BAHAN PA MAMRE 29 MARET – 4 APRIL 2015 RG. GBKP CENGKARENG

           BAHAN PA MAMRE 29 MARET – 4 APRIL  2015 RG. GBKP CENGKARENG

Ogen :MATIUS 13 :14-16                    Tema: “MATA SI ERPENGIDAH, CUPING SI ERPEMEGI”

Tujun : 1.   Gelah Mamre meteh erti mata si erpengidah, cuping si erpemegi.

   2.  Gelah Mamre lanai mesera man katanken ibas kai-kai pe.

Penjelasen Teks Ogen :  

1. Jesus ibas pelayananNa ras pengajarenNa mekatep ipakeNa perumpamaan2 alu tujun gelah arah e reh tangkasna iakap kalak si megikenca  ngantusi kai siimaksudken Jesus. Teks ogen PA Mamre  Matius 13: 14-16 enda nuriken kerna uga Jesus njawab penungkunen ajar2 ibas mekatep makeken perumpamaan tupung ngajar ras  ngerana man jelma si nterem. Alu ngutip kai si nggo ikataken Jesaya, Jesus nuriken alasenNa makeken perumpamaan erkiteken kalak Jahudi la erpengangkaan nandangi kai siiberitakenNa sebab nggo batu-batun ukur kalak Jahudi seh maka melala kalak Jahudi labo lalap ia tek maka Jesus eme Mesias siipadanken Dibata e janah tetap nge nterem si nulak IA. Nggo pe iidahna uga kuasa ras mujizat siilakoken Jesus ras ibegina berita si luar biasa kerna Jesus ras pengajaren si isehken Jesus tetap nge kalak Jahudi labo tek maka Ia Anak Dibata ras persuruhen Dibata ras la tek nandangi pengajarenNa. Emaka nina : “ …aminna gia inehenna tapi la idahna, ….idengkehkenna tapi la ibegi dingen iangkana”  (ay. 13) lit matana tapi la erpengidah, lit cuping na tapi la erpemegi. Engkai maka banci bage?  Alasenna jelas ituriken Jesus : erkiteken enggo batu-batun ukurna kerina emaka tertutup cuping kiniteken ras pe pentang mata kinitekenna (ay. 15). Kalak Jahudi igambarken ijenda lebihen asangken kalak pentang ras pasek.  Kalak sibagenda me si rusur ikataken “mesera kal man katanken”, bebal banyak omong, keras kepala (mekeng).  Mesera siakap usur ngangkai ras ngantusi pengajaren Yesus ras ndahiken/ ngelakoken kai si ngena ateNa  sebab megati kai siiajarkenNa e la sue ras sura-sura dagingta, sura-sura ras perukuren  Tuhan mekatep petembil ras perukurenta manusia, aminna gia si teh rancangan Tuhan bas geluhta pasti si mehuli janah arah si la mehul si la bagi ukurta pe situhuna banci salihken Dibata jadi kiniulin man banta.

2. Kalak si ngaloken Jesus dingen tek nandangi pengajarenNa nina Jesus malem me tuhu-tuhu atena. Emaka sigejaplah maka sehkal sangapna kita erkiteken kita enggo megi ras ngidah kuasa ras kemulian Yesus ibas doni enda, dingen tek nandangi si e kerina. Enda ertina maka gundari mata kiniteken ngidah alu tangkas, bagepe cuping kiniteken ta erpemegi alu tangkas, sebab tek kita nandangi kuasa ras kemulianNa janah sigejapken maka kuasa ras keleng ateNa  e nge si mpengasup kita ndalani kegeluhenta. Kai sijadi man banta gundari enda, sadar kita maka  erkiteken kinitekenta man baNa nge maka ngasup kita ngidah ras megi kata Tuhan setiap saat: Puji Tuhan mata nta enggo sipake ngidah kiniulin Tuhan, cupingta sipake megiken kata Dibata, emaka lanai kita ngandalken gegeh ras kinijilen doni, tapi mata melihat hati berbicara, cuping mendengar hati berbicara, seh maka  simehuli lalap lit bas kita.

3. Mekatep Mamre mengandalkan pemeteh, kepentaren ras logika  (akal pikirenna) ibas kai pe. Janah mawen-mawen lebih dominan logika ras belinen logikana ipakena asangken kinitekenna. Mekatep talu kiniteken e ban Mamre lebih mengandalkan pemeteh, kepentaren ras logikana.  Tapi ijenda Mamre ibabai guna makeken mata ras cupingna guna ngidah perbahanen Dibata si mbelin si nggo ialamina ibas kegeluhen si nggo ibentasina ras megiken Kata Dibata guna jadi gegehna ibas nerusken perdalanen geluhna ras jabuna gelah alu bage kerina Mamre lanai mesera man katanken, lanai mesera ras metahat akapna reh ras pulung ku PA Mamre, tapi iakapna ndahi ras ersembah man Dibata e jadi sada kebutuhan. Gelah Mamre setia nandangi Dibata, setia nandangi keluarga (ndehara, anak), setia ras tutus nandangi dahinna, setia nandangi perpulungen ras gerejaNa. Mamre lanai mesera man katanken guna mengandalkan ras mengutamakan Tuhan bas kegeluhenna sebab  uga litna ia gundari ras kai si nggo lit ibas ia genduari pe nggo tangkas itehna, iidahna labo bekas beluh, gegeh ras pemetehna ngenca tapi erkiteken pemere Dibata seh maka Mamre ngasup ngaturken kegeluhenna ku simehuli. 

SELAMAT MELAYANI & TUHAN MEMBERKATI

(Pdt. Jenny Eva Karosekali STh. M.Min)