BAHAN PA MORIA TGL 29 MARET – 4 APRIL 2015 RG. GBKP CENGKARENG

BAHAN PA MORIA TGL 29 MARET – 4 APRIL 2015 RG. GBKP CENGKARENG

Ogen : JOB 2:11-13                                                            Tema: “ KEPATE NANDANGI ODHA”

Penjelasen Teks, Point ras Garis besar :

1. Kitab Job nuriken kerna sekalak dilaki (perbapan) si bujur si tergelar Job si tading i negeri Us. Ituriken ijenda maka ia sekalak si nembah janah erkemalangen man Dibata, sekalak si mehuli, janah la lit perbahanenna si jahat (Job 1:1). Penekanenna ijenda eme: ia sekalak si nembah ras erkemalangen man Dibata, janah kiniulin ras kesetiaan Job nembah ras erkemalangen man Dibata enda ibuktiken Job aminna kai pe si terjadi man bana. Arah turi-turin kegeluhen Job, encidahken man banta uga perbeben kiniteken kalak Yahudi ibas ia enggo ipilih selaku umat pilihen si tentu ngarapken kegeluhen silebih mehuli selaku Bangsa Pilihen. Tapi kai si jadi man Job, justru ibas kerina kiniulin ras kesetiaanna nembah ras erkemalangen man Dibata seh kal berat dingen mekelek perbeben si reh man bana. Adi kita ngalaken sibagenda rupa mungkin mis nge kita protes : kai ertina erkemalangen man Tuhan ras mengandalkan Tuhan adi ipediatna ras iukumna kita alu kiniseraan si mesangat padahal labo lit sijahat silakoken, mehuli perbahanenta ras tetap kita ibas kiniteken?

2. Tapi erlajar kita  ibas Job aminna gia ibas kiniseran si mesangat, tetap ia erkemalangan man Tuhan  janah la lit ibelaskenna cakap si la mehuli kerna Dibata (2:10) Janah seh kubas akhir, Job tetap mereken pengakun siluar biasa kerna penandaina ise Dibata e; Kepeken pemetehku kerna Kam terjeng sinituriken kalak ngenca, tepi genduari alu matangku jine, Kam enggo kuidah:(42:5).

3. Ibas teks ogenta enda ituriken uga teman-teman Job mediate ras kepate nandangi kiniseran Job emaka ersada arih ia guna ndahi ras ngapuli Job. Kenca iidahna kondisi ras keberadaan Job tangis ras ngandung ia kerina dingen icaingkenna uisna perban ceda kal atena, jenari icaburkenna abu ku takalna. Kundul ia I babo taneh ras Job janah 7 wari 7 berngi alu la ngerana sengkebabah pe. Sikap teman-teman Job enda tuhu2 ncidahken empati ras menempatken dirina tuhu-tuhu ikut ngenanami kiniseran Job, ikut merasa senasib sepenanggungan. Mekatep kita ibas reh ngapuli temannta si ngalaken kiniseran la kita ngasup bagi kai siilakoken teman2 Jon enda, siilakoken kita, mereken nasehat, ngajarken janah mawen-mawen alu la sisadari si salahken ka ia ibas kiniseranna.

4. Arah turi-turin kegeluhen Job enda ipersingeti man banta maka : erkemalangan man Tuhan labo berarti kita pulah ibas perbeben ras lanai ngalaken kiniseran, tapi “iizinken Dibata” kita ngalaken kiniseran janah ibas paksana iberekenNa serpang pulah. Dibata kepate kal man manusia, ibas Heber 4 : 15a  isingetken;”Iman simbelinta e labo kalak silanggejabken kekoten-kekotenta”. Dibata tuhu-tuhu kepate alu mereken anakNa sitinggal reh ku doni enda. Adi Dibata pe kepate man banta emaka kita pe arus ka kepate man temanta manusia.

5. Rikutken Kamus besar Bahasa Indonesia;  Kepedulian/Peduli = Belas Kasihan/Welas Asih yang artinya; Emosi manusia yang muncul akibat penderitaan orang lain, perasaan yang memunculkan usaha mengurangi penderitaan orang lain. Kepedulian temen-teman Job       ( Elipas, Bildat ras Sopar )ibas bahan PA-nta icidahkenna alu : “Ibegina, ipersdana arihna ndahisa, iapulina, tangis ras ngandung ia, icaingkenna uisna, icaburkenna abu kudas ras ku takalna, kundul ia ibabo taneh”. Kepate la hanya terjeng cakap,”mekuah ate ari”, labo hanya terjeng notokenca tapi ndahisa.

6. Tema PA-nta enda mpersingeti kita guna Kepate nandangi ODHA ( kalak si kena HIV/AIDS ), megati ibas masyarakatta memandang negatif ODHA enda, janah nalahken kalak sib age alu ngataken maka banci ia bage pe erkiteken salahna ras pengelegin, emaka mekatep ka nge lit si ngerana :  “gengken ras nanami bekasndu nggiling e teman”. Tapi pernah nge kita rukur engkai maka kalak ndabuh kubas situasi sibage rupana, payo kin e pengelegina? Tah kin ODHA enda kurang perhatian/lalit simpedulikenca, tah kin ijerumusken, kalak rsdna. Adi Tuhan pe kepate nandangi kita she maka nggit mate gelah kita selamat tentu ibas memasuki masa Paskah ras mperingeti Jumat si mbelin enda ngasup ka kita ngusih sikap teman2 Job bagepe ngusih perbahanen Kristus alu mediate ras kepate nandangi perbeben temanta, terlebih senina/turangta ODHA, rutang min pusuhta  man bana gelah  lebih itandaina Tuhan, dingen banci terselamatken ia. Ola min sempat ia selamat erkiteken tuhu-tuhu ia bertobat tapi kita la selamat erkiteken kita la kepate,la peduli.

                                                            Pdt. Jenny Eva Karosekali STh. M.Min