SUPLEMEN PA MAMRE 03-09 MEI 2015 RG. GBKP CENGKARENG

SERMON PA MAMRE 03-09 MEI 2015 RG. GBKP CENGKARENG

Ogen : MATIUS 26: 14-16                                           Tema: “ UKURILAH ALU MBAGES”

Tujun : 1. Gelah Mamre ibas muat keputusen rukur alu mbages.

            2. Gelah Mamre la bene erkiteken pemere kalak si deban.

                 

Penjelasen Teks Ogen :  

1.    Ibas teks ogen PA Mamre enda ituriken kerna sura-sura Judas Iskariot, sekalak ibas 12 ajar-ajar Jesus sindayaken Jesus man imam-imam si mbelin alu imbalan 30 duit pirak. Banci sibayangken uga Judas ndayaken Jesus alu imbalan si seri ras erga siitetapken ibas Hukum Taurat sebagai erga pasaren budak (Kel. 21:32), ertina la terjeng berkhianat Judas man Jesus selaku guruna tapi sekaligus ncidahken uga Judas sangat merendahken Jesus selaku guru ras Tuhan janah la obahna iakapna bali ras erga sekalak budak. Engkai maka bage kal perbahanen Judas Iskariot ?

2.    Judas Iskariot eme sekalak si terpilih guna jadi ajar-ajar Jesus janah ndatken kesempaten guna ikut ibas pendahin dan pelayanen Jesus sedekah Jesus nggeluh I doni enda. Ia ipercayaken guna njemak perduiten (bendahara) ibas persadaan ajar-ajar Jesus. Tapi biak Judas mekatep igambarken selaku kalak si arogan ras meduit, si protes keras tupung Jesus iminaki sekalak diberu alu ncurncurken minak wangi si meherga ras merim (Joh 12 :4-5). Lebih asa si e igambarken Johanes pe maka Judas eme sekalak pinangko, bendahara si la jujur si megati make (nangko) duit  siipercayaken guna ijemakna. Arah kesaksin piga2 bagin ayat enda siidah maka Judas eme sekalak si merangap nandangi duit janah bagi kai siikataken Paulus maka merangap nandangi duit eme ulu kerina kejahaten (bdk. 1 Tim. 6:10) Kerangapenna nandangi duit ka nge sierbahanca maka bene akalna seh maka ngasup ia menghianati ras ndayaken Jesus. Kai siilakoken Judas nggo nia-niaken anugerah ras pemilihen Jesus man bana selaku ajar-ajarNa sebab ipediatna dirina ipake Iblis (bdk. Joh. 6:71). Berbeda ras kontras kal kegeluhen Judas ras kalak siisalibken i sebelah Jesus si labo nggeluh radu ras Jesus tapi ibas pengkeri-kerin geluhna ialokenna keselamaten tendina, tapi sebalikna Judas si ibere kesempaten nggeluh ras melayani radu ras Jesus tapi bas pengkeri-kerin geluhna justru la ialokenna keselamaten tendina sebab erkiteken erkadiola ia nandangi perbahanenna man Jesus emaka delisna bana (Mat. 27:5)

3.    Ogen ras Tema PA Mamrenta enda : “Ukurilah Alu Mbages”, mabai Mamre gelah rukur lebe alu mbages ope denga ngelakoken tindaken kai pe, gelah ula bagi pengalaman Judas Iskariot si dungna erkadiola erkiteken nggo ndayaken Jesus. Nina Judas : “Aku nggo erdosa sabab kududurken kalak si la ersalah guna ibunuh” (bdk. Mat 27:3-4). Pengalaman Judas jadi persinget ras jadi pelajaren man Mamre gelah metenget ibas muat keputusen ras ngelakoken tindaken kai pe, maba kiniulin ntah sebalikna maba malapetaka man banta kai siilakoken kita e, gelah berpikir ulang kita guna ngelakokenca.

4.    Merangap nandangi duit erbahanca melukah kita ndabuh kubas dosa ras kejahaten, emaka arah bahan PA Mamre endape jadi persinget man kerina Mamre gelah  la menghalalkan segala cara guna ndatken duit she maka jadi gelap mata, lanai ngasup kita mbedaken si payo ras si la payo. Bagi pengalamen Judas ijenda ndai kai siialoken kita arah dalan si la payo ras la benar labo sempat pe kita nikmatisa tapi justru erbahanca kita bene. Ihianati ras idayakenna Jesus, ikorbankenna Jesus guna keuntungenna, tapi Jesus jadi korban dingen mate jadi Juruselamat man nterem jelma, sebalikna Judas labo untung tapi malah buntung, labo ternikmatisa duit ulihna ndayaken Jesus e tapi mate ia, kernep ibas dosana. Tapi perenungen man banta: Judas mengkhianati Jesus sekali ngenca janah langsung dung, tapi tanpa si sadari kita mekatep mengkhianati Jesus erkiteken erta, erkiteken jabaten/pangkat sidayaken Jesus, guna kepentingenta sidayaken ntah sikorbanken senina/turanta ntah kalak si deban. Ertina biak Judas pe lit mawen-mawen torah ibas dirinta. Ope denga kita kernep ras ngenanami kai siinanami  Judas, teks ogen PA Mamre enda mpersingeti kita guna jera dingen bertobat.

SELAMAT MELAYANI & TUHAN MEMBERKATI

(Pdt. Jenny Eva Karosekali STh. M.Min)