SUPLEMEN PJJ 03 – 09 MEI 2015 RG GBKP CENGKARENG

BAHAN PJJ 03 – 09 MEI  2015 RG GBKP CENGKARENG

OGEN : Heber 11:13-16                                                                Tema: “Doni Kalak Mate”

Bena Kata :

Teknologi tingkat tinggi, peralatan dokter supercanggih, obat-obatan ntah pe ramuan si berkhasiat ras  uga beluhna ras pentarna pe manusia labo lit si mampu menahan, membatasi ras mpengadi manusia guna ndalani proses kematen, si ialami kerina manusia tanpa kecuali, alu la memandang profesi, jenis kelamin ntah pe umur. Kematen ngkenai kerina manusia tanpa kecuali. Heber 9: 27 ngataken : “Kerina manusia la banci la mate sekali, janah kenca bage iadili Dibata”. Erkiten si e adi seh paksana idilo Dibata kita mulih ku ampunNa ise pe kita labo banci nilah. Kai pe si lit ibas kita (duit, deposito, perhiasan, mobil, rumah mewah rsd) kerinana arus sitadingken. Ayub berkata, “Dengan telanjang aku keluar dari kandungan ibuku, dengan telanjang juga aku akan kembali ke dalamnya. Tuhan yang memberi, Tuhan yang mengambil,...” (Ayub 1:21). Melala kalak labo siap dingen mbiar ibas ngalaken kematen. Tapi man banta kalak si tek, kematen labo akhir dari segalanya, melainkan awal dari kegeluhen si deban. Paulus berkata, “...jika kemah tempat kediaman kita di bumi ini dibongkar, Allah telah menyediakan suatu tempat kediaman di sorga bagi kita, suatu tempat kediaman yang kekal, yang tidak dibuat oleh tangan manusia.” (2 Korintus 5:1). Jesus pe menegaskan, “I rumah BapangKu mbas ingan. Janah lawes me Aku nikapken ingan man bandu”(Yohanes 14:2). Ertina Jesus pe mpetetap ukurta gelah ula aru ateta nandangi kematen sebab ijaminina kuja perlawes kalak si mate ibas kiniteken man Tuhan. Sr. Rosemary Smith, OSF, sekalak pensiunan biarawati Fransiskan, ibas umurna si nggo 86 tahun, tapi tetap aktif ibas pelayanen selaku biarawati, tupung ia terkena penakit pembengkakan pembuluh darah aorta janah beresiko guna ioperasi erkiteken umurna nggo lanjut tapi la ia mbiar mate, janah nina : “Don’t worry. I’ve been living my whole life preparing for death that I may see Jesus. Perhaps this is my time, and I am ready.” (“Jangan kuatir. Sepanjang hidupku aku telah mempersiapkan diri untuk mati, agar aku dapat melihat Yesus. Mungkin ini saatnya bagiku, dan aku sudah siap. Uga pengangkaanta kerna doni kematen ras uga persiapenta nandangi kematennta ?

Penjelasen Teks :

Arah ogen PJJnta Heber 11:13-16 enda nuriken kerna piga-piga kalak si erkiniteken ibas Padan Si Ndekah si mate ibas kiniteken e me Abil, Enoh, Nuah, Abraham, Jakub, Jusuf, Musa, rsd. Kerina kalak enda mate i bas kinitekenna. Aminna mbue perbeben sialamina, la pernah tundalkenna ras tadingkenna Dibata, tetap ia kerina ernalem man Tuhan. Aminna kai si ipadanken Dibata la ialokenna, tapi ndauh-ndauh nari enggo idahna si e, maka meriah iakapna. Enda me ertina  erkiniteken, tek nandangi siarapken kita, tek kerna si la iidah (bdk. Heb. 11:1). Aminna pe lenga idahna kai si niarapkenna tapi tek ia maka enggo ialokenna kegeluhen si rasa lalap, si erbahanca ia ermeriah ukur. Jelas iakuina kerina maka perlajang nge ngenca ia i doni enda. Labo doni enda ingan si tetap. Emaka labo nari atena metedeh nandangi negeri si enggo itadingkenna. Pengalamen bangsa Israel i bas perdalanen i gurun pasir, jungut-jungut ras merawa man Musa tupung litna kesusahen, ras ngatakenca, ulin kami mulihken ku Mesir ras mate i jah, asangken mate i jenda. Tapi pengakun kalak si erkiniteken enda kerina la nari atena tedeh nandangi negerina si mbarenda si enggo itadingkenna, tapi tedehen atena negeri si terulin, e me negeri i Surga. Ayat enda pe nuriken maka uga pa pe resikona i bas perdalanen kegeluhen i doni enda, la pernah menyesal ia i bas ngikuti rencana Dibata, sabab mbelin pengarapenna nandangi negeri i bas Dibata man bana si ndauh ulin asangken Mesir bage pe taneh perpadanen. E maka la ia mela ngakuken Dibata jadi Dibatana, sabab tek kel ia, enggo isikapken Dibata sada kuta man kalak enda kerina.

Labo doni enda ingan si tetap man banta, sada paksa waktu mate kita sitadingken doni enda. Arah teks ogen PJJnta enda jelas man banta kuja perlawesta adi kita mate ibas kinitekenta man Tuhan, Tematna, DONI KALAK MATE.  Adi i bas Padan si Ndekah doni kalak mate igelari Syeol (Mas. 6:6, “I bas doni kematen labo Kam iinget, la ise pe muji Kam i je,” Mas. 89: 48-49, Bil. 16:28-34; Mas. 55:15; Ams. 1:12; Yes. 5:14). Sedangken i bas PB, (bhs. Junani) istilah si seri e me kap Hades (kuburen, ingan sementara). Kesimpulenna, maka kalak si enggo mate, baik kalak si tek entah pe si la tek, labo langsung bengket ku Surga entah Neraka, tapi lit i bas sada ingan sementara seh reh Tuhan Jesus peduakaliken i bas Ia ngadili kerina manusia. Paulus pe njelasken man banta ibas 1 Tes. 4:13-18, maka kalak si mate si tek man man Jesus tetap ersada ras Jesus. Janah i bas kerehen Jesus si peduakaliken, lebe kalak si enggo leben mate si tek man Jesus si pemena ipegeluh mulihi ras kalak si nggeluh denga asum kerehenNa ipepulungna i datas embun ras ersada ras Jesus. Bage pe bagi kai siikataken sekalak penjahat man Jesus, nina: “Jesus inget aku asum Kam pagi reh jadi raja.” Nina Jesus, “Kukataken man bandu maka sendah me kam ras Aku i Pardis.” (bdk. Luk. 23: 40-43). I bas konteks enda, segera ia ras Jesus i Pardis (Surga) ras menikmati kiniersadan ras Jesus tanpa arus nimai kerehenNa sipedualiken. (Bdk. 2 Kor. 12:3).

Jesus sendiri nuriken maka kalak si tek dingen nggeluh rikuteken si ngena ate Tuhan, ialokenna kegeluhen si tuhu-tuhu si la erkeri-kerin. Ibereken Bapa man Jesus kuasa guna mereken kegeluhen ras ngadili, “Sabap reh me paksana maka kerina kalak mate si i bas kuburen megi sora Anak e, je nari ndarat me ia kerina i bas kuburen e nari. Kalak si enggo erbahan si mehuli ipekeke guna nggeluh; tapi si jahat perbahanenna ipekeke guna iukum.” (Bdk. Joh. 5: 24-29) . Rikutken penjelasen aya-ayat enda, banci si simpulken maka lit kegeluhen kenca kematen. Ope kerehen Jesus si peduakaliken kalak si mate, lebe i bas ingan si sementara, tapi banci langsung ersada ras Jesus bagi pengalamen penjahet si ras Ia isalibken. Si paling penting man banta kita kalak si tek man baNa, maka enggo isikapkenNa ingan si senangna kel, e me kap Surga. Tetap si jaga kinitekenna i bas kegeluhenta i doni si dem keguluten enda gelah sialoken rudang-rudang tanda kemenangenta.  Alu bage la nari mbiar kita ngalaken kematen, sebab sedekah kita nggeluh kita nggeluh ras Tuhan gelah tupung mate pe kita kita mate ibas Tuhan she maka nggeluh ntah mate gia kita sikerajangen Tuhan kap kita.

                                       (Pdt. Jenny Eva Karosekali STh. M.Min)