus ngajuk Timotius guna ndalanken kerina pelayanen siisehken man bana alu tutus, dingen njagai diri ras kai siiajarkenna. Ertina Paulus nuruh Timotius gelah ula menggo, la mekarus ibas ndahiken dahin pelayanenna tapi alu tutus seh maka teridah ulihna, kerina kalak ngidah kemajunna. Bagepe uga Timotius arus menjaga integritasna, sue perbahanenna ras kai siiajarkenna gelah la jadi batu sandungan man perpulungen tapi mabai keselamaten man dirina bagepe man kalak si deban si megiken pengajarenna.

Tema PJJnta : “Ngiah-ngiahi alu tutus”. Enda mpersingeti kita kerna kinata ras keberadan perpulungenta bas GBKP si seh ibas paksa enda lenga kerina muat bagin ibas kegiatan-kegiaten gereja si menurut data Litbang sekitar 40-50 % denga jemaatta si aktif, teremen si la reh asangken si reh. Adi sihubungken kubas ogennta tentu jadi evaluasi man banta kerina maka selama enda lenga nge kita tutus ibas ngiah-ngiahi teman-temanta perpulungen. Bagepe mungkin idah kalak maka kita pe pengurus, serayan ras jemaat si aktif enda lenga ndalanken kai si iajarken ras sipelajari kita, ntah mekatep denga jadi batu sandungan asangken jadi teladan ?? Ogenta mabai kita mengevaluasi diri guna banci mpekena kai si man pekenan ibas dirinta pribadi lepas pribadi.   

Tambah si e kai nari si banci sipake guna ngiah-ngiahi temanta ? Piga-piga cara si banci silakoken antara lain :

1. Menggali potensi ras talenta si lit ibas teman-temanta dingen mabai ia terlibat. Kita kalak Karo umumna meherga kel siakap tenah ras meriah nge siakap adi sialoken tenah ntah iiahken kita kubas sada kegiaten apai ka ibereken tanggung jawab ras isuruh ia berperan ije sue ras kengasupenna. Tentu enda jadi modal utama man banta terlebih mabai perpulungen ikut melayani sue ras talentana masing-masing.
2. Menggalakkan Perkunjungan Rumah Tangga ibas tiap-tiap sektor. Adi lit denga perpulungenta si lenga aktif ibas kegiaten gereja kekurangenta ibas ngiahken, ntah pe caranta ngiahken si lenga tepat. Temanta ibas minggu enda me aplikasi bahan PJJ-nta ibas dua minggu silewat “Perkunjungen Rumah Tangga” ija ibas kita ngelakoken perkunjungen rumah tangga sekaligus kita ngiahkenca di kune siman kunjungen e lenga tutus ngikuti kegiaten gerejanta. Dage sipakekenlah kesempaten silit guna ngiah – ngiahi temanta terlebih ibas genduari, alu litna alat komunikasi si cukup mendukung, mis: arah sms, bbm, telephone ngajuk ras ngiahken teman2nta gelah reh teremna kita ngenanami kegeluhen ibas persadaan ras Dibata.

SELAMAT MELAYANI & TUHAN MEMBERKATI

                                                            (Pdt. Jenny Eva Karosekali STh. M.Min)